ކޯލޯ، މުއާނީ ޕީއެސްޖީއަށް ސޮއިކޮށްފި

އެއިންޓްރަކްޓް ފްރެންކްފާޓަށް ކުޅެމުން އައި ފްރާންސްގެ ޒުވާން ފޯވާޑް ރަންޑަލް ކޯލޯ މުއާނީ އެ ކުލަބު ދޫކޮށް ޕެރިސް ސެއިންޓް ޖާމަން (ޕީއެސްޖީ)އަށް ސޮއިކޮށްފިއެވެ.

އުމުރުން 24 އަަހަރުގެ ކުޅުންތެރިޔާ ޕީއެސްޖީއަށް ސޮއިކުރިކަން އެ ކުލަބު ވަނީ ރަސްމީކޮށް އިއުލާންކޮށްފައެވެ. ކޯލޯ މުއާނީ ޕީއެސްޖީއަށް ބަދަލުވީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން 2028 ވަނަ އަހަރުގެ ޖޫން މަހުގެ ނިޔަލަށް އޭނާ އެ ކުލަބުގައި މަޑުކުރާނެއެވެ. މުއާނީ ހޯދުމަށް ޕީއެސްޖީން ވަނީ 90 މިލިއަން ޔޫރޯ ޚަރަދުކޮށްފައެވެ. ޕީއެސްޖީން މުއާނީ ހޯދީ އެ ކުލަބަށް ކުޅެމުން އައި ބްރެޒިލްގެ ފޯވާޑް ނޭމާ ޖޫނިއާ ކުލަބު ދޫކޮށްލުމާއެކުއެވެ. މީގެ ކުރިން ބައެއް އެހެން ކުލަބުތަކުންވެސް ވަނީ މުއާނީ ހޯދުމުގެ ޝައުގުވެރިކަން ފާޅުކޮށް، އެ މަސައްކަތް ކޮށްފައެވެ. ނަމަވެސް ފްރެންކްފާޓު އަދި މުއާނީވެސް އޭރު ކުލަބު ދޫކޮށްލަން ބޭނުންނުވީއެވެ.

މުއާނީ ފްރެންކްފާޓަށް ބަދަލުވީ މިދިޔަ އަހަރުގެ މާޗު މަހުގެ ތެރޭގައެވެ. މުއާނީ ފްރެންކްފާޓާއެކު ސޮއިކޮށްފައި އޮތް ފަސް އަހަރު ދުވަހުގެ އެއްބަސްވުން ހަމަވާން އޮތީ 2027 ވަނަ އަހަރުގެ ޖޫން މަހުގެ ނިޔަލަށެވެ. އޭގެ ފަހުން އޭނާ ވަނީ އެ ކުލަބަށް ކުޅެދިން 50 މެޗުގައި 26 ލަނޑު ޖަހާފައެވެ. ޒުވާން ކުޅުންތެރިޔާ ވަނީ އެ ކުލަބުގައި މޮޅު ކުޅުމެއްވެސް ދައްކާފައެވެ. އެ ޓީމާއެކު އޭނާ ވަނީ ޖަރުމަނު ކަޕްގެ ފައިނަލްގައި ކުޅެފައެވެ. މުއާނީ އަންނަނީ މިދިޔަ އަހަރުން ފެށިގެން ފްރާންސް ގައުމީ ޓީމަށްވެސް ކުޅެމުންނެވެ.