ޝަހީދު ޙުޞައިން ޢާދަމްގެ ބައްފަ ނިޔާވުމާއި ގުޅިގެން، ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިހު އެ އާއިލާ އަށް ތަޢުޒިޔާ ފޮނުއްވައިފިއެވެ.

ރައީސް ވިދާޅުވީ ޝަހީދު ހުސައިން އާދަމް އަކީ ދިވެހިން އެބޭފުޅަކަށްޓަކައި ފަހުރުވެރިވާ ބޭފުޅެއް ކަަމަށެވެ. ޝަހީދު ހުސައިން އާދަމްގެ ބައްޕަ އާދަމް މުޙައްމަދު ނިޔާވި ޚަބަރު އެއްސެވީ ފުން ހިތާމަ އާއި އެކުގައި ކަމަށް ރައީސް ވިދާޅުވިއެވެ. އަދި މަރުޙޫމުގެ ޢާއިލާއަށް ތަޢުޒިޔާ ދަންނަވާ، މަރުޚޫމަށް ސުވަރުގޭގެ ދާއިމީ ނިޢުމަތް ލެއްވުން އެދި ރައީސް ދުޢާ ކުރައްވާފައިވެއެވެ.

ޝަހީދު ހުސައިން އާދަމްގެ ބައްޕަ އާދަމް މުހައްމަދު ނިޔާވެފައި ވަނީ ބަލިވެ އުޅުއްވާތާ ދުވަސްކޮޅަކަށް ފަހުގައެވެ. އޭނާ ނިޔާވީ ހާލު ދެރަވެގެން ހޮސްޕިޓަލްގައި ފަރުވާދެމުން ދަނިކޮށް، ހޯމަ ދުވަހުގެ ވަގުތެއްގައެވެ. އާދަމް މުހައްމަދު ނިޔާވި އިރު ދުނިޔޭގައި ހަ ކުދިން އެބަތިއްބެވެ. އޭގެ ތެރޭގައި ހިމެނެނީ ފަސް އަންހެނުންނާއި ފިރިހެނެކެވެ.

ޝަހީދު ހުސެއިން އާދަމް މިދުނިޔެ ދޫކުރެއްވީ، 1988 ވަނަ އަހަރު ތަމަޅައިގެން ކުލީ ސިފައިންނާއި އެކު ދިވެހިންގެ ބަޔަކު މާލެ އަރާ ދިން އުދުވާނީ ހަމަލާއިން ބަނޑޭރިގެ ދިފާއު ކުރެއްވުމަށް ދުޝްމަނުންނަށް ހަމަލާ ދެއްވަމުން ދަނިކޮށް ވަޒަން ހުސްވެ ދުޝްމަނުންގެ ވަޒަން އަރައިގެންނެވެ. އޭނާވަނީ ފަހުވަގުތާ ޖެހެންދެންވެސް ވަރަށް ހިއްވަރާއެކު ވާޖިބު އަދާކުރެއްވުމުގައި ދެމި ހުންނަވާފައެވެ. މިކަމުގެ އަގު ވަޒަންކޮށް އެކި ސަރުކާރުތަކުން ވަނީ އޭނާގެ އާއިލާއަށް ވެސް ތަފާތު، ޚާއްސަ އިނާޔަތް ތައް ދީފައެވެ. އަދި ފުލުހުންގެ މައިމަރުކަޒަށް ނަންވެސް ދީފައިވަނީ އޭނާގެ ނަމުންނެވެ.