މެންޗެސްޓަރ ސިޓީއަށް ކުޅެމުން އައި އިންގްލެންޑް 21 އަހަރުން ދަށުގެ ގައިމީ ޓީމުގެ ކޯލް ޕާމާ، 40 މިލިއަން ޕައުންޑަށް ޗެލްސީއަށް ސޮއިކޮށްފިއެވެ.

އުމުރުން 21 އަހަރުގެ ކުޅުންތެރިޔާ ޗެލްސީ އާއެކު ސޮއިކުރީ ހަތް އަހަރު ދުވަހުގެ އެއްބަސްވުމެއްގައެވެ. މި އެއްބަސްވުމުގެ ދަށުން އެޑް-އޮންގެ ގޮތުގައި އިތުރު 2.5 މިލިއަން ޕައުންޑް ލިބޭއިރު، އިތުރު އެއް އަހަރަށް އެއްބަސްވުން އައު ކުރުމުގެ ފުރުސަތު ޗެލްސީއަށް ލިބޭނެއެވެ.

ސިޓީގެ އެކަޑެމީ އިން ކުޅެން ފެށި ޕާމާ އަކީ މިއަހަރު 21 އަހަރުން ދަށުގެ ޔޫރޯ މުބާރަތް ކާމިޔާބުކުރި އިންގްލެންޑް ޓީމުގެ ކުޅުންތެރިއެކެވެ. ޕާމާ ބުނީ ޗެލްސީން މިހާރު ފަށާފައިވާ ޕްރޮޖެކްޓް އޭނާ އަށް ވަރަށް ކަމުދާ ކަމަށެވެ. އަދި ޗެލްސީގެ ޓީމަކީ ގިނަ ޒުވާން ކުޅުންތެރިންތަކެއް ހިމެނޭ ޓީމެއްް ކަމަށެވެ.

ވެސްޓް ހޭމް އިންވެސް ވަނީ ލޯނު އެއްބަސްވުމެއްގެ ދަށުން ޕާމާ ހޯދުމުގެ މަސައްކަތް ކޮށްފައެވެ. ނަމަވެސް، ސިޓީގެ ކޯޗު ޕެޕް ގާޑިއޯލާ ބުނެފައިވަނީ ލޯނު އުސޫލުން ޕާމާ ނުފޮނުވާނެ ކަމަށެވެ.

ޗެލްސީގެ ކޯ ސްޕޯޓިން ޑައިރެކްޓަރު ލޮރެންސް ސްޓެވާޓް އާއި ޕައުލް ވިންސްޓަންލީ ބުނީ ޕާމާ ޗެލްސީ އާ ގުޅުނީ ޕްރިމިއަރ ލީގާއި ޗެމްޕިއަންސް ލީގު ކާމިޔާބުކުރުމުގެ ތަޖުރިބާ އާއެކު ކަމަށެވެ. އަދި 21 އަހަރުން ދަށުގެ ޔޫރޯ މުބާރާތުގައި އޭނާގެ ހުނަރު ފެނުނު ކަމަށް ބުންޏެވެ.

ޔުއެފާ ސުޕަ ކަޕްގައި ސެވިއްޔާ ކައިރިން މޮޅުވި މެޗުގައާއި ކޮމިޔުނިޓީ ޝީލްޑް މެޗުގައި އާސެނަލް އާ ދެކޮޅަށް ޕާމާ ވަނީ ލަނޑު ޖަހާފައެވެ.