މަސްތުވާތަކެތީގެ މައްސަލައަކީ ގައުމީ މައްސަލައެއް، އެމައްސަލަ ހައްލުކުރެވޭނީ ގައުމީ ވިސްނުމެއްގައި މަސައްކަތްކޮށްގެން: ނައިބު ރައީސް
މި ފަސް އަހަރުގެ ތެރޭގައި މަސްތުވާތެކެތީގެ މައްސަލަ ހައްލުކުރުމަށް ތަފާތު ގިނަ މަސައްކަތްތައް ކުރެވިފައިވޭ
"އަހަރެމެންނާއެކު" އެކްސްޕޯގައި ނައިބު ރައީސް ފައިސަލް ނަސީމް ވާހަކަފުޅު ދައްކަވަނީ
މަސްތުވާތަކެތީގެ މައްސަލައަކީ ގައުމީ މައްސަލައެއް ކަމަށާއި، އެމައްސަލަ ހައްލުކުރެވޭނީ ގައުމީ ވިސްނުމެއްގައި މަސައްކަތް ކޮށްގެން ކަމަށް ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވެއްޖެއެވެ.
ހުކުރު ދުވަހުގެ ހަވީރު މަސްތުވާތަކެއްޗާ ދެކޮޅަށް ބޭއްވި ފުރަތަމަ އެކްސްޕޯ "އަހަރެމެންނާއެކު" ހުޅުއްވައިދެއްވައި ނައިބު ރައީސް ވިދާޅުވީ މަސްތުވާތަކެތީގެ މައްސަލައަކީ މުޅި ދުނިޔެއަށް ކުރިމަތިވެފައިވާ ބޮޑު މައްސަލައެއް ކަމަށެވެ. ރާއްޖޭގެ ހާލަތަށް އިޝާރާތް ކުރައްވައި ނައިބު ރައީސް ވިދާޅުވީ މިއީ ޒަމާންވީ މައްސަލައެއް ކަމަށާއި، މިކަންބޮޑުވުން ނެތް އާއިލާއެއް މިގައުމުގައި މަދު ކަމަށެވެ. އަދި ވިދާޅުވީ މިމައްސަލައިގެ ބޮޑު މިންވަރު އެނގޭ ކަމަށާއި، ހަމައެކަނި ހުޅުވާލެވޭ ސެންޓަރަކުން މިމައްސަލަ ހައްލުނުކުރެވޭނެ ކަމަށެވެ.
ނައިބު ރައީސް ވިދާޅުވީ މިސަރުކާރުގެ ފަސް އަހަރުގެ ތެރޭގައި މަސްތުވާތެކެތީގެ މައްސަލަ ހައްލުކުރުމަށް ތަފާތު ގިނަ މަސައްކަތްތައް ކުރެވުނު ކަމަށާއި، މިހާރުވެސް ގިނަ މަސައްކަތްތައް ކުރިއަށްދާ ކަމަށެވެ. މިސަރުކާރުގެ ފުރަތަމަ 100 ދުވަހުގެ ތެރޭގައި ވެސް މަސްތުވާތަކެތީގައި ޖެހިފައިވާ ޒުވާނުން މުޖުތަމައުއަށް ނެރުމަށްޓަކައި ރާއްޖޭގެ އެކި ސަރަހައްދުތަކުގައި ސެންޓަރުތައް ގާއިމްކުރެވި، ފަރުވާ ދެވިފައިވާކަން ނައިބު ރައީސް ފާހަގަކުރެއްވިއެވެ. އަދި ވިދާޅުވީ ރައީސުލްޖުމްހޫރިއްޔާ މިކަންތައްތައް ބައްލަވާ ގޮތަށް ޚާއްސަ ޓާސްކްފޯސްއެއް އުފެއްދެވި ކަމަށާއި، މި ޓާސްކްފޯސްއިން ވެސް ގިނަ މަސައްކަތްތަކެއް ކުރާ ކަމަށެވެ. ނައިބު ރައީސް ވިދާޅުވީ މަސްތުވާތަކެއްޗާ ދެކޮޅަށް ކުރަމުންދާ މަސައްކަތުގެ ތެރެއިން އާއްމު ރައްޔިތުން ހޭލުންތެރިކުރުވުމާއި، ފަރުވާ ދެވޭ ސެންޓަރުތަކުގެ ފެންވަރު ރަނގަޅުކުރުމަށް އެސެންޓަރުތަކުގައި މަސައްކަތް ކުރާ މުވައްޒަފުންގެ އިތުރަށް ތަމްރީން ކުރުމުގެ މަސައްކަތްތައް ކުރަމުންދާ ކަމަށެވެ.
ނައިބު ރައީސް ވިދާޅުވީ އެޑިކްޝަންއަކީ އެކަމުން ސަލާމަތްވުމަށް އުދަނގޫ ކަމެއް ކަމަށާއި، އެކަން މުޖުތަމައުއިން ގަބޫލުކުރަންޖެހޭ ކަމަށެވެ. މަސްތުވާތަކެތީގެ ޝިކާރައަކަށްވެފައިވާ ޒުވާނުން މުޖުތަމައުއަށް ނެރުމަށްޓަކައި އެމީހުންނާ ދޭތެރޭގައި ދެކޭ ގޮތް ބަދަލުކޮށް، އެމީހުންނަށް ފުރުސަތު ދޭންޖެހޭ ކަމަށް ނައިބު ރައީސް ވިދާޅުވިއެވެ. އަދި ވިދާޅުވީ ބޮޑެތި މައްސަލަތައް ހައްލު ކުރުމަށް ގިނަ ދުވަސް ނަގާނެ ކަމަށާއި، މައްސަލަ ހައްލުކުރުމަށް ވަށާޖެހޭ ނިޒާމަކުން މަސައްކަތް ކުރަންޖެހޭ ކަމަށެވެ.
ނައިބު ރައީސް ވިދާޅުވީ ގައުމު ކުރިއަރައި ތަރައްގީވެ ދިއުމުގައި ޒުވާނުންގެ ދައުރު ވަރަށް ފުޅާ ކަމަށެވެ. ގައުމަށް އަމާންކަމާއި، އުފާވެރިކަން ބޭނުންވާނަމަ ޒުވާނުންނަކީ ގާބިލް އުފެއްދުންތެރި ބަޔަކަށް ވާންޖެހޭ ކަމަށާއި، އެފަދަ ޖީލެއް އުފެއްދުމަށް މަސައްކަތް ކުރަންޖެހޭ ކަމަށެވެ. ގައުމީ މައްސަލައެއް ހައްލުކުރެވޭނީ ގައުމީ ވިސްނުމެއްގައި އެންމެން ގުޅިގެން ކުރާ މަސައްކަތުން ކަމަށް ނައިބު ރައީސް ވިދާޅުވިއެވެ.
