މޭޑޭ އަށް ސަރުކާރުން މަރުހަބާ ކީ އައްޑޫ ވެމްކޯ އިން ދެ މުވައްޒަފުން ބޭ އިންސާފުން ވަކި ކުރަމުން

މޭޑޭ ނުވަތަ ބައިނަލްއަގުވާމީ ގޮތުން ފާހަގަކުރާ މަސައްކަތްތެރިންގެ ދުވަހަށް، ސަރުކާރުން މަރުހަބާ ކިޔުމުގެ ގޮތުން ވޭސްޓް މެނޭޖުމަންޓް ކޯޕަރޭޝަން (ވެމްކޯ) ގެ ހިތަދޫ ބްރާންޗުފެ ދެ މުވައްޒަފުން ވަޒީފާއިން ވަކިކޮށްފި އެވެ.

ރާއްޖެއެމްވީއަށް މައުލޫމާތުދެމުން ވެމްކޯގެ މެނޭޖަރުގެ މަގާމުން ވަކިކުރި މޫސާ މުހައްމަދު ވިދާޅުވީ ކުއްލިގޮތަކަށް އޭނާއަށް އެންގީ އަޚްލާގީ މައްސަލައެއް ބަލަމުންދާ ކަމަށާއި އަދި ވަކީލަކާއި އެކީ ބޯޑަށް ޖަވާބުދާރީވާން ފުރުޞަތަކަށް އެދުމުން އެފުރުޞަތު ދޭނެ ކަމަށް ބުނުމަށްފަހުވެސް ވަކިއެއްޗެއް އެންގުމަގަކާއި ނުލައި ބުދަ ދުވަހު ވަޒީފާއިން ވަކި ކުރީ ކަމަށެވެ.

މޫސަ ވިދާޅުވީ މިދިޔަ ހަފްތާގެ ތެރޭގައި އެމްޑީޕީގެ ލީޑަރޝިޕްގެ މެމްބަރުން އައްޑޫ ސިޓީއަށް ވަޑައިގެން ބޭއްވި ބައްދަލުވުމަކަށް ދިޔަ ކަމަށާއި ޖަލްސާ ފެއްޓުމުގެ ގޮތުން އެވަގުތު ގުރުއާން ކިޔެވި ކަމަށެވެ. އެއީ އަޚްލާގީ މައްސަލައެއް ކަމަށްބުނެ އޭނާ މަޤާމުން ވަކި ކުރި އިރު ހަމަ އެޖަލްސާއަށް ދިޔަ ސީނިއަރ އެޑްމިނިސްޓްރޭޓަރ އޮފިސަރ މުހައްމަދު އަފްސަލްވެސް މަޤާމުން ވަކިކޮށްފައިވާ ކަމަށެވެ.

މި ދެ މުވައްޒަފުންވެސް ވަޒީފާއިން ވަކިކުރި ސަބަބެއް ކަމުގައި ބުނެފައިވަނީ ވަޒީފާއާއި ބެހޭ ޤާނޫނުގެ 23 ވަނަ މާއްދާގެ (ހ) ގެ ދަށުންނެއެވެ.

މަސައްކަތްތެރިންގެ ހައްގުތަކަށް ވަކާލާތު ކުރުމަށް މޭ ޑޭ މާދަމާ ފާހަގަކުރާއިރު ސަރުކާރުން ރާއްޖޭގެ މަސައްކަތްތެރިންގެ ހައްގުއް ނިގުޅައިގަނެ އެތައް އާއިލާއެއް ދަނީ ހާލުގައި ޖައްސަމުންނެއެވެ.

ރައީސް މުއިއްޒު ވެރިކަމަށް ވަޑައިގެންނެވި އިރު ވިދާޅުވީ ސިޔާސީ ފިކުރަކަށް ނުބަލާނެ ކަމަށާއި ނުހައްގުން އެއްވެސް މީހަކު ވަޒީފާއިން ވަކި ނުކުރާނެ ކަމަށެވެ.