"އެއްވެސް ބޭރު ޤައުމަކުން ކެމްޕެއިނަށް އެއްވެސް ފައިސާއެއް އަޅުގަނޑުމެނަކަށް ނުލިބޭ"
މިލިޓަރީ މަސައްކަތެއް ކުރަން އެއްވެސް ޤައުމެއްގެ ސިފައިން ރާއްޖޭގައި ނުތިބޭނެ ކަަމަށް ރައީސް ތަކުރާރުކުރައްވާ ވިދާޅުވި
ރިޔާސީ ބަހުސްގައި ރައީސް ޞާލިހު ވާހަކަފުޅުދައްކަވަނީ
އިންޑިއާ އިން ރިޔާސީ އިންތިޚާބަށް ކެމްޕެއިން ކުރުމަށް ރައީސުލްޖުމްހޫރިއްޔާ އަދި ގުޅިފައިވާ ޕާޓީތަކުގެ ކެންޑިޑޭޓް އިބްރާހީމް މުހައްމަދު ޞާލިހަށް ފައިސާ ދެއްވި ކަމަށް ދެކެވޭ ވާހަކަތައް އެމަނިކުފާނު ދޮގުކުރައްވައިފިއެވެ.
ރިޔާސީ ބަހުސްގައި ރައީސް ވިދާޅުވީ އެއްވެސް ގައުމަކުން އެއްވެސް ވަރަކަށް ކެމްޕެއިން އަށް ފައިސާ ލިބިވަޑައިގަންނަވާފައިނުވާ ކަަމަށެވެ. މީގެ އިތުރުން ރިޔާސީ ބަހުސްގައި ރާއްޖޭގެ ގައުމީ ސަލާމަތާއި ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ ބޭރުގެ އެއްވެސް ގައުމެއްގެ އަސްކަރީ ސިފައިން މިލިޓަރީ ނުވަތަ އަސްކަރީ މަސައްކަތެއް ކުރަން ރާއްޖޭގައި ނުތިބޭނެ ކަމަށެވެ. އެހެންނަމަވެސް ގައުމުތަކާއި އޮންނަ ގުޅުމުގެ ތެރެއިން އެކިއެކި އެކްސަސައިޒްތަކުގެ ތަމްރީންތަކަށް އެހެން ޤައުމުތަކުގެ ސިފައިން އަންނަ ކަމަށް ރައީސް ވިދާޅުވިއެވެ. އެގޮތަށް ޗައިނާ، އިންޑިއާ، ލަންކާ، އެމެރިކާ، އިނގިރޭސިވިލާތުގެ ސިފައިން ހަރަކާތްތެރިވެފައިވާ ކަމަށް ރައީސް ވިދާޅުވިއެވެ. އެ އުސޫލުން ބޭރު ގައުމުތަކުގެ ސިފައިން އައި ނަަމަވެސް މިލިޓަރީ މަސައްކަތެއް ކުރަން އެއްވެސް ޤައުމެއްގެ ސިފައިން ރާއްޖޭގައި ނުތިބޭނެ ކަަމަށް ރައީސް ވިދާޅުވިއެވެ.
ރާއްޖޭގައި ތިބި ބޭރުގެ ސިފައިންގެ އަދަދު ހާމަނުކުރަން ދައުލަތުން މަސައްކަތް ކުރާ އިރު ބޭރު ސިފައިން ރާއްޖޭގައި ތިބުން އެއީ ގަައުމަށް އޮތް ނުރައްކަލެއް ނޫންތޯ ސިޔާސީ ބަހުސްގައި ވަނީ ސުވާލެއް ދަންނަވާފައެވެ. އެ ސުވާލުގެ ޖަވާބުގައި ރައީސް ވަނީ އެއްވެސް ގައުމެއްގެ ސިފައިން ރާއްޖޭގައި މިލިޓަރީ މަސައްކަތެއް ނުކުރާކަމުގެ ޔަގީންކަން ދެއްވާކަމަށް ތަކުރާރުކުރައްވާފައެވެ.
މި މައުޟޫގައި ވާހަކަފުޅުދައްކަވަމުން ރައީސް ވަނީ އުތުރުތިލަފަޅު އެއްބަސްވުމަކީ ރާއްޖޭގެ މިނިވަންކަން ގެއްލޭ ގޮތަށް އޮތް އެއްބަސްވުމެއް ނޫން ކަމަށް ވެސް ވިދާޅުވެފައެވެ.
