މިއީ މާޒީގައި އިޓަލީން ކުޅުނު ފުޓުބޯޅަ އަލުން ދައްކަން ލިބޭ ފުރުސަތެއް: ރޮބާޓޯ މަންޗިނީ

މިއީ މާޒީގައި އިޓަލީން ކުޅުނު ފުޓުބޯޅަ އަލުން ދައްކަން ލިބޭ ރަނގަޅު ފުރުސަތެއް ކަމަށް އެ ޓީމުގެ ކޯޗު ރޮބާޓޯ މަންޗިނީ ބުނެފި އެވެ.

މަންޗިނީ މިހެން ބުނީ އަންނަ އަހަރު އޮންނަ ޔޫރޯ ފުޓުބޯޅަ މުބާރާތުގެ ކޮލިފައިންގެ ފުރަތަމަ މެޗުގައި ވާދަވެރި އިންގްލެންޑާ ދެކޮޅަށް ނުކުންނަ މެޗުގެ ކުރިން ވާހަކަ ދައްކަމުންނެވެ. އެ މެޗުގެ ކުރިން މަންޗިނީ ބުނީ، ފާއިތުވި ތަނުގައި އިޓަލީން ފުޓުބޯޅައިގައި ކުރިން ކުރި ކަންކަން އަލުން ކުރުމަށް މަސައްކަތް ކުރަން ޖެހޭ ކަމަށެވެ. އޭނާ ބުނީ އަލުން ދަނޑަށް ނުކުމެ ޖެހޭނީ ވަރަށް މޮޅު ކުޅުމެއް ދައްކަން ކަމަށެވެ. އަދި ރަނގަޅަށް ކުޅެ، ސަޕޯޓަރުންނަށް ހިނިތުންވުމެއް ގެނެސްދޭން މެޗުން މޮޅުވާން ޖެހޭނެ ކަމަށެވެ. މަންޗިނީ ފާހަގަ ކުރި ގޮތުގައި 2020 ވަނަ އަހަރުގެ ޔޫރޯ މުބާރާތުގައި އިޓަލީން ދެއްކި ކުޅުން އަލުން ދައްކަން ޖެހޭނެއެވެ. މާޒީގައި ކޮންމެވެސް ވަރަކަށް ކަންކަން ބަދަލުވި ނަމަވެސް، އެއީ އިޓަލީން ދައްކަމުން އައި ކުޅުން ނުދެއްކެންވީ ސަބަބެއް ނޫން ކަމަށް ވެސް އޭނާ ފާހަގަ ކުރި އެވެ.

އިތުރަށް ވާހަކަ ދައްކަމުން މަންޗިނީ ބުނީ އަބަދުވެސް އިޓަލީ އާއި އިންގްލެންޑު ކުޅޭ މެޗަކީ ވަރަށް ފޯރުގަދަ އަދި ވާދަވެރި މެޗަކަށް ވާނެ ކަމަށެވެ. މިއީ ފާއިތުވި ދެ އަހަރުގެ ތެރޭގައި އިޓަލީން އިންގްލެންޑާ ދެކޮޅަށް ނުކުންނަ ހަތަރު ވަނަ ފަހަރު ކަން ފާހަގަކުރަމުން މަންޗިނީ ބުނީ އިންގްލެންޑަކީ ދުނިޔޭގައި އޮތް އެންމެ މޮޅު އެއް ޓީމު ކަމަށާއި، އެ ޓީމުން ފެންނަނީ ހައްތަހާވެސް ހުނަރުވެރި މޮޅު ކުޅުންތެރިން ކަމަށެވެ. އޭނާ ބުނީ އިންގްލެންޑަށް ދިމާވާ މައްސަލަ އަކީ ނަސީބު ދެރަވުން ކަމަށާއި، އެމީހުންގެ ކުޅުން ދަށް ނޫން ކަމަށެވެ. އޭނާ ވެސް ވަނީ އިންގްލެންޑާ ދެކޮޅަށް ކުޅޭ މެޗަކީ ވަރަށް ވާދަވެރި މެޗަކަށް ވާނެ ކަމަށް ބުނެފަ އެވެ. އިޓަލީގެ ކުޅުމަށް އިޝާރަތްކުރަމުން މަންޗިނީ ބުނީ މެޗު ފަށަން ބޭނުންވަނީ އެމީހުންގެ އަމިއްލަ ގޭމުގައި، އަމިއްލަ ކޮންޓްރޯލްގައި ކަމަށެވެ. އޭނާ ބުނީ ކޮލިފައިން ފަށަން ބޭނުންވަނީ ރަނގަޅަށް ކަމަށާއި، އެކަމަކީ ފަސޭހަކަމަކަށް ނުވާނެ ކަން ވެސް އިނގޭ ކަމަށެވެ.

މީގެ އިތުރުން މަންޗިނީ ބުނީ، އޭނާ މަސައްކަތް ކުރަނީ ފުލުހުންނަށްޓަކައި ނޫން ކަމަށެވެ. އޭނާ ބުނީ އަބަދުވެސް އިޓަލީގެ ނޭޕަލްސްގައި ފުޓުބޯޅަ ކުޅޭ ދަނޑަށް އަންނަ ސަޕޯޓަރުން ދޭތެރެއަކުން ހަމަނުޖެހުމަކާ ދިމާއަށް ދާ ކަމަށެވެ. އެކަން އެންމެ ފަހުން ޔުއެފާ ޗެމްޕިއަންސް ލީގުގައި ނަޕޯލީން ކުޅުނު މެޗުން ފެނުނު ކަމަށް ވެސް އޭނާ ބުންޏެވެ. އެކަމާ ގުޅުވައިގެން މަންޗިނީ ބުނީ، މެޗު ބަލަން އަންނަ ސަޕޯޓަރުން ވެސް އަމަލުކުރަން ވާނީ ރަނގަޅަށް ކަމަށާއި، ދަނޑު ކުރިމަތީގައި ހަމަނުޖެހުން ހިންގަން ނޭދޭ ކަމަށެވެ. އަދި އަބަދުވެސް ވިސްނަންވާނީ ފުޓުބޯޅަ އާއި ފުޓުބޯޅައިގެ ހާލަތަށް ކަމަށެވެ. އޭނާ ވަނީ ކުރިއަަށް އޮތް މެޗުގައި އެކަހަލަ މަންޒަރެއް ނުފެންނާނެ ކަމަށް އުންމީދު ކުރާ ކަމަށް ވެސް ބުނެފަ އެވެ.

މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕަށް އިޓަލީ ކޮލިފައިނުވެ އެވެ. ފަހު ވަގުތު ނޯތު މަސަޑޯނިއާ އަތުން ބަލިވެ އިޓަލީ އަށް ވޯލްޑް ކަޕް ގެއްލުނީ އެވެ. އެއާއެކު މަންޗިނީ އަށް ވަނީ ޕްރެޝަރު ބޮޑުވެފަ އެވެ. ނަމަވެސް މަންޗިނީ ޤަބޫލު ކުރާ ގޮތުގައި އިޓަލީ އަށް ވޯލްްޑް ކަޕް ގެއްލުނީ ކުޅުން ދައްވުމުގެ ސަބަބުންނެއް ނޫނެވެ. އޭނާ ދެކޭ ގޮތުގައި އެއަހަރުގެ ކޮލިފައިންގައި އިޓަލީގެ ނަސީބު ދަށީ އެވެ. މަންޗިނީގެ އަމާޒަކީ އެކަން ފޫބެއްދުމަށްޓަކައި އިޓަލީ އަށް ޔޫރޯ ކާމިޔާބުކޮށްދިނުމެވެ.