މޯލްޑިވިއަނުން ޓިކެޓުތަކުގެ އަގު ބޮޑުކޮށްފި
ކާޑެއްދޫއަށް 180 ރުފިޔާ އަދި އެހެން ޑޮމެސްޓިކް އެއަރޕޯޓުތަކަށް 70 ރުފިޔާ ވަނީ ބޮޑުކޮށްފައި
މޯލްޑިވިއަންގެ ފްލީޓަށް އިތުރުކުރި ދެ ބޯޓު
ގައުމީ އެއަރލައިން، މޯލްޑިވިއަނުން އެތެރޭގެ އުދުންހުންތަކުގެ އަގު ބޮޑުކޮށްފިއެވެ.
އައިލެންޑް އޭވިއޭޝަންގެ މާކެޓިންގ އެންޑް ޕީއާރް އެގްޒެކެޓިވް އަހުމަދު މުޝްއިލް ސޮބާހު "ރާއްޖެ އެމްވީ"އަށް ވިދާޅުވީ، އަގުތައް ބޮޑުކުރަން ޖެހުނީ ރީޖަނަލް އެއަރޕޯޓްސް ކޮމްޕެނީއާއި ވިލާ އެއަރއިން އެއަރޕޯޓް ހޭންޑްލިންގ ޗާޖްތައް ބޮޑުކުރުމުން ކަމަށެވެ. އެގޮތުން މިދިޔަ ޖެނުއަރީ މަހުން ފެށިގެން ވިލާއިން ކާޑެއްދޫ އެއަރޕޯޓުގެ ޗާޖް ވަރަށް ބޮޑުތަން ބޮޑުކޮށްފައިވާކަމަށާއި، ރީޖަނަލް އެއަރޕޯޓްސްއިން ވެސް މި މާޗު މަހުން ފެށިގެން ބޮޑު ކުރަން ނިންމާފައިވާ ކަމަށް އޭނާ ވިދާޅުވިއެވެ.
މުޝްއިލް ވިދާޅުވިގޮތުގައި ކާޑެއްދޫ އެއަރޕޯޓަށް އެ އެއަރލައިނުން ކުރާ ދަތުރުތަކުގައި ޓިކެޓުން ވަނީ 180 ރުފިޔާ ބޮޑުކޮށްފައެވެ. އަދި އެހެނިހެން ޑޮމެސްޓިކް އެއަރޕޯޓުތަކަށް ކުރާ ދަތުރުތަކުގެ ޓިކެޓުތަކުން ބޮޑު ކުރީ 70 ރުފިޔާއެވެ.
މޯލްޑިވިއަންއިން އަގުތަކަށް ގެނައި މި ބަދަލާއެކު ކާޑެއްދޫއިން މާލެއަށް މިހާރު ޓިކެޓެއްގެ އަގު ވަނީ 1،693 ރުފިޔާއަށް އުފުލިފައެވެ. މީގެ ކުރިން އަގު ހުރީ 1،513 ރުފިޔާގައެވެ.
މިދިޔަ އަހަރުވެސް މޯލްޑިވިއަނުން ވަނީ ޓިކެޓުތަކުގެ އަގު ބޮޑުކޮށްފައެވެ. އެ ކުންފުނިން އެފަހަރު ޓިކެޓް އަގު ބޮޑުކުރީ ފިޔުލް ސަރޗާޖް ބޮޑުވުމުގެ ސަބަބުންނެވެ.
މުޝްއިލް ވިދާޅުވިގޮތުގައި މިފަހަރުވެސް ޓިކެޓުގެ އަގުބޮޑުކުރިއިރު ވީހާވެސް ކުޑަ އަދަދެއް ކަނޑައެޅުމަށް ވިސްނާފައިވާނެއެވެ.
