ކޯނީ ރިޕޯޓު ގެއްލިފައިވާކަން ފާހަގަކުރައްވައި ރައީސް ވިދާޅުވީ، ކުރިމަތިލައްވައިގެން އުޅުއްވާ ކެންޑިޑޭޓުންނަށް ސަމާލުވުމަށް
ރައީސް ވިދާޅުވީ، އެއީ ދައުލަތުގެ ނުހަނު ބޮޑު ސިއްރެއް ކަމަށް
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ރ. ރަސްމާދޫގައި ވާހަކަފުޅުދައްކަވަނީ
އެމްޑީޕީގެ ފުރަތަމަ ވެރިކަން ވެއްޓުނު ގޮތާއި ގުޅޭގޮތުން ކޮމިޝަން އޮފް ނޭޝަނަލް އިންކުއަރީން ތައްޔާރުކުރި ރިޕޯޓް (ކޯނީ ރިޕޯޓަށް) ފަހުން ވީގޮތެއް އެނގެން ނެތް ކަމަށާއި، އެކަން ތަހުގީގު ކުރުމަށް ފުލުހަށް ހުށައަޅުއްވާފައިވާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ސާލިޙު ވިދާޅުވެއްޖެއެވެ.
ހދ ނޭކުރެންދޫގައި އޮތް ބަނދަރު ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ، ފެނިގެންދަނީ އެއްބުރުން އެމްޑީޕީއާއި ގުޅިފައިވާ ކޯލިޝަނުން އިންތިޚާބުކުރާ މަންޒަރު ކަމަށެވެ.
ކޯނީ ރިޕޯޓަށް އަލިއަޅުވާލައްވާ ރައީސް ވިދާޅުވީ، އެއީ ދައުލަތުގެ ނުހަނު ބޮޑު ސިއްރެއް ކަމަށާއި، ނަމަވެސް އެ ރިޕޯޓަށްވެސް ފަހުން ވީގޮތެއް އެނގޭކަށް ނެތް ކަމަށެވެ.
ރައީސް ވިދާޅުވީ، މިއަދު އެ ރިޕޯޓެއް ނެތް ކަމަށާއި، އެކަން ބަލައި ތަހުގީގު ކުރުމުން އެކަމުގައި ޒިންމާވަނީ ކޮން ބައެއްކަން އެނގިގެންދާނެ ކަމަށެވެ.
އެ މައްސަލަ ފުލުހަށް ހުށައަޅުއްވާފައިވާނެކަން ފާހަގަ ކުރައްވައި ރައީސް ވިދާޅުވީ، ފުލުހުން މިހާރު އެކަން ތަހުގީގު ކުރަމުންދާ ކަމަށެވެ.
ރިޔާސީ އިންތިޚާބަށް ކުރިމަތިލައްވައިގެން އުޅުއްވާ ކެންޑިޑޭޓުންނަށް ބަލާއިރު، މިއީ ވިސްނަވަން ޖެހިވަޑައިގެންފައިވާ ކަމެއްކަމަށް ރައީސް ވިދާޅުވިއެވެ.
7 ފެބްރުއަރީގައި ރައީސް ނަޝީދުގެ ވެރިކަން ބަދަލުވި ގޮތް ބެލުމަށް އުފެއްދި ކޮމިޝަނުން އެ މައްސަލަ ތަހުޤީޤުކޮށް، ތަންފީޒުކުރަންޖެހޭ ކަންކަން އެ ރިޕޯޓުގައި ބަޔާންކޮށްފައިވެއެވެ.
ކޮމިޝަން އޮފް ނޭޝަނަލް އިންކުއަރީއަކީ ކުރީގެ ރައީސް މުހައްމަދު ނަޝީދުގެ ވެރިކަން ބަދަލުވި ގޮތް ބެލުމަށް އޭރު ރައީސުލްޖުމްހޫރިއްޔާގެ ޤަރާރަކުން އުފެއްދި ކޮމިޝަނެކެވެ.
