ދިމާވާ ކުޑަކުޑަ މައްސަލައެއްގައި ތާއަބަދު ތިބުމަކީ ގައުމަށް އެންމެ ފައިދާ ހުރި ގޮތް ނޫން
ތޮއްޑޫ ދާއިރާގެ އެމްޑީޕީ މެންބަރު ހަސަން ޝިޔާން
އެކި ސަބަބުތަކާހުރެ އެމްޑީޕީއާ ދުރަށް ޖެހިފައިވާ ފަރާތްތަކުން އަލުން އެމްޑީޕީއާ ގުޅުމަށް ރައްޔިތުންގެ މަޖިލީހުގެ ތޮއްޑޫ ދާއިރާގެ މެންބަރު ހަސަން ޝިޔާން ގޮވާލައްވައިފިއެވެ.
އެމްޑީޕީ އާއި ގުޅިފައިވާ ޕާޓީތަކުން ބުދަ ދުވަހުގެ ރޭ ސޯސަން ޖަގަހަ ކުރިމަތީގައި ކުރިޔަށްގެންދިޔަ ކަންމަތީ ޖަލްސާގައި ވާހަކަފުޅުދައްކަވަމުން އެމްޑީޕީން ވަކިވެ ޑިމޮކްރަޓްސްގެ ނަމުގައި ސިޔާސީ ޕާޓީ ހިންގަމުން އަންނަ ފަރާތްތަކަށް ޝިޔާން ވިދާޅުވީ އިންތިޚާބުގެ ފުރަތަމަ ބުރު ނިމިފައިވާކަމަށެވެ. ޑިމޮކްރަޓްސްއަކީ ވެސް އެމްޑީޕީގެ ފަރާތްތައްކަމަށާއި ދިމާވާ ކުޑަކުޑަ މައްސަލައެއްގައި ތާއަބަދު ތިބުމަކީ ގައުމަށް އެންމެ ފައިދާ ހުރި ގޮތް ނޫންކަމަށެވެ.
ޝިޔާން ވިދާޅުވީ 2018 ވަނަ އަހަރުގެ ކުރިން ރައްޔިތުން އުޅެންޖެހުނު ގޮތް ވިސްނާލަންޖެހޭކަމަށެވެ. އަދި 2012 ވަނަ އަހަރު އެމްޑީޕީގެ ފުރަތަމަ ސަރުކާރު ވައްޓާލުމަށްފަހު އޭރުގެ ހައުސިންގ މިނިސްޓަރަކަށް ހުންނެވި ޑރ މުހައްމަދު މުއިއްޒު މިނިސްޓަރުކަމުގައި ހުންނަވާ މާލެ އާއި އަތޮޅުތަކުގެ ރައްޔިތުންނަށް ދިން އަނިޔާ ހަނދާންކޮށްލަންޖެހޭކަމަށެވެ. ޚާއްސަކޮށް ބޯހިޔާވަހިކަމަށް އެމްޑީޕީގެ ސަރުކާރުން އޭރު އަޅަމުންދިޔަ ހުރިހާ ފްލެޓްތައް ހައްގުވެރިންގެ އަތުން އަތުލީކަމަށް ޝިޔާން ވިދާޅުވިއެވެ.
މުއިއްޒަކީ އޭރު ވަޒީރެއްކަމަށާއި އެހެންކަމުން ރައީސްކަމަށް މުއިއްޒު ވަޑައިގެންފިނަމަ އެ އަނިޔާވެރިކަން މާބޮޑުވާނެކަމަށް ޝިޔާން ވިދާޅުވިއެވެ.
