އެމްޑީޕީއާއެކު އެމްޑީއޭއިން ކޯލިޝަން ހެދީ ޖަޒީރާވަންތަކޮށް ރާއްޖެ ތަރައްޤީކުރަން އެހެން ބަޔަކަށް ނޭންގޭތީ: ސާލިމް

އެމްޑީޕީއާއެކު އެމްޑީއޭއިން ކޯލިޝަން ހެދުމުގެ މައިގަނޑު އެއް ސަބަބަކީ ޖަޒީރާ ވަންތަކޮށް ރާއްޖެ ތަރައްޤީކޮށްދޭން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ނޫން ވެރިއަކަށް ނޭންގުންކަމަށް އެމްޑީޕީއާއެކު ކޯލިޝަން ހަދާފައިވާ އެމްޑީއޭގެ ކައުންސިލު މެންބަރު ހުސައިން ސާލިމް މުހައްމަދު ވިދާޅުވެއްޖެއެވެ.

އެމްޑީޕީ އާއި ގުޅިފައިވާ ޕާޓީތަކުން ބުދަ ދުވަހުގެ ރޭ ސޯސަން ޖަގަހަ ކުރިމަތީގައި ކުރިޔަށްގެންދިޔަ ކަންމަތީ ޖަލްސާގައި ވާހަކަދައްކަވަމުން ސާލިމް ވިދާޅުވީ އެމްޑީއޭއިން ވަނީ މީގެކުރިންވެސް އެހެން ޕާޓީއަކާއެކު ކޯލިޝަން ހަދައިގެން ރައްޔިތުންނަށް ތަރައްޤީ ހޯދައިދިނުމަށް މަސައްކަތްކޮށްފައިކަމަށެވެ. ނަމަވެސް ރާއްޖޭގެ ރައްޔިތުންނަށް ތަރައްޤީ ހޯދައިދޭން ކުރި މަސައްކަތުގައި ޖެހުނީ ފަހަތަށް ޖެހެންކަމަށް ސާލިމް ވިދާޅުވިއެވެ.

ފަހަތަށް ޖެހި ރައީސް ޞާލިހާއެކު ކުރިޔަށްދާން އެމްޑީއޭއިން ބޭނުންވީ ރައްޔިތުންގެ ދިރިއުޅުން މިހާބޮޑަށް ތަނަވަސްކޮށްދިން ވެރިއެއް ރައީސް ޞާލިހު ނޫނީ ނެތީމަކަމަށް ސާލިމް ވިދާޅުވިއެވެ. ރައްޔިތުންނަށް މިހާބޮޑަށް ޚިދުމަތްކޮށްދިން ވެރިއެއް ރައީސް ޞާލިހު ނޫނީ ނެތްކަމަށާއި ދެވަނަ ދައުރެއް ރައީސަށް ދޭންޖެހެނީވެސް އެސަބަބަށްޓަކައި ކަމަށް ސާލިމް ވިދާޅުވިއެވެ.

މީގެއިތުރުން މީގެ ފަސް އަހަރު ކުރީގެ ހަނދާންތައް މިއަދު އައުކޮށްލަންޖެހޭކަމަށް ސާލިމް ވިދާޅުވިއެވެ.

ސާލިމް ވިދާޅުވީ މީގެ ފަސް އަހަރުކުރިން ކަންކަން ވެފައިވާ ގޮތް ހަނދާން ނައްތާލައިގެން ނުވާނެކަމަށެވެ. އަދި ސެޕްޓެމްބަރު މަހުގެ 30 ވަނަ ދުވަހު އޮންނަ ދެވަނަ ބުރެއްގައި އެންމެންގޮސް ވޯޓުލާން ޖެހޭކަމަށާއި އެކަމަށް ފަރުވާކުޑަކޮށްގެންނުވާނެކަމަށް ސާލިމް ވިދާޅުވިއެވެ.