މިހާތަނަށް އެންޓި ކެމްޕެއިން ކުރި ދެ މައްސަލައެއް ބަލާފައިވޭ: އީސީ
2 ސެޕްޓެމްބަރު 2023 | ހޮނިހިރު 13:46ރިޝްވަތާއި ގުޅޭ މައްސަލަތައް ފޮނުވަނީ އޭސީސީއަށް
އިލެކްޝަން ކޮމިޝަނުން ބޭއްވި ނޫސްވެރިންގެ ބައްދަލުވުމުގެ ތެރެއިން
މިހާތަނަށް އެންޓި ކެމްޕެއިން ކުރި ދެ މައްސަލައެއް ބަލާފައިވާ ކަމަށް އިލެކްޝަން ކޮމިޝަން (އީސީ)ން ބުނެފިއެވެ.
ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި އީސީގެ ނާއިބު ރައީސް އިސްމާއީލު ހަބީބު ވިދާޅުވީ އިންތިޚާބަށް ވަގުތު ކުޑަތަންވަމުންދާއިރު، ފޯރިގަދަވަމުންދާ ކަމަށެވެ.
ރާއްޖޭގެ ހުރިހާ ހިސާބެއްގައި ކެންޕޭން ކުރުމުގެ މަސައްކަތްތައް ކުރަމުންދާއިރު، މިހާތަނަށް އެންޓި ކެމްޕެއިން ކުރުމާ ގުޅޭ ދެ މައްސަލައެއް ކޮމިޝަނަށް ހުށަހަޅާފައިވާ ކަމަށާއި، އެ ދެ މައްސަލަ ވެސް ބަލާފައިވާ ކަމަށް ހަބީބު ވިދާޅުވިއެވެ. އަދި ވިދާޅުވީ މި ދެ މައްސަލައަށް ވެސް ޖަވާބު ދީފައިވާ ކަމަށެވެ.
ރިޝްވަތާއި ގުޅޭ މައްސަލައަށް އިޝާރާތް ކުރައްވައި ހަބީބު ވިދާޅުވީ މިފަދަ މައްސަލައެއް ހުށަހަޅައިފިނަމަ އެ މައްސަލައެއް ފޮނުވަނީ އެންޓި ކޮރަޕްޝަން ކޮމިޝަން (އޭސީސީ)އަށް ކަމަށެވެ.
އިންތިޚާބަށް އަލިއަޅުއްވާލައްވައި ހަބީބު ވިދާޅުވީ މި އިންތިޚާބުގައި އެއްވެސް ހިސާބެއްގައި މަކަރެއް ހަމަނުޖެހުމެއް ހެދުމުގެ އެއްވެސް ފުރުސަތެއް ނުދޭނެ ކަމަށެވެ. ޚާއްސަ ގޮތެއްގައި ވޯޓުލާ މީހާ ވޯޓުލާ މަރުކަޒަށް އައުމަށްފަހު އޭނާގެ އަމިއްލަ އިހްތިޔާރުގައި ވޯޓު ކަރުސާ ހިފައިގެން ފާހަގަ ޖެހުމަށްފަހު ނިކުމުގެން ދިއުމާ ހަމައަށް އޭނާގެ މައްޗަށް އެއްވެސް ފަރާތަކުން އެއްވެސް ކަހަލަ ނުފޫޒެއް ނުފޯރާނެ ކަމުގެ ފުރިހަމަ ޔަގީންކަން ރައްޔިތުންނަށް އަރުވާ ކަމަށް ހަބީބު ވިދާޅުވިއެވެ.
ސެޕްޓެންބަރު މަހުގެ 09 ވަނަ ދުވަހު ބާއްވާ ރިޔާސީ އިންތިޚާބަށް ކޮމިޝަނުން ވަނީ ވަރަށް ބޮޑަށް ތައްޔާރުވެފައެވެ.
މިއަހަރުގެ ރިޔާސީ އިންތިޚާބުގައި މުޅި ޖުމްލަ 574 ވޯޓު ފޮށި ބަހައްޓާނެ އެވެ. އެއީ މާލެ ސަރަހައްދުގައި 176 ވޯޓު ފޮށި، މާލެ ފިޔަވައި ސިޓީތަކާއި އަތޮޅުތަކުގައި 384 ވޯޓު ފޮށި، ސިނާއީ މަސައްކަތް ކުރާ ތަންތަނާއި ޖަލުތަކުގައި 6 ވޯޓު ފޮށި، ރާއްޖެއިން ބޭރުގައި 8 ވޯޓު ފޮށި ބަހައްޓާނެއެވެ.
