އައު ވޭސްޓް ޓްރާންސްފަރ ސްޓޭޝަނަކާއެކު ލިބޭ އެންމެ ބޮޑު ހިތްހަމަޖެހުމަކީ ކުނި ތިލަފުއްޓަށް ގެންދާއިރު ކުނި މޫދަށް ނޭޅުން: ޝާން
މިހާރު މަސައްކަތްތައް ބައްޓަންވެފައިވާ ގޮތުން އުޅަނދުގައި ހުންނަ ކުނީގެ ބަރުދަން އެނގިގެންދާނެ
ވޭސްޓް ޓްރާންސްފަރ ސްޓޭޝަނަށް ބޭނުންވާ ތަކެތި އަންލޯޑް ކުރަނީ
މާލޭގައި ގާއިމުކޮށްފައިވާ އައު ވޭސްޓް ޓްރާންސްފަރ ސްޓޭޝަނަކާއެކު ލިބޭ އެންމެ ބޮޑު ހިތްހަމަޖެހުމަކީ މާލެއިން ތިލަފުއްޓަށް ކުނި ގެންދާއިރު ދެން މޫދަށް ކުނި އެޅިގެން ނުދިޔުންކަމަށް ވެމްކޯގެ ޖެނެރަލް މެނޭޖަރ މުހައްމަދު ޝާން ވިދާޅުވެއްޖެއެވެ.
މާލެ އިންޑަސްޓްރިއަލް ވިލެޖް ސަރަހައްދުގައި ހުންނަ ވެމްކޯ ސައިޓުގައި އިމާރާތްކުރި އައު ވޭސްޓް ޓްރާންސްފަރ ސްޓޭޝަންގެ ބޭނުން ރަސްމީކޮށް ކުރަން ފަށާފައިވަނީ އޮގަސްޓް މަހުގެ 28 ވަނަ ދުވަހުއެވެ. އެކަމާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ޝާން ވިދާޅުވީ އަލަށް ބޭނުންކުރަން ފެށި ވޭސްޓް ޓްރާންސްފަރ ސްޓޭޝަންގެ ބޭނުން އެކި ގޮތްގޮތަށް ހިފެމުންދާނެކަމަށެވެ. އެންމެ ބޮޑަށް ފާހަގަކުރެވެނީ މުވައްޒަފުންގެ މަސައްކަތުގެ ވައްޓަފާޅިއަށް އަންނަ ބަދަލުކަމަށާއި މަސައްކަތުގެ އެފިޝަންސީ ރަނގަޅުވުން ކަމަށެވެ.
ޝާން ވިދާޅުވީ މީގެއިތުރުން މިހާރު ކުނި ގެނެވޭ ވޮލިޔުމްވެސް އެނގިގެންދާނެކަމަށެވެ. ކުރީގައި ކުނި ހުންނަ ވަރު އެނގެނީ ކުނި އަޅާ އުޅަނދު ފުރުނީމާ އޭގައި އިންނަ ޓަނުގެ އަދަދު ކަމަށާއި ނަމަވެސް މިހާރު މަސައްކަތްތައް ބައްޓަންވެފައިވާ ގޮތުން އުޅަނދުގައި ހުންނަ ކުނީގެ ބަރުދަން އެނގިގެންދާނެކަމަށެވެ.
އޭގެ ސަބަބުން އެންމެ ރަނގަޅު ޑާޓާތައް ނެގި މުސްތަގުބަލުގައި މަސައްކަތް މުރާޖާކުރަންޖެހުނަސް އެކަންވެސް ކުރެވޭނެކަމަށް ޝާން ވިދާޅުވިއެވެ.
މިސްޓޭޝަންގެ މަސައްކަތް 14 މަސް ދުވަހުން ކޮށްފައިވަނީ ޗައިނާ ސްޓޭޓް ކޮންސްޓްރަކްޝަން އިންޖިނިއަރިން ކޯޕަރޭޝަން ލިމިޑެޓްގެ (ސީ.އެސް.ސީ.އީސީ) އާ ހަވާލުކޮށްގެންނެވެ. 12 މިލިއަން ޑޮލަރުގެ މިމަޝްރޫޢާއެކު މާލެ ސަރަހައްދުގައި ކުނި މެނޭޖްކުރުމަށް ޒަމާނުއްސުރެ ދިމާވެފައިވާ ދަތިތަކަށް ޒަމާނީ ހައްލެއް ލިބިގެންދާނެކަމަށް ވެމްކޯއިން ބުނެއެވެ.
