އިޓަލީގެ ގައުމީ ފުޓްބޯޅަ ޓީމާއެކު ހަދާފައި އޮތް އެއްބަސްވުން، އެ ޓީމުގެ ކޯޗު ރޮބާޓޯ މަންޗިނީ އާކޮށްފިއެވެ.
އިޓަލީގެ ކޯޗުގެ މަގާމާއި އުމުރުން 56 އަހަރުގެ މަންޗިނީ ހަވާލުވީ 2018 ވަނަ އަހަރުއެވެ. އެފަހަރު އެ މަގާމު ހުސްވީ 1958 ވަނަ އަހަރުގެ ފަހުން ފުރަތަމަ ފަހަރަށް އެ ގައުމަށް ފީފާ ވޯލްޑް ކަޕުގެ ޖާގައެއް ގެއްލުމާ ގުޅިގެން، އޭރު ކޯޗުގެ މަގާމުގައި ހުރި ޖިއަން ޕިއެރޯ ވެންޗޫރާ މަގާމުން ވަކިކުރުމުންނެވެ.
ރިޕޯޓުތައް ބުނާ ގޮތުން މީގެ ކުރިން އިޓަލީގެ ގައުމީ ޓީމާއެކު މަންޗިނީ ހަދާފައި އޮތް އެއްބަސްވުން ހަމަވަން އޮތީ އަންނަ މަހު ފަށާ ޔޫރޯ ފުޓްބޯޅަ މުބާރާތުގެ ނިޔަލަށެވެ. އެކަމަކު ހޯމަ ދުވަހުގެ ވަގުތެއްގައި މަންޗިނީ ވަނީ އެ އެއްބަސްވުން 2026 ވަނަ އަހަރުގެ ޖޫން މަހުގެ ނިޔަލަށް އާކޮށްފައެވެ. އެހެންކަމުން މި އަހަރުގެ ޔޫރޯ އާއި އަންނަ އަހަރުގެ ފީފާ ވޯލްޑް ކަޕުގައިވެސް އިޓަލީއަށް އިރުޝާދުދޭނީ މަންޗިނީއެވެ. އަދި އައު އެއްބަސްވުމާއެކު 2026 ވަނަ އަހަރުގެ ޔޫރޯއަށް އިޓަލީ ޓީމު ތައްޔާރުކުރުމުގެ ޒިންމާވެސް ވަނީ އޭނާއާ ހަވާލުކޮށްފައެވެ.
އަންނަ ޖޫން މަހުގެ 11 ވަނަ ދުވަހުން ފެށިގެން ޖުލައި މަހުގެ 11 ވަނަ ދުވަހުގެ ނިޔަލަށް ޔޫރޯ ބޭއްވުމަށް ތާވަލުކޮށްފައިވާއިރު، އިޓަލީ ހިމެނެނީ ގްރޫޕް އޭގައެވެ. މި ގްރޫޕުގައި ދެން ހިމެނޭ ގައުމުތަކަކީ ތުރުކީ، ވޭލްސް އަދި ސްވިޓްޒަލެންޑެވެ.
އިޓަލީގެ ގައުމީ ޓީމުގެ އެއްބަސްވުން މަންޗިނީ އާކުރިއިރު، މިއީ ގައުމީ ޓީމަކަށް އޭނާ އިރުޝާދު ދެމުން އަންނަ ފުރަތަމަ ފަހަރެވެ. އިޓަލީގެ ކޯޗުގެ މަގާމާ ހަވާލުވުމުގެ ކުރިން މަންޗިނީ އެންމެ ފަހުން ކޯޗުކަން ކޮށްދީފައިވަނީ ޒެނިތަށެވެ. މަންޗިނީގެ ކާމިޔާބު ކެރިއަރުގައި އޭނާ ވަނީ މެންޗެސްޓާ ސިޓީ އާއި، ގަލަތަސަރާއި އަދި އިންޓަ މިލާނާއި، ލާޒިއޯގެ އިތުރުން ފިއޮރެންޓީނާގައި ކާމިޔާބު ދުވަސްތަކެއް ހޭދަކޮށްފައެވެ. އެގޮތުން 2012 ވަނަ އަހަރު ސިޓީއަށް އެ ޓީމުގެ ތާރީޚުގައިވެސް ފުރަތަމަ ފަހަރަށް އިނގިރޭސި ޕްރިމިއާ ލީގު ކާމިޔާބުކޮށްދިން ކޯޗަކީވެސް މަންޗިނީއެވެ. އަދި އޭނާ ވަނީ އިންޓަ މިލާނަށް ޖެހިޖެހިގެން ތިން ފަހަރު އިޓާލިއަން ލީގު ކާމިޔާބުކޮށްދީފައެވެ.
