ފާގަސަންގެ ހެޓްރިކާއެކު ބްރައިޓަންއިން ނިއުކާސަލް ބަލިކޮށްފި

އިނގިރޭސި ޕްރިމިއަރ ލީގުގައި ހޮނިހިރު ދުވަހުގެރޭ ބްރައިޓަންގެ ޒުވާން ކުޅުންތެރިޔާ އިވާން ފާގަސަންގެ ހެޓްރިކާއެކު, އެ ޓީމުން ނިއުކާސަލް ޔުނައިޓެޑް ބަލިކޮށްފިއެވެ.

ބްރައިޓަންއިން ނިއުކާސަލްގެ މައްޗަށް 3-1ގެ ނަތީޖާއަކުން ކުރި ހޯދިއިރު، ޓީމުގެ ހުރިހާ ލަނޑެއްވެސް ޖެހީ އުމުރުން 18 އަހަރުގެ ފާގަސަންއެވެ. ފާގަސަން އޭނާގެ ފުރަތަމަ ލަނޑު ޖެހީ މެޗުގެ 27 ވަނަ މިނެޓުގައެވެ. ފުރަތަމަ ހާފު ބްރައިޓަންއިން ނިންމާލީ އެއް ލަނޑުގެ ފަރަގަކާ އެކުއެވެ.

ދެވަނަ ހާފު ފެށިގެން، މެޗުގެ 65 ވަނަ މިނެޓުގައި ބިލީ ގިލްމޯ ތަނަވަސްކޮށްދިން ފުރުސަތަކުން ފާގަސަން ވަނީ އޭނާގެ ދެވަނަ ލަނޑު ޖަހާފައެވެ. އަދި އޭގެ ފަސް މިނެޓުފަހުން މިޓޯމާ ތަނަވަސްކޮށްދިން ފުރުސަތަކުން ފާގަސަން ވަނީ އޭނާގެ ހެޓްރިކް ފުރިހަމަ ކޮށްފައެވެ.

މުޅި މެޗުގައިވެސް ނިއުކާސަލްއަށް އެދެވޭ ކުޅުމެއް ދެއްކިފައެއް ނުވެއެވެ. ގޯލަށް އަމާޒުކޮށް ޝޮޓެއް ހެދިފައިވަނީވެސް މެޗުގެ 87 ވަނަ މިނެޓުގައެވެ. އެއަށްފަހު، ދެވަނަ ހާފުގެ އިތުރު ވަގުތުގައި ނިއުކާސަލްގެ ހަމައެކަނި ލަނޑު ޖަހައިދިނީ ބަދަލު ކުޅުންތެރިޔެއްގެ ގޮތުގައި ކުޅެން ނިކުތް ކަލުމް ވިލްސަންއެވެ.

ނިއުކާސަލްއާ ދެކޮޅަށް ހެޓްރިކް ހަދައި، ޒުވާން ފާގަސަން ވަނީ ތާރީޚުން ޖާގަ ހޯދާފައެވެ. އުމުރުން 19 އަހަރު ނުވަނީސް، ޕްރިމިއަރ ލީގުގައި މީގެކުރިން ހެޓްރިކް ހެދިފައިވަނީ އެންމެ ތިން ކުޅުންތެރިންނަށެވެ. އެއީ ކްރިސް ބާޓް-ވިލިއަމްސްއާއި ރޮބީ ފައުލާގެ އިތުރުން މައިކަލް އޮވެންއެވެ.

މި މޮޅާއެކު ބްރައިޓަން ވަނީ ވަގުތީގޮތުން ހަތަރުވަނައަށް ޖެހިލާފައެވެ. ހަތަރު މެޗުން ބްރައިޓަންއަށް ލިބިފައިވަނީ ނުވަ ޕޮއިންޓެވެ. މި ސީޒަނުގައި ނިއުކާސަލް ކުޅުނު ފުރަތަމަ މެޗުން މޮޅުވިނަމަވެސް، ޖެހިގެން އައި ތިން މެޗުން ވަނީ ބަލިވެފައެވެ. ޓީމު އޮތީ ތިން ޕޮއިންޓާއެކު 14 ވަނާގައެވެ.