މަސްތުވާތަކެއްޗަށް ހޭލުންތެރިކުރުވުމަށް އެކި ހިސާބުތަކުގައި ވަރަށް ފުޅާކޮށް އެކްސްޕޯތައް ބާއްވާނެ: އިމާދު ޞާލިހު
26 އޯގަސްޓު 2023 | ހޮނިހިރު 07:30މިއީ ފަރުވާ ބޭނުންވާ މައްސަލައެއް
ނެޝަނަލް ޑްރަގް އެޖެންސީގެ ސީއީއޯ އިމާދު ޞާލިހު ވާހަކަދައްކަވަނީ
މަސްތުވާތަކެތީގެ މައްސަލައަށް އާންމު ރައްޔިތުން ހޭލުންތެރިކުރުވުމަށް ރާއްޖޭގެ އެކި ހިސާބުތަކުގައި ވަރަށް ފުޅާކޮށް އެކްސްޕޯތައް ބާއްވާނެ ކަމަށް ނެޝަނަލް ޑްރަގް އެޖެންސީގެ ސީއީއޯ އިމާދު ޞާލިހު ވިދާޅުވެއްޖެއެވެ.
މަސްތުވާތަކެއްޗާ ދެކޮޅަށް ބޭއްވި ފުރަތަމަ އެކްސްޕޯ "އަހަރެމެންނާއެކު" ބާއްވާފައިވަނީ ހުކުރު ދުވަހު ހަވީރު ހުޅުމާލޭގައެވެ. މިއެކްސްޕޯ ހުޅުވުމަށް ބޭއްވި ރަސްމިއްޔާތުގައި އިމާދު ޞާލިހު ވިދާޅުވީ އަހަރެމެންނާއެކު އެކްސްޕޯއިން ހާސިލްކުރަން ބޭނުންވާ ނަތީޖާ ހާސިލްވާނެ ކަމަށް އުންމީދުކުރާ ކަމަށާއި، ކުރިއަށް އޮތްތަނުގައި ރާއްޖޭގެ އެކި ހިސާބުތަކުގައި މިއަށްވުރެ ފުޅާކޮށް އެކްސްޕޯތައް ބާއްވާނެ ކަމަށެވެ.
އިމާދު ޞާލިހު ވިދާޅުވީ އެކްސްޕޯގެ ބޭނުމަކީ މުޅި ދުނިޔެއަށް ވެސް ކުރިމަތިވެފައިވާ އެންމެ ބޮޑު އިޖްތިމާއީ މައްސަލަކަމުގައިވާ މަސްތުވާތަކެތީގެ މައްސަލައަށް އާއްމު މުޖުތަމައު ހޭލުންތެރިކުރުވުން ކަމަށާއި، ޕްރިވެންޝަނަށް މިކުރެވޭ މަސައްކަތުގައި މުޖުތަމައު މިކަމުގައި އޮންނަ ސްޓިގްމާ ކުޑަކުރުން ކަމަށެވެ. މިއީ ފަރުވާ ބޭނުންވާ މައްސަލައެއްކަމާއި، އެކަމުގައި މުއައްސަސާތަކާއި މުޖުތަމައުގެ އެހީތެރިކަމުގެ މުހިންމުކަން ބުނެދިނުމަކީ ވެސް މިއެކްސްޕޯ ބޭއްވުމުގެ މަގުސަދެއްގެ ކަމަށް އިމާދު ސާލިހު ވިދާޅުވިއެވެ.
އިމާދު ޞާލިހު ވިދާޅުވީ މަސްތުވާތަކެތީގެ މައްސަލަތައް ހައްލުކުރުމަށް މަސައްކަތް ކުރަނީ ގައުމީ ލެވަލްގައި ކަމަށާއި، މިމަސައްކަތް ކުރިއަށް ގެންދިއުމަށް އާއްމު ރައްޔިތުންގެ ބައިވެރިވުން ވަރަށް މުހިންމު ކަމަށެވެ.
"އަހަރެމެންނާއެކު" އެކްސްޕޯގައި ޕެނަލް ޑިސްކަޝަންތަކާއި، އިންފޮމޭޝަން ސްޓޯލް އަދި ތަފާތު ގޭމްތަކާއި ހަރަކާތްތަކުގެ ތެރެއިން މައުލޫމާތު ފޯރުކޮށްދިނުން ކުރިއަށް ގެންގޮސްފައިވެއެވެ.
