މި ސަރުކާރު ފިޔަވައި ރައްޔިތުން ބޭނުންވި ގޮތަށް މަޝްރޫއުތައް ކުރިއަށްގެންދާ ސަރުކާރެއް ދިވެހި ތާރީޚު ނުދެކޭ: އާޒިމް
މިހާތަނަށް އެމްޓީސީސީން 56 ބަނދަރެއްގެ މަސައްކަތް ނިންމާ ރައްޔިތުންނާއި ހަވާލުކޮށްފައިވޭ
މެނިފެސްޓޯ ޕްރޮގްރާމްގައި އެމްޓީސީސީގެ ސީއީއޯ އާދަމް އާޒިމް ވާހަކަފުޅުދައްކަވަނީ
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ސަރުކާރު ފިޔަވައި، ރައްޔިތުން ބޭނުންވި ގޮތަށް ތަރައްޤީގެ މަޝްރޫއުތައް ކުރިއަށްގެންދިޔަ އަދި ކުރިއަށްގެންދާ ސަރުކާރެއް ދިވެހި ތާރީޚުން ނުދެކޭ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.
ރާއްޖެޓީވީގެ މެނިފެސްޓޯ ޕްރޮގްރާމްގައި އާޒިމް ވިދާޅުވީ މި ސަރުކާރުން ކުރިއަށް ގެންދާ ތަރައްޤީގެ ހުރިހާ މަޝްރޫއެއް ކުރިއަށް ގެންދަނީ ވަރަށް ފުރިހަމައަށް ކަމަށާއި، ރައްޔިތުން ގެންނަން ބޭނުންވާ ހުރިހާ ބަދަލާއެކު ކަމަށެވެ. އެއްވެސް މަޝްރޫއެއް އަވަސް އަރުވާލައި، ނިންމާލަން މަސައްކަތް ނުކުރާ ކަމަށާއި، ކުރާ ހުރިހާ މަސައްކަތެއް ކުރަނީ ވަރަށް ފުރިހަމައަށް ކަމަށް އާޒިމް ވިދާޅުވިއެވެ. އަދި ވިދާޅުވީ ރައްޔިތުންގެ ލޮލުގައި އަނދުން އެޅުވުމަށް މިސަރުކާރުން މަސައްކަތް ނުކުރާ ކަމަށެވެ.
އެއާޕޯޓުގެ މަޝްރޫއުތަކަށް އިޝާރާތް ކުރައްވައި އާޒިމް ވިދާޅުވީ އެއާޕޯޓެއް ނިންމާ ހުޅުވާއިރު، އެއާޕޯޓެއްގައި ހުންނަންޖެހޭ ހުރިހާ ކަމެއް ފުރިހަމަ ވެފައި ހުންނަންޖެހޭނެ ކަމަށް ރައީސް ސާލިހު އިރުޝާދު ދެއްވާފައިވާ ކަމަށެވެ. އެހެންކަމުން މިދައުރުގައި ހުޅުވާ ހުރިހާ އެއާޕޯޓެއް ވަރަށް ފުރިހަމަވާނެކަމުގެ ޔަގީންކަން އާޒިމް ދެއްވިއެވެ.
އާޒިމް ވިދާޅުވީ ކޮވިޑް-19އާ އާއެކު ދެ އަހަރު މަސައްކަތްތައް ކުރަންޖެހުނީ ވަރަށް އުދަނގުލުން ކަމަށެވެ. ނަމަވެސް މިދައުރުގެ ތެރޭގައި ތިން އެއާޕޯޓެއްގެ މަސައްކަތް ވަރަށް ފުރިހަމައަށް ނިންމާ ހުޅުވާފައިވާ ކަމަށް އާޒިމް ވިދާޅުވިއެވެ.
މިސަރުކާރުން ކުރިއަށް ގެންދާ ބަނދަރުގެ މަޝްރޫއުތަކަށް އިޝާރާތް ކުރައްވައި އާޒިމް ވިދާޅުވީ މިހާތަނަށް އެމްޓީސީސީން 56 ބަނދަރެއްގެ މަސައްކަތް ނިންމާ ރައްޔިތުންނާއި ހަވާލުކޮށްފައިވާ ކަމަށެވެ. ބަނދަރުގެ މަޝްރޫއުތައް ކުރިއަށް ގެންދާއިރު، ކައުންސިލާއި ރައްޔިތުން އެދޭ ގޮތަށް ބަނދަރަށް ބަދަލެއް ގެންނަން ބޭނުންވާ ކަމަށްވާނަމަ އެ ބަދަލެއް ގެންނަ ކަމަށް އާޒިމް ވިދާޅުވިއެވެ. އަދި ވިދާޅުވީ ބައެއް ބަނދަރުތަކަށް 18 ފަހަރުމަތިން ވެސް ބަދަލު ގެނެސްފައިވާ ކަމަށެވެ. މިއީ ގޮންޖެހުމެއްގެ ގޮތުގައި ސިފަކުރައްވައި އާޒިމް ވިދާޅުވީ ބަނދަރުގެ އަމަލީ މަސައްކަތް ފެށުމަށްފަހު ބަނދަރަށް ބަދަލެއް ގެންނަ ކޮންމެ ފަހަރަކު ޑިޒައިންއަށް ބަދަލުތައް އައިސް، މަސައްކަތްތައް ހުއްޓޭ ކަމަށެވެ. ނަމަވެސް ކެތްތެރިކަމާއެކު މަސައްކަތް ކުރަނީ ރައީސް ދެއްވާފައިވާ އިރުޝާދާއެކު، ރައްޔިތުންގެ ފައިސާއިން ހުރާ ހޭދައަކަށްވާތީ، ރައްޔިތުން ބޭނުންވާ ގޮތަށް އެމަޝްރޫއުތައް ކުރިއަށް ގެންދަން ކަމަށް އާޒިމް ވިދާޅުވިއެވެ.
މީގެ އިތުރުން އާޒިމް ވިދާޅުވީ މިސަރުކާރު ފިޔަވައި، ރައްޔިތުން ބޭނުންވި މަޝްރޫއުތައް ކުރިއަށް ގެންދިޔަ ސަރުކާރެއް ދިވެހި ތާރީހުން ވެސް ނުދެކޭނެ ކަމަށެވެ. މަޝްރޫއުތައް ކުރިއަށްދާ ސްޕީޑް ރަނގަޅު ކަމަށާއި، ކުރިއަށް އޮތްތަނުގައި ވެސް މަސައްކަތް ކުރާނީ އެގޮތަށް ކަމަށް އާޒިމް ވިދާޅުވިއެވެ.
