މެއި މަހުގެ 6 ވަނަ ދުވަހުގެ ރޭ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ހަމަލާގެ ތުހުމަތު ކުރެވޭ ދެމީހެއްގެ މައްޗަށް ކުރާ ދައުވާގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލާގައި ދައުލަތުން ދައުވާކުރަނީ ހއ. މޮޅަދޫ، ބަހާރުގެ، އަބްދުﷲ އަލީ މަނިކާއި، ހއ. ހޯރަފުށި، އަލަނާސިގެ، މުހައްމަދު ތަސްލީމްގެ މައްޗަށެވެ. އެ ދެމީހުންގެ މައްޗަށް އުފުލާފައިވަނީ ޓެރަރިސްޓް ޖަމާއަތަކަށް ތާއީދުކުރުމުގެ ކުށުގެ ދައުވާއެވެ.

އަންގާރަ ދުވަހުގެ އަޑުއެހުމުގައި އޮތީ ދައުލަތުން ހެއްކާބެހޭގޮތުން ވާހަކަ ދެއްކުމާއި ޚުލާސާ ބަޔާން އިއްވުމެވެ.

ދައުލަތުގެ ވަކީލު ވިދާޅުވީ، 2019ގެ ފަހުކޮޅުން ފެށިގެން އައިސިސްގެ ފިކުރު ފެތުރުމަށް އަބްދުﷲ އަލީ މަނިކު އުޅެފައިވާ ކަމަށާއި، ޖަލުގައިވެސް މި ފިކުރަށް މީހުން ރެކްރޫޓު ކުރުމުގައި އޭނާ ހަރަކާތްތެރިވެފައި ވާކަމަށެވެ.

ސިއްރު ހެކިންގެ ބަޔާނާ ހަވާލާދީ ދައުލަތުގެ ވަކީލު ޚުލާސާ ބަޔާނުގައި ވިދާޅުވީ، ހަރުކަށި ފިކުރުގެ މީހުންގެ ތެރޭގައި އޭނާ ފާހަގަވެފައިވަނީ "އަބޫ ސުހާ"ގެ ނަމުން ކަމަށެވެ.

އޭގެ އިތުރުން، ތަސްލީމަކީ ނަޝީދު އަވަހާރަކޮށްލަން ޖެހޭކަމަށް ބުނެ އެ ޝުއޫރު ފާޅުކޮށްފައިވާ މީހެއްކަން ފާހަގަކޮށްފައިވެއެވެ. އެ ހަމަލާ ދިނުމުގައިވެސް ތަސްލީމުގެ މަޝްވަރާއާއި ފިކުރު ހޯދާފައިވާކަން އިންޓެލިޖެންސް ރިޕޯޓުން އެނގޭކަން ދައުލަތުގެ ވަކީލު ފާހަގަކުރެއްވިއެވެ.

އަދި ސުޕްރީމް ކޯޓުގެ ފަނޑިޔާރުންގެ ލޭ ހުއްދަވާނެކަމަށް އޭނާ ބުނެފައިވާކަމަށްވެސް ދައުލަތުގެ ވަކީލު ވިދާޅުވިއެވެ.

އޭގެ އިތުރުން، އައިސިސްގެ ފިކުރު ޕްރޮމޯޓު ކުރުމުގައި އޭނާ ޙަރަކާތްތެރިވެފައިވާކަން ހެކިވެރިންގެ ހެކިބަސްތަކާ ހަވާލާދީ ދައުލަތުން ފާހަގަކޮށްފައިވެއެވެ.

މި މައްސަލާގައި 6 ނޮވެމްބަރު 2022ގައި ބޭއްވި އަޑުއެހުމެއްގައި ދައުލަތުގެ ސިއްރު ހެތްކަކު ވަނީ އޭނާގެ ނަން ހާމަކޮށް، މައްސަލައާގުޅޭ ވާހަކަތަކެއް ދައްކާފައެވެ.

އަޑު ބަދަލުކޮށްގެން ކާކުކަން ނޭނގޭ ގޮތަށް އެ ހެކިވެރިޔާގެ ހެކިބަސް ނަގަން ފެށުމާއެކު، ހެކިވެރިޔާ ވަނީ ތަކުރާރުކޮށް އޭނާގެ ނަން ބުނެ، ދައުވާ ލިބޭ ފަރާތްތަކާއި ދެކޮޅަށް ހެކިބަސް ދިނުމަށް އޭނާއަށް މަޖުބޫރު ކުރަމުންދާކަމަށް ބުނެފައެވެ. އެގޮތުން ހެކިބަސް ދިނުމަށް މަޖުބޫރުކޮށް އޭނާއަށް އަނިޔާކޮށްފައިވާކަމުގެ ތުހުމަތު އޭނާ ވަނީ ކޮށްފައެވެ.

ދައުލަތުގެ ވަކީލު ވިދާޅުވީ، އޭނާއަށް އެއްވެސް މީހެއްގެ މަޖުބޫރުކަމެއް ނެތްކަން ބަޔާނުގެ އިންޓަވިއު ރެކޯޑިންގއިން ފެންނަ ކަމަށާއި، އޭނާ ތަހުގީގަށް ދީފައިވާ ބަޔާން ހެކީގެ ގޮތުގައި ބެލިދާނެކަމަށް ދައުލަތުން ދެކޭކަމަށެވެ.

އެއަށްފަހު ދިފާއުން ވަނީ ހެތްކާބެހޭގޮތުން ވާހަކަދެއްކުމާއި، ޚުލާސާ ބަޔާން އިއްވުން ކުރިއަށް ގެންގޮސްފައެވެ. އެގޮތުން އެ ދެމީހުންވެސް ދައުވާއަށް އިންކާރުކުރާ ކަމަށާއި، އައިސިސް ޕްރޮމޯޓުކޮށް ހަރުކަށި ފިކުރު ފެތުރުމަށް މަސައްކަތްކޮށްފައި ނުވާނެކަމަށް ބުނާކަމަށް ދިފާއީ ވަކީލު ވިދާޅުވިއެވެ.

މައްސަލައިގެ ގިނަ ހެކިވެރިން ހެކިބަސް ދީފައިވަނީ އެމީހުންނަށް ފެނުނު ނުވަތަ އަޑު އިވުނު ކަންކަމަށްވުރެ ބޮޑަށް، އެހެނިގެން ގޮތްގޮތުން އިވިފައިވާ ވާހަކަތަކުގެ މައްޗަށްކަމަށް ދިފާއީ ވަކީލު ވަނީ ބައެއް މިސާލުތަކާއެކު ފާހަގަ ކުރައްވާފައެވެ.