ދެވަނަ ދައުރެއްގައި އައިއޯއައިޖީ ރާއްޖޭގައި ބާއްވަން މަސައްކަތް ކުރާނަން: ރައީސް ސާލިހު

ދެ ވަނަ ދައުރެއްގައި، އިންޑިއަން އޯޝަން އައިލެންޑް ގޭމްސް (އައިއޯއައިޖީ)ރާއްޖޭގައި ބާއްވަން މަސައްކަތް ކުރައްވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.

ރައީސް މިހެން ވިދާޅުވީ ހޮނިހިރު ދުވަހު ރާއްޖެ ޓީވީގެ ފަށާއިރު ޕްރޮގްރާމްގައި ބައިވެރިވެވަޑައިގެން ވާހަކަފުޅުދައްކަވަމުންނެވެ. ރައީސް ވިދާޅުވީ، މިދައުރުގެ ތެރޭގައި އައިއޯއައިޖީ ރާއްޖޭގައި ބޭއްވުމަކީ އެމަނިކުފާނު ވަރަށް ބޮޑަށް ކުރައްވަން ބޭނުންފުޅުވި ކަމެއް ކަމަށެވެ. އެހެން ނަމަވެސް، ކޮވިޑް-19ގެ ބަލި މަޑުކަމުގެ ސަބަބުން އެ މަަސައްކަތް ފުރިހަމަ ނުކުރެއްވުނު ކަމަށެވެ. އިތުރަށް ރައީސް ވިދާޅުވީ ދެވަނަ ދައުރެއްގައި އަލުން އެ ގޭމްސް ރާއްޖޭގައި ބޭއްވުމަށް މަސައްކަތް ކުރައްވާނެ ކަމަށާއި، މިހާރުވެސް އެކަމަށް ބޭނުންވާ ތަމްރީނުތައް އެތުލީޓުންނަށް ހޯއްދަވައިދެއްވަމުން ދާކަމަށެވެ. މީގެ އިތުރުން ރައީސް ވިދާޅުވީ ތަފާތު ކުޅިވަރުތައް ކުޅެމުން އަންނަ ޒުވާނުންނަށް ވެސް އެންމެ އެކަށީގެންވާ ފުރުސަތު ދެވަނަ ދައުރެއްގައި ހޯއްދަވައިދެއްވާނެ ކަމަށެވެ.

މީގެ ކުރިން 2019 ވަނަ އަހަރު މޮރިޝަސްގައި އޮތް އައިއޯއައިޖީގައި ރާއްޖެއިން ވަނީ މިއަހަރުގެ ގޭމްސް ބޭއްވުމަށް ބިޑުކޮށްފައެވެ. މެޖޯރިޓީ ގައުމުތަކުގެ ތާއީދާއެކު ރާއްޖެއިން ވަނީ އެ ބިޑު ކާމިޔާބުކޮށްފައެވެ. އެއަށްފަހު ރާއްޖޭގައި ގޭމްސް ބޭއްވުމުގެ ތައްޔާރީތައް ވަމުން އަންނަނިކޮށް، ކޮވިޑުގެ ބަލިމަޑުކަމުގެ ސަބަބުން އެ މަސައްކަތް ހުއްޓުމަކަށް އައިސް، ރާއްޖެއަށް ޖެހުނީ އެ ފުރުސަތު ދޫކޮށްލުމަށެވެ. ރާއްޖެއިން އެ ފުރުސަތު ދޫކޮށްލުމުން، ގޭމްސް ބާއްވާނެ ގައުމަކަށް ހަމަޖެއްސީ މަޑަގަސްކަރައެވެ.

ރާއްޖެއިން ވަނީ 2019 ވަނަ އަހަރު އޮތް ގޭމްސްގައި 15 މެޑަަލް ހޯދާފައެވެ. އެއަށްފަހު މިއަހަރުގެ ގޭމްސްއަށް ރާއްޖެއިން ވަނީ އެއަށްވުރެ ބޮޑު ކާމިޔާބީއެއް ހޯދުމަށް އަމާޒު ހިފައިގެން މަސައްކަތް ކޮށްފައެވެ. ސަރުކާރުން ވަނީ ދިވެހި އެތުލީޓުންނަށް ގިނަ ތަމްރީނުތަކުގެ ފުރުސަތުތައް ހޯއްދަވައި ދެއްވާފައެވެ. ނަތީޖާއެއްގެ ގޮތުން މިހާރު މަޑަގަސްކަރައިގައި ކުރިއަށްދާ ގޭމްސްގައި ރާއްޖެއިން ދަނީ ރަނގަޅު ނަތީޖާތަކެއް ނެރެމުންނެވެ. އެގޮތުން ގޭމްސްގެ މިހާތަނަށް ރާއްޖެއިން ވަނީ 26 މެޑަލް ޔަގީންކޮށްފައެވެ.

މީގެ އިތުރުން ރައީސް ސާލިހުގެ ސަރުކާރުގައި ވަނީ ފުރަތަމަ ފަހަރަށް ޕެރަ އެތުލެޓިކްސްއަށް ޚާއްސަ އެސޯސިއޭޝަނެއް އުފައްދަވައި، މުބާރާތްތަކުގައި ބައިވެރިވުމުގެ ފުރުސަތު އެތުލީޓުންނަށް ހޯއްދަވައިދެއްވާފައެވެ. އެކަމުގެ ނަތީޖާއެއްގެ ގޮތުގައި އެ ކުޅިވަރުންވެސް އެތުލީޓުން އަންނަނީ ބައިނަލްއަގުވާމީ މުބާރާތްތަކުން މެޑަލް ހޯދަމުންނެވެ.

ސަރުކާރުން އަންނަނީ މާލެއާއި އަތޮޅު ތެރޭގެ އެކި ކަންކޮޅު ތަކުގައި ކުޅިވަރުގެ ވަސީލަތްތައް ވެސް ގާއިމުކުރަމުންނެވެ. މީގެ އިތުރުން މިހާތަނަށް ރާއްޖޭގައި ނުބާއްވާ މިންވަރަށް ބައިނަލްއަގުވާމީ މުބާރާތްތައް ވެސް މި ދައުރުގައި ވަނީ ބާއްވާފައެވެ.