"އުތުރު ތިލަފަޅަކީ ރާއްޖޭގެ މިލްކެއް، އިންޑިއާ ސިފައިން އެތާކު ނުތިބޭނެ"
3 ސެޕްޓެމްބަރު 2023 | އާދީއްތަ 02:33އެއްވެސް އެގްރީމެންޓެއްގައި ގައުމުގެ ސަލާމަތަށް ނުރައްކާވާފަދަ ކަމެއް ނުއޮންނާނެ ކަމަށް ރައީސް ވިދާޅުވި
2023 ވަނަ ރިޔާސީ އިންތިޚާބުގައި ވާދަކުރައްވާ ކެންޑިޑޭޓުން ރިޔާސީ ބަހުސްގައި ރައީސް ސާލިޙު ބައިވެރިވެވަޑައިގަންނަވަނީ
އުތުރު ތިލަފަޅަކީ ރާއްޖޭގެ މިލްކެއް ކަމަށާއި އިންޑިއާ ސިފައިން އެތާކު ނުތިބޭނެކަމަށް ރައީސުލްޖުމްހޫރިއްޔާ އަދި ގުޅިފައިވާ ޕާޓީތަކުގެ ކެންޑިޑޭޓް އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ރިޔާސީ ބަހުސްގައި އިންޑިއާ ސިފައިން ރާއްޖޭގައި ތިބުމާއި މެދު ވާހަކަފުޅު ދައްކަވަމުން ރައީސް ވިދާޅުވީ ބޭރުގެ އެއްވެސް ގައުމެއްގެ އަސްކަރީ ސިފައިން މިލިޓަރީ ނުވަތަ އަސްކަރީ މަސައްކަތެއް ކުރަން ރާއްޖޭގައި ނުތިބޭނެ ކަމަށެވެ. ގައުމުތަކުގެ ސިފައިން ރާއްޖޭގައި އައިސް ތިބެނީ އަސްކަރީ ބޭނުމަށް ނޫން ކަމަށާއި އެމީހުން ތިބެނީ އެކިކަހަލަ ތަމްރީނުތަކަށް ކަަމަށް ވެސް ވިދާޅުވިއެވެ.
އުތުރު ތިލަފަޅު އެއްބަސްވުމުގެ މައުލޫމާތުތައް މަޖިލީހާއި ވެސް ހިއްސާކުރައްވާފައިވާ ކަމަށާއި އެ އެއްބަސްވުމުގައި މައްސަލައެއް ހުރިކަމަށްވާނަމަ އޭރުވެސް އެކަން ހާމަކުރަންވާނެ ކަމަށް ރައީސް ވިދާޅުވިއެވެ. އަދި އެފަދަ އެއްވެސް އެގްރީމެންޓެއްގައި ގައުމުގެ ސަލާމަތަށް ނުރައްކާވާ ފަދަ ކަމެއް ނުއޮންނާނެ ކަމަށް ރައީސް ވިދާޅުވިއެވެ.
