"އިންތިޒާމްވެގެން ކުށްކުރާ ގްރޫޕްތައް ކަނޑައެޅުމަށް ހުށަހެޅުމުގެ ބާރު ފުލުހުންނަށް ގެންގް ބިލާއި އެކު ލިބުމަކީ ކުށް ހުއްޓުވަން ލިބޭ އެންމެ ބޮޑު ފަސޭހަ"
މީގެ ކުރިން ޤާނޫނީ ގޮތުން އެފަދަ ކަންކަން ހުއްޓުވަން ބަލާއިރު ދިމާވާ ގޮންޖެހުންތަކެއް ހުރި ކަމަށް ވައްޤާސް ވަނީ ވިދާޅުވެފަ
އިންސްޕެކްޓަރ އޮފް ޕޮލިސް ވައްޤާސް ޝަރީފް
އިންތިޒާމްވެގެން ކުށްކުރާ ގްރޫޕްތައް ކަނޑައެޅިގެން ދިއުމަކީ ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ބިލުގެ އެންމެ ބޮޑު ފަސޭހަ ކަމަށް އިންސްޕެކްޓަރ އޮފް ޕޮލިސް ވައްޤާސް ޝަރީފް ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަސްކާފް ޕްރޮގްރާމްގައި ވާހަކަދައްކަވަމުން ނެވެ.
"ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ގާނޫނު'' (ގާނޫނު ނަންބަރު: 7/2025) އަށް އަމަލުކުރަން ފެށުމަކީ އެފަދަ ކުށްތައް ހުއްޓުމަށް ލިބޭ ވަރަށް ބޮޑު ކުރިއެރުމެއް ކަމަށް އޭނާ ވިދާޅުވިއެވެ. އެގޮތުން މި ޤާނޫނާއި އެކު ފުލުހުންނަށް ލިބޭ ބާރުތަކުގެ ސަބަބުން މައްސަލަތައް ހައްލުކުރަން ފުރުސަތު ލިބިގެންދާ ކަަމަށް އޭނާ ވަނީ ވިދާޅުވެފައެވެ. ވައްޤާސް ވިދާޅުވީ މި ޤާނޫނަށް ގެނައި ބަދަލުގެ ސަބަބުން އެފަދަ ކުށްތަކަށް އަރައިގަންނަ ގްރޫޕްތައް މޮނިޓަރކުރުމަށް ފަސޭހަ ވެގެންދާ ކަމަށެވެ.
މިހާރުގެ ހާލަތަށް ބަލާއިރު ކުށް ކުރާ ގްރޫޕްތަކުން ކުށް ކުރާ އިރު ބޮޑެތި ކުށްތަކަށް އަރައިގަންނަކަން ފާހަގަކުރެވޭ ކަމަށް އޭނާ ވިދާޅުވިއެވެ. އޭގެ ތެރޭގައި މަސްތުވާތަކެތީގެ މައްސަލަތަކާއި، މީހުން މެރުމާއި، ކިޑްނެޕްކުރުން ފަދަ ކަންކަން ހިމެނޭ ކަމަށް އޭނާ ވިދާޅުވިއެވެ. މިފަދަ ޤާނޫނެއް އޮތުމަކީ އެފަދަ ކުށްތައް ހުއްޓުވަން ލިބޭ ބާރެއް ކަމަށް ވައްޤާސް ވަނީ ވިދާޅުވެފައެވެ.
މީގެ ކުރިން ޤާނޫނީ ގޮތުން އެފަދަ ކަންކަން ހުއްޓުވަން ބަލާއިރު ދިމާވާ ގޮންޖެހުންތަކެއް ހުރި ކަމަށް ވައްޤާސް ވަނީ ވިދާޅުވެފައެވެ. ކުށް މަދުކުރުމަށް މަސައްކަތް ކުރާ އިރު ފުލުހުންނަށް ޤާނޫނީ ގޮތުން ދިމާވާ ގޮންޖެހުންތައް ނައްތާލުން މުހިންމު ކަމަށް ވެސް އޭނާ ވަނީ ވިދާޅުވެފައެވެ.
" 18 އަހަރު ނުވާ ކުޑަ ކުދިން މިފަދަ ކުށްތަކުގައި ގިނަކަން އެއީ ވަަރަށް ބޮޑަށް ހިތާމަ ކުރާ ކަމެއް. އެކަން ފާހަގަވޭ އަޅުގަނޑުމެންނަށް ވަރަށް " އޭނާ ވިދާޅުވިއެވެ.
އެ ޕްރޮގްރާމްގައި ވާހަކަދައްކަވަމުން ޕަބްލިކް ޕްރޮސެކިއުޓަރ އައިމިނަތު ޝީޒާ ވިދާޅުވީ އިންތިޒާމް ވެގެން ހިންގާ ކުށްތައް ހުއްޓުވުމަށް މި ޤާނޫނާއި އެކު ގްރޫޕް ހަދައިގެން ކުށްތައް ހިންގާ އިރު ކުޑަކުދިން އެކަމުން ރައްކާތެރިކުރުވުމަށް އިތުރު ފިޔަވަޅުތަކެއް އަޅާފައިވާ ކަމަށެވެ. 18 އަހަރުން ދަށުގެ ކުޑަކުދިންނަށް ވަޅިއާއި ކަޓަރު ތިލަ އަދި އެ ނޫންވެސް އެފަދަ ތޫނު ހަތިޔާރާއި މާރާމާރީ ހިންގުމަށް ބޭނުންކުރެވިދާނެ ފަދަ އެއްވެސް އާލާތެއް ކުޑަކުދިންނަށް ވިއްކުމަކީ މަނާކަމެއް ކަމުގައި އޭނާ ވަނީ ވިދާޅުވެފައެވެ.
ކުށް ކުރާ ގްރޫޕަކަށް ނިސްބަތްވާ މީހެއް ކަމަށް މައުލޫމާތު ލިބޭ ހާލަތުގައި އެ ގްރޫޕަކާއި ބައިވެރިވުމާއި ގްރޫޕަށް މީހުން ވެއްދުމަށް ކުރާ މަސައްކަތަށް މި ޤާނޫނުން ހައްލު ލިބޭނެ ކަމަށް އޭނާ ވަނީ ވިދާޅުވެފައެވެ. ރޭވިގެން ގްރޫޕްތަކުން ހިންގާ ކުށްތަކުގައި ކުޑަކުދިން ގިނަކަމަށް ފާހަގަކުރައްވާ އޭނާ ވަނީ މި ޤާނޫނުގައި ކުދިންގެ ރައްކާތެރިކަމަށް ޚާއްސަ އިސްކަމެއް ދީފައިވާ ކަމަށެވެ.
