އެކަށީގެންވާ ވަގުތު ލިބިއްޖެނަމަ، މަންޗިނީ އަށް އޮތީ ކާމިޔާބު މަސައްކަތެއް ކުރެވޭނެ ކަމުގެ ޔަގީންކަން

އެކަށީގެންވާ ވަގުތު ލިބިއްޖެ ނަމަ، ކާމިޔާބު މަސައްކަތެއް ކުރެވޭނެ ކަމުގެ ޔަގީންކަން އޮތް ކަމަށް ސައުދީ އަރަބިޔާގެ ޤައުމީ ޓީމާ ހަވާލުވި އިޓަލީގެ ރޮބާޓޯ މަންޗިނީ ބުނެފި އެވެ.

އޭނާ މިހެން ބުނީ ސައުދީ ޤައުމީ ޓީމުގެ ކޯޗުކަމާ ހަވާލުވުމަށްފަހު، ފުރަތަމަ ފަހަރަށް މީޑިއާތަކާ ވާހަކަ ދައްކަމުންނެވެ. އޭނާ ބުނީ ސައުދީގެ ޤައުމީ ޓީމުގެ ކޯޗަކަށް އޭނާ ހަމަޖައްސަން ނިންމުމުން، އެ ޤައުމުގެ ފުޓުބޯޅަ ފެޑެރޭޝަންގެ ރައީސަށް ޚާއްސަ ޝުކުރެއް އަދާ ކުރަން ބޭނުންވާ ކަމަށެވެ. މަންޗިނީ ބުނީ އެއީ ވަރަށް ރަނގަޅު ޒިންމާތަކެއް ކަމަށާއި، އެ ޒިންމާތަކާ ހަވާލުވެވޭތީ ވަރަށް ފަޚުރުވެރިވާ ކަމަށެވެ.

ސައުދީން އެ ޤައުމުގެ ލީގު ވަރުގަދަ ކުރުމަށް ޔޫރަޕުގެ މަޝްހޫރު ކުޅުންތެރިން ގެންނާތީ، އެކަމާ ގުޅޭ ގޮތުން ނޫސްވެރިޔަކު ސުވާލު ކުރުމުން މަންޗިނީ ބުނީ، ކޮންމެ ތަނެއްގައި ވެސް ރަނގަޅު ކުޅުންތެރިން ތިބެން ބޭނުންވާ ނަމަ ރަނގަޅު މުސާރަ ދޭން ޖެހޭނެ ކަމަށެވެ. އެގޮތަށް ބަލާއިރު، ސައުދީ އަށް މިހާރު ބޭނުންވަނީ މަތީ ފަންތީގެ މޮޅު ކުޅުންތެރިން ކަމަށް އޭނާ ވަނީ ބުނެފަ އެވެ. އޭނާ ބުނީ ސައުދީގައި ވެސް ތިބީ ހުނަރުވެރި ކުޅުންތެރިން ކަމަށާއި، އެ ކުޅުންތެރިން އިތުރަށް ކުރިއަރައިގެން ދާނީ މޮޅެތި އެހެން ކުޅުންތެރިންނާ އެއް ފެންވަރެއްގައި ކުޅެގެން ކަމަށެވެ.

