ޖޮހެނަސްބަރގް: ރޯވަމުން ދިޔަ އިމާރާތުން ބޭރަށް އެއްލި ބޮޑުބެ ދަރިފުޅުގެ ފުރާނަ ހުރި ކަމެއް ނޫނީ ނެތްކަމެއްވެސް ނޭނގެ!

އޯގަސްޓް 31 ވީ ބުރާސްފަތި ދުވަހު ބައިނަލްއަޤުވާމީ މީޑިއާ ސިއްސުވާލި އެއް ޚަބަރަކަށް ވީ ދެކުނު އެފްރިކާގެ ޖޮހެނަސްބަރގްގެ އިމާރާތެއްގައި އަލިފާނުގެ ހާދިޘާއެއް ހިނގާ، ގިނަ ޢަދަދެއްގެ ބަޔަކު މަރުވި ޚަބަރެވެ. ބުރާސްފަތި ދުވަހުގެ އިރު ތިރިވަމުން ދިޔައިރު، ހާދިޘާގައި މަރުވި މީހުންގެ ޢަދަދު ވަނީ 70 އަށް ވުރެ މައްޗަށް އަރާފައެވެ. އެތައް ބަޔަކު ވަނީ ޒަޚަމްވެފައެވެ. ހާދިޘާއިން ސަލާމަތް ވި ބައެއް މީހުން މިހާރުވެސް ދަނީ އެމީހުންގެ ތަޖުރިބާތައް ބައިނަލްއަޤުވާމީ މީޑިއާއާއި ހިއްސާ ކުރަމުންނެވެ.

އާންމުންގެ ގިނަ ޢަދަދެއްގެ ބަޔަކު ދިރިއުޅެމުން ދިޔަ އިމާރާތުގައި ރޯވި އަލިފާންގަނޑުގެ ތެރެއިން ސަލާމަތްވި މަލާވީގެ ރައްޔިތެއް ކަމަށް ވާ، ޢުމަރު ފުއާދު ކިޔައިދިން ގޮތުގައި އޭނާގެ ދައްތަ ވަނީ ހާދިޘާގެ ތެރޭގައި ގެއްލިފައެވެ. ފުއާދުގެ ބޮޑުބޭބެ ދަރިއެއް، އިމާރާތުން ބޭރަށް އެއްލާލި ގޮތުގެ ވާހަކަވެސް އޭނާ ވަނީ މީޑިއާއާއި ހިއްސާކޮށްފައެވެ. އެ ކުއްޖާގެ ފުރާނަ ސަލާމަތްވި ކަމެއް ނުވަތަ ނޫން ކަމެއްވެސް އަދި ކަށަވަރެއް ނުވެއެވެ.

މަންޒަރު ދުށް މީހުންގެ ވާހަކަތަކުންވެސް އެތައް ކަމެއް އެނގިގެން ދިޔައެވެ. މަންޒަރު ދުށް އެކަކު ކިޔައިދިން ގޮތުގައި އަލިފާނުގެ ހާދިޘާއެއްގެ ވަޤުތުގައި އިމާރާތުން ބޭރަށް ނުކުމެން އޮންނަ މަގު އޮތީ ބަންދުކޮށްފައެވެ. އިމާރާތުގެ ތެރޭގައި ބޯވަމުން ދިޔަ ދުންގަނޑު ޝިކާރައަކަށް ވެގެންވެސް މަރުވި މީހުންގެ ޢަދަދު މަދެއް ނޫނެވެ.

ހާދިޘާ ހިނގި އިމާރާތުގައި ދިރިއުޅެމުން ދިޔަ ގިނަ މީހުންނަނީ ދެކުނު އެފްރިކާއަށް ހިޖުރަކޮށްގެން އުޅޭ މީހުންނެވެ. އެ އިމާރާތަކީ ދެކުނު އެފްރިކާގައި ކިޔާ ގޮތުން ނަމަ 'ހައިޖެކް' ކޮށްފައި ވާ އިމާރާތެކެވެ. މާނައަކީ، އެއީ ގެދޮރު ނެތް މީހުން ބޭނުން ކުރަމުން ދިޔަ އިމާރާތެއް ކަމެވެ. އޯގަސްޓް 31 ވަނަ ދުވަހުގެ ހާދިޘާއަކީ ދެކުނު އެފްރިކާގައި މިއަދު ދިރި ތިބި މީހުންގެ އެންމެ ދުރު ހަނދާނަށް ބަލާއިރުވެސް ހިނގި މިފަދަ އެންމެ ހިތްދަތި ހާދިޘާ ކަމަށް، މުނިސިޕަލް ގަވަމަންޓުން ވަނީ ބުނެފައެވެ.

އެ ހިތްދަތި ހާދިޘާ ހިނގަން މެދުވެރިވި ސަބަބެއް އަދި ކަށަވަރު ވާ ގޮތެއް ނުވެއެވެ. ބައެއް ފަރާތްތަކުން ތުހުމަތު ކުރާ ގޮތުގައި މިއީ ބަޔަކު ގަސްތުގައި ރޯކުރި އަލިފާނެކެވެ. މިއާއެކު ބުރާސްފަތި ދުވަހު ޤައުމާ މުޚާޠަބު ކުރައްވާ ވާހަކަފުޅުދައްކަވަމުން، ދެކުނު އެފްރިކާގެ ރައީސް ސިރީލް ރާމަފޯޒާ ވަނީ، މިފަދަ އިތުރު ހާދިޘާތަކުން އާބާދީތަކާއި ކަމާއި ބެހޭ ފަރާތްތައް ސަލާމަތް ކުރުމަށް، ތަޙުޤީޤުތައް އެހީއަކަށް ވާނެ ކަމަށް ޢުއްމީދު ކުރައްވާ ކަމަށް ވިދާޅުވެފައެވެ.