ކުރީ ސަރުކާރުތަކުން ތަރައްގީ ގެނައުމުގައި ބޮޑުތިލަދުންމަތި ވަނީ ބާކީކޮށްފައި
ހދ.މަކުނުދޫގައި ބޭއްވި ބަނދަރު ބައްދަލުއްވުމުގައި ކެމްޕޭން ކޯޑިނޭޓަރު އަދި ފޮރިން މިނިސްޓަރު އަބްދުﷲ ޝާހިދު ވާހަކަފުޅުދައްކަވަނީ
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ނުކުމުވަޑައިގެން ހުންނެވީ ބޮޑުތިލަދުންމަތި ބޮޑުކޮށް ބަދަލުކޮށްލެއްވުމަށް ކަމަށް ކެމްޕޭން އެމަނިކުފާނުގެ ކޯޑިނޭޓަރު އަދި ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
އާދިއްތަ ދުވަހުގެ ރޭ ހދ.މަކުނުދޫގައި ބޭއްވި ބަނދަރު ބައްދަލުއްވުމުގައި ޝާހިދު ވިދާޅުވީ ރައީސް ސާލިހު ނުކުމެވަޑައިގެން ހުންނެވީ ބޮޑު ތިލަދުންމަތި ބޮޑުކޮށް ބަދަލުކޮށްލެއްވުމަށް ކަމަށާއި، އެމަނިކުފާނު ތަލަދުންމައްޗަށް ދަތުރުކުރައްވާ އެކަމުގެ ޔަގީންކަން ރައްޔިތުންނަށް ދެއްވާފައިވާ ކަމަށެވެ.
ޝާހިދު ވިދާޅުވީ ބޮޑު ތިލަދުންމައްޗަކީ ޗާޓަރުގައި އަބަދުވެސް ބޮޑު ސަަރައްހަދެއް ކަމަށެވެ. ނަމަވެސް ކުރީ ސަރުކާރުތަކުން ތަރައްގީ ގެނައުމުގައި ބޮޑުތިލަދުންމަތި ބާކީކޮށްފައިވާ ކަމަށާއި، ދައްކަމުންދިޔައީ ހުސް ބަހަނާ ކަމަށެވެ. ނަމަވެސް މިސަރުކާރުން މިސަރަހައްދުގައި އެއާޕޯޓު ތަރައްގީކޮށް، ފަތުރުވެރިކަން ކުރިއެރުވުމަށް މަސައްކަތް ކުރާނެ ކަމަށް ޝާހިދު ވިދާޅުވިއެވެ. އެގޮތުން ހަނިމާދޫ އެއާޕޯޓު ތަރައްގީ ކުރުމުގެ މަޝްރޫއު ޝާހިދު ފާހަގަކުރެއްވިއެވެ.
ޝާހިދު ވިދާޅުވީ ވެރިކަން ބަދަލުވެއްޖެނަމަ ހަނިމާދޫ އެއާޕޯޓު ތަރައްގީ ކުރުމުގެ މަޝްރޫއު ހުއްޓާލާނެ ކަމުގެ މައުލޫމާތު ލިބިފައިވާ ކަމަށާއި، މަކުނުދޫ އެއާޕޯޓުގެ މަޝްރޫއު ވެސް ހުއްޓާލާނެ ކަމަށެވެ. އެގޮތަށް އެކަން ކޮށްދިނަމަ ގެއްލުން ލިބޭނީ ރައްޔިތުންނަށް ކަމަށާއި، ބޮޑުތިލަދުންމަތި ތަރައްގީނުވާނެ ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ ރައީސް ސާލިހަށް ދެވަނަ ދައުރެއް ހޯދައިދޭން ޖެހޭ ކަަމަށެވެ. ދެވަނަ ދައުރާއެކު މުޅި ރާއްޖެއަށް ވަކި ރަށެއް ތަފާތުކުރުމެއްނެތި ތަރައްގީގެ މަޝްރޫއުތައް ގެނެސްދެއްވާނެކަމުގެ ޔަގީންކަން ޝާހިދު ވިދާޅުވިއެވެ.