ސައުދީ ޤައުމީ ޓީމާއެކު މަންޗިނީގެ އެންމެ ފުރަތަމަ އަމާޒަކީ އޭޝިއަން ކަޕް ކާމިޔާބު ކުރުމެވެ. އެކަމަށް މަސައްކަތް ކުރުމަށް ބާކީ އޮތީ ހަތަރު ވަރަކަށް މަސް ދުވަސް ކަމަށާއި، އޭގެ ކުރިން ރަނގަޅު ޓީމެއް ތައްޔާރުކުރަން އިސްކަން ދޭނެ ކަމަށް އޭނާ ބުންޏެވެ. މަންޗިނީ ބުނީ އޭޝިއަން ކަޕްގެ ކުރިން ރަޙުމަތްތެރިކަމުގެ ހަތަރު މެޗު ކުޅެން ޖެހޭ ކަމަށާއި، އެއަށްފަހު ފީފާ ވޯލްޑް ކަޕްގެ ކޮލިފައިން ދެ މެޗެއް ކުޅެން ޖެހޭ ކަމަށެވެ. އެ ހަ މެޗަށްފަހު އޭޝިއަން ކަަޕަށް ތައްޔާރުވާން ލިބޭނީ ގާތްގަނޑަކަށް 20 ދުވަސް ކަމަށް އޭނާ ވަނީ ފާހަގަކޮށްފަ އެވެ. އޭޝިއަން ކަޕްގައި ވަރުގަދަ ޓީމުތަކެއް ވާދަކުރާކަން މަންޗިނީ ފާހަގަ ކުރި އެވެ. އޭގެ ތެރޭގައި ޖަޕާން، އޮސްޓްރޭލިއާ އަދި ކޮރެއާ ހިމެނޭ ކަމަށާއި، ނަމަވެސް ސައުދީން ވެސް މަސައްކަތް ކުރާނީ މޮޅުވާން ކަމަށް މަންޗިނީ ވަނީ ބުނެފަ އެވެ.

މީގެ އިތުރަށް އޭނާ ބުނީ، ކޮންމެ މަސައްކަތެއް ކުރުމަށް ވެސް އެކަށީގެންވާ ވަގުތު ބޭނުންވާނެ ކަމަށެވެ. ލިބޭ ވަގުތުގެ ބޭނުން ހިފައިގެން، ރަނގަޅަށް ކުރިއަށް ދެވިއްޖެނަމަ، ސައުދީ ޤައުމީ ޓީމާއެކު ނަތީޖާ ނެރެވޭނެފަދަ ކާމިޔާބު މަސައްކަތެއް ކުރެވޭނެ ކަމަށް މަންޗިނީ ވަނީ ބުނެފަ އެވެ. މިވަގުތަށް އެންމެ ބޮޑު އިސްކަމެއް ދޭން ޖެހެނީ ޓީމުގެ އެޓޭކު ރަނގަޅުކޮށް، ގިނަ ލަނޑު ޖެހުމަށް ކަމަށް އޭނާ ވަނީ ފާހަގަކޮށްފަ އެވެ.

އުމުރުން 58 އަހަރުގެ މަންޗިނީ އެންމެ ފަހުން ހުރީ އިޓަލީ ޤައުމީ ޓީމުގެ ކޯޗުގެ މަގާމުގަ އެވެ. ނަމަވެސް މި ހިނގާ އޯގަސްޓު މަހުގެ 13 ވަަނަ ދުވަހު އޭނާ ވަނީ އެ މަގާމުން ދުރަަށް ދާން ނިންމައިފަ އެވެ. އިޓަލީގެ ކޯޗުކަމުން މަންޗިނީ ވަކިވިތާ 14 ދުވަސް ފަހުން، ސައުދީ ޤައުމީ ޓީމާ މަންޗިނީ ހަވާލުވީ 2027 ވަނަ އަހަރުގެ ނިޔަލަށެވެ. މުސާރައިގެ ގޮތުގައި ސައޫދީން މަންޗިނީ އަށް އަހަރަކު 27 މިލިއަން ޑޮލަރު (25 މިލިއަން ޔޫރޫ) ދޭނެ ކަމަށް ވެސް ރިޕޯޓުތައް ބުނެ އެވެ. އޭނާގެ އިރުޝާދުގެ ދަށުން ސައޫދީ ކުޅޭނެ ފުރަތަމަ މެޗަކީ އަންނަ ސެޕްޓެމްބަރު މަހުގެ އަށް ވަނަ ދުވަހު ކޮސްޓަރިކާއާ ދެކޮޅަށް ކުޅޭ މެޗެވެ.