ރައީސްގެ ވައުދުފުޅުތައް ނައިވާދޫއަށް: ބިން ހިއްކުމާއި ބޯހިޔާވަހިކަމާއި ސްޕޯޓްސް އެރީނާއެއް
ބިން ހިއްކައި، ރިވެޓްމަންޓް ޖެހިގެންދާނެ
ރައީސް ނައިވާދޫގައި ވާހަކަފުޅުދައްކަވަނީ
ހދ. ނައިވާދޫ ބިން ހިއްކަވައިދެއްވައި, ބޯހިޔާވަހިކަމުގެ މަޝްރޫއާއެކު ސްޕޯޓްސް އެރީނާއެއް ތަރައްގީ ކޮށްދެއްވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވައުދުވެވަޑައިގެންފިއެވެ.
"އުފާވެރި އަމާންރާއްޖެ" ކެމްޕޭނަށް ހދ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ނައިވާދޫއަށް ވަޑައިގެން ބޭއްވެވި ބަނދަރު ބައްދަލުވުމުގައި ވާހަކަފުޅުދައްކަވަމުން ރައީސް ވިދާޅުވީ، މިހާތަނަށް ރިޔާސީ އިންތިޚާބެއްގައި އެންމެ ބޮޑު ތަފާތަކުން ކާމިޔާބު ކުރައްވާނެ އިންތިޚާބަކީ މިފަހަރުގެ އިންތިޚާބު ކަމަށެވެ.
ރައީސް ވިދާޅުވީ ފެނާއި ނަރުދަމާ ނެތް ހުރިހާ ރަށެއްގައި ފެނާއި ނަރުދަމާގެ މަސައްކަތް ނިމެމުންދާ ކަމަށާއި، އާރުޓީއެލްއާއެކު، ޖީބުން ކުރި ޚަރަދުގެ 81 އިންސައްތަ ސަލާމަތްކުރެވިގެން ދާކަމަށެވެ. އަދި ގާނޫނަކުން މިނިމަމް ވޭޖާއި ސަރވިސް ޗާޖް ކަނޑައެޅިފައިވާ ކަމަށާއި، ފަތުރުވެރިކަމުގެ ދާއިރާގައި ހިމެނޭ މުވައްޒަފުންގެ ޖަމިއްޔާގެ ފަރާތުން ބުނަމުންދަނީ އެހެން ސަރުކާރަކުން އަޅާނުލާވަރަށް މިސަރުކާރުން ފަތުރުވެރިކަމުގެ ދާއިރާގައި ހަރަކާތްތެރިވާ މުވައްޒަފުންނަށް އަޅާލާ ވާހަކަ ކަމަށެވެ. ރައީސް ވަނީ އެ ޓީމުން އެމަނިކުފާނު އެންޑޯޒް ކުރެއްވިކަންވެސް ހާމަކުރައްވާފައެވެ.
ރައީސް ވިދާޅުވީ ނާވައިދޫއަށް ކުރިއަށް އޮތް ދައުރުގައި ކުރަންޖެހޭ ކަންކަން އެބަހުރި ކަމަށެވެ. އެގޮތުން، ބިން ހިއްކުމާއި، ރިވެޓްމަންޓް ޖެހުމާއި، ބޯހިޔާވަހިކަން ހައްލުކޮށްދެއްވާނެ ކަމަށް ވިދާޅުވިއެވެ. އަދި ރަށުގެ މަގުތަކުގައި ތާރު އަޅުއްވައިދެއްވައި ޒަމާނީ ފެންވަރަށް މަގުތައް ހައްދަވައިދެއްވާނެ ކަމަށާއި، ޒުވާނުން ބޭނުންވާ ގޮތަށް ކުޅިވަރުކުޅޭނެ ވަސީލަތްތައް ފުޓްބޯޅަ ދަނޑާއެކު އަޅުއްވައިދެއްވާނެ ކަމަށާއި، އެތަން ވެގެންދާނީ ސްޕޯޓްސް އެރީނާއަކަށް ކަމަށް ރައީސް ވިދާޅުވިއެވެ. ރައީސް ވިދާޅުވީ ލޯކަލް ޓުއަރިޒަމް ތަރައްގީކުރުމަށް ފައިނޭންޝަލް އެސިސްޓެންސް ދެއްވާނެ ކަމަށާއި، އެހެންކަމުން މަސައްކަތައިގެން ކުރިއަށް ދިއުމަށެވެ.
ރައީސް ވަނީ ރައްޔިތުން އެދޭ ބަދަލު ރަށަށް ގެނެސްދެއްވުމުގައި ދެމިހުންނަވާނެ ކަމަށް ވިދާޅުވެފައެވެ. އަދި އެމަނިކުފާނަށް ވޯޓު ދީ، މިހާރު ފަށާފައިވާ ތަރައްގީއާއެކު ކުރިއަށް ދިއުމަށް ވަނީ އެދިވަޑައިގެންފައެވެ.
