ފާއިތުވެދިޔަ 50 އަހަރު ނުގެނެވުނު ތަރައްޤީ މިސަރުކާރުން މަކުނުދޫއަށް ގެނެސްދީފައިވޭ: މެންބަރު ރާއީ
ކުރިއަށް އޮތް ދައުރަށް ރައީސް ސާލިހު އިންތިޚާބުވެއްޖެކަމުގައިވާނަމަ އެއާޕޯޓު އެޅިގެންދާނެ
ރައްޔިތުންގެ މަޖިލީހުގެ މަކުނުދޫ ދާއިރާގެ މެންބަރު މުހައްމަދު ރާއީ ވާހަކަފުޅުދައްކަވަނީ
ފާއިތުވެދިޔަ 50 އަހަރު ނުގެނެވުނު ތަރައްޤީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ސަރުކާރުގައި ހދ. މަކުނުދޫއަށް ގެނެސްދެއްވާފައިވާ ކަމަށް ރައްޔިތުންގެ މަޖިލީހުގެ މަކުނުދޫ ދާއިރާގެ މެންބަރު މުހައްމަދު ރާއީ ވިދާޅުވެއްޖެއެވެ.
އާދިއްތަ ދުވަހުގެ ރޭ ބޭއްވެވި ބަނދަރު ބައްދަލުވުމުގައި މެންބަރު ރާއީ ވިދާޅުވީ ރައީސް ސާލިހު ވެރިކަމާއި ހަވާލުވެވަޑައިގެންނެވުމަށްފަހު އެންމެ ފުރަތަމަ ވެސް މަކުނުދޫގެ ބަނދަރުގައި އޭޓީއެމްއެއް ގާއިމްކޮށްދެއްވި ކަމަށެވެ. ރަށުން ފައިސާ ނުނެގި ކުޅުދުއްފުއްޓަށް އޭޓީއެމްގެ ޚިދުމަތް ހޯދުމަށް ދިއުމަކީ ވަރަށް އުދަނގޫކަމެއްގެ ގޮތުގައި ރާއީ ސިފަކުރެއްވިއެވެ. ރާއީ ވިދާޅުވީ 10،000 ރުފިޔާ ނެގުމަށް ކުޅުދުއްފުއްޓަށް ދާ މީހާ ލޯންޗަށް 3000 ރުފިޔާ ދައްކަން ޖެހުނު ޒަމާން ފައިތުވެއްޖެ ކަމަށެވެ. މިއަދު އާރްޓީއެލްގެ ޚިދުމަތާއެކު ރައްޔިތުންގެ ޖީބަށް ލުއިވެފައިވާ ކަމަށް ރާއީ ވިދާޅުވިއެވެ.
މަކުނުދޫގެ ތަރައްޤީއަށް އިޝާރާތް ކުރައްވައި ރާއީ ވިދާޅުވީ 50 އަހަރުގެ ތެރޭގައި ނެގުނެވުނު ތަރައްޤީ މިސަރުކާރުގައި އެރަށަށް ގެނެސްދީފައިވާ ކަމަށެވެ. ކުރިއަށް އޮތްތަނުގައި ވެސް ގިނަ މަޝްރޫއުތަކެއް ކުރިއަށް ގެންދިއުމަށް ނިންމާފައިވާ ކަމަށް ރާއީ ވިދާޅުވިއެވެ.
އޭނާ ވިދާޅުވީ މަކުނުދޫއަށް ބޮޑު ބަދަލެއް އަންނަމުންދާ މަންޒަރު ފެންނަ ކަމަށެވެ. ކުރިއަށް އޮތް ދައުރަށް ރައީސް ސާލިހު އިންތިޚާބުވެއްޖެކަމުގައިވާނަމަ އެއާޕޯޓުގެ އިތުރުން ޒުވާނުން ބޭނުންވާ ގޮތަށް ބޮޑު ފުޓްބޯޅަ ދަނޑާއި، ރަޖިސްޓަރޑް ރޭސިން ޓްރެކެއް އަޅާނެ ކަމަށެވެ. އަދިވެސް ރައްޔިތުން އެދޭ ތަރައްޤީގެ ގެނެސްދޭނެކަމުގެ ޔަގީންކަން ރައީ ދެއްވިއެވެ.
މީގެ އިތުރުން ރާއީ ވިދާޅުވީ އިދިކޮޅު ކެންޑިޑޭޓު އިންތިޚާބު ވެއްޖެކަމުގައިވާނަމަ ރައްޔިތުން އެންމެ ބޮޑަށް ބޭނުންވާ މަޝްރޫއުގެ މަސައްކަތްތައް ކުރިއަށް ނުދާނެ ކަމަށާއި، އެ ރަށުގައި އެއާޕޯޓު ނޭޅޭނެ ކަމަށެވެ.
ރާއީ ވިދާޅުވީ ރައްޔިތުން އެދޭ ތަރައްޤީ ބޭނުންވާނަމަ ރައީސް ސާލިހަށް ދެވަނަ ދައުރެއް ދޭން ޖެހޭ ކަމަށެވެ. އެހެންކަމުން އެމަނިކުފާނަށް ވޯޓު ދެއްވުމަށް ރާއީ ގޮވާލެއްވިއެވެ.
