ޔާމީނަށް ހުކުމްކުރި ދުވަހު މުއިއްޒު ހިތުގެ އަޑިން ކިޔާލަ ކިޔާލާ އޮތީ ޔާމީނު ޖަލުގައި ލައްވާންދޭވެ - އިމްރާން

އެމްއެމްޕީއާރުސީ ހިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީނަށް ހުކުމްކުރި ދުވަހު މާލެ ސިޓީގެ މޭޔަރު ޑރ. މުހައްމަދު މުއިއްޒު ހިތުގެ އަޑިން ކިޔާލަ ކިޔާލާ އޮތީ ޔާމީނު ޖަލުގައި ލައްވާންދޭވެ ކަމަށް ހޯމް މިނިސްޓަރ އަދި އަދާލަތު ޕާޓީގެ ރައީސް އިމްރާން އަބްދުﷲ ވިދާޅުވެއްޖެއެވެ.

އުފާވެރި މާލެ ޖަލްސާފައި ވާހަކަދައްކަވަމުން ހޯމް މިނިސްޓަރ، އަދި އަދާލަތު ޕާޓީގެ ރައީސް އިމްރާން އަބްދުﷲ ވިދާޅުވީ މުއިއްޒުގެ ސިޔާސީ ވަރަ ފެޅީ އަދާލަތު ޕާޓީގެ ހާލީގައި ކައިބޮއިގެން ކަމަށެވެ. އެދުވަސްވަރުގެ ގޮތުން ކުރަން ޖެހުނު ކަންކަން ކުރައްވަމުން ގެންދެވިއިރު މުއިއްޒު ހުންނެވި ކޮންމެކަމަކާވެސް ދެކޮޅަށް ކަމަށާއި، އެކަމަށް އަދާލަތުޕާޓީގެ މެންބަރުން ހެކިވާނެ ކަމަށެވެ. އަދި ވެރިކަން ބަދަލުވެގެން މަގާމުތައް ބަހަން ޖެހުނު ވަގުތުގައި ކުޑަކުއްޖަކު މަންމަ ކައިރީގައި އައިސް ރޯހެން މިނިސްޓަރުގެ އަރިހުގައި ވަޒީފާއަށް އައިސް މުއިއްޒު ރުއިކަމަށެވެ.

މިނިސްޓަރ ވިދާޅުވީ މުއިއްޒުއަށް ވަޒީފާ ދިނީ މަންމަގެ ލަނގޮޑިއަށް ކެތްނުވާފަދައިން އޭނާގެ ލަގޮނޑިއަށް ކެތްނުވެގެން ކަމަށެވެ. މަގާމު ދީފަ ދުވަސްކޮޅެއް ނުވެ ޔާމީންގެ ވެރިކަން އައި ހިސާބުން، ހައުސިންގ މިނިސްޓަރުކަން ދިނީ އެމްޑީއޭއަށް ކަމަށާއި، ސިޔާމު ކައިރިއަށް ގޮސް ދޮރުކައިރީގައި ގޮނޑިއަޅައިގެން އިނދެ އާދޭސްކުރީ މަގާމުދޭތޯ ކަމަށާއި، އެކަން ސިޔާމަށް ވެސް އެނގިވަޑައިގަންނަވާނެ ކަމަށެވެ.

ސިޔާމުގެ ލަނގޮޑިއަށް ކެތްނުވެގެން މަގާމު ދިން ކަމަށާއި، އަދާލަތު ދޫކޮށްލާފައި ދިޔަ އިރުގައި ދޮންކަޅުވެސް އަންގާ ނުލާ ކަމަށެވެ. ސިޔާމް ވަރަށް ހެޔޮކޮށް ކަންކޮށްދެއްވި ކަމަށާއި، ކަން އެހެން އޮއްވާ ޔާމީންގެ ޕާޓީން ބޮޑު މަގާމެއް މުއިއްޒު ބޭނުންވި ކަމަށެވެ. ސިޔާމް ހޭލި އިރު ދެން ފެނުނީ މުއިއްޒު ޕީޕީއެމަށް ސޮއިކުރި ވާހަކަ ކަމަށާއި، މިފަދަ ގޮތަކަށް ގޮސް ދައުރު ނިންމާލިކަމަށެވެ.

މިނިސްޓަރ ވިދާޅުވީ މުއިއްޒު ވެރިކަމަށް ހޮވިވަޑައިގެންފިނަމަ ޔާމީން އޮންނާނީ ޖަލުގައި ކަމަށެވެ.

އުފާވެރި މާލެ ޖަލްސާފައި ވާހަކަދައްކަވަމުން ހޯމް މިނިސްޓަރ، އަދި އަދާލަތު ޕާޓީގެ ރައީސް އިމްރާން އަބްދުﷲ ވިދާޅުވީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް އެއްބުރުން ހޮވަން ބޭނުންވަނީ ގައުމު ނުހުއްޓި ކުރިއަށްދާން ބޭނުންވާތީ ކަމަށެވެ. މިނިސްޓަރ ވިދާޅުވީ ގައުމުގައި އޮތް މަސްލަހަތާއި ހަމަޖެހުމާއި ސުލްހަކަން ދެމިއޮތުމަށް ބޭނުންވާތީ ރައީސް ޞާލިހް އެއްބުރުން ހޮވަންޖެހޭ ކަމަށެވެ.

މިނިސްޓަރ ވިދާޅުވީ މާޒީވެދިޔަ އަނިޔާވެރިކަމާއި ބިރުވެރިކަމާއި ނާމާންކަމުގެ ކަޅު އަނދިރި ދުވަސްތައް އަނބުރާ މި ރާއްޖެއަށް އަންނަން ހިތް ނޭދޭތީ ކަމަށެވެ. މިނިސްޓަރ ވިދާޅުވީ ޖަލުތަކުގައި އަނިޔާކޮށް މީހުން މެރި ދުވަސްތައް މާޒީގެ ސަފްހާތަކުގެ ތެރެއަށް ވަދެ ގެއްލި ހަނދާން ނެތޭހާ ދުވަސް ނުވާ ކަމަށެވެ.

މިނިސްޓަރ ވިދާޅުވީ މި ސަބަބުތަކަށްޓަކައި އެދުވަސްތައް އިއާދަވާކަށް ބޭނުން ނުވާ ކަމަށެވެ. ރައީސް މައުމޫނާއި، ރައީސް ނަޝީދާއި، ގާސިމް އިބްރާހިމާއި ހުރހާ ބޭފުޅުން ތިބީ ޖަލުގައި ކަމަށެވެ. ޖަލުގައި އެންމެންތިއްބާ ދެވަނަ ސަފު ގޮވައިގެން ރައީސް ޞާލިހު ނުކުމެވަޑައިގަތީ ޖަރީރާއްޖެއެއް ހޯދަން ކަމަށާއި، އެންމެންގެ މަސައްކަތުން ޖަޒީރާ ރާއްޖެ ލިބިއްޖެ ކަމަށެވެ.

މިނިސްޓަރ ވިދާޅުވީ މިއަދު މިތިބީ ވަރަށް ޝާމިލް މެނިފެސްޓޯއަކާއެކީގައި ކަމަށެވެ. މިއަދު ރައީސް ޞާލިހް ޒުވާނުންނަށްޓަކައި ގައުމު ބިނާކުރުމަށްޓަކައި ކުރައްވާ މަސައްކަތަށްޓަކައި އެއްބުރުން ރައީސް ޞާލިހް ހޮއްވަވަން ޖެހޭ ކަމަށެވެ.