ގައުމީ އެއަރލައިނަށް އިންވެސްޓްކޮށް، ގައުމީ އެއަރލައިންގެ އިންޓަރނޭޝަނަލް ޚިދުމަތްތައް ފަތުރުވެރިކަމުގެ ސޯސް މާކެޓްތަކަށް ސީދާގޮތުން ދިނުން ފުޅާކޮށް ރާއްޖެއަށް ފަތުރުވެރިން އުފުލުމުގައި ގައުމީ އެއަރލައިންގެ ހިއްސާ ބޮޑުތަނުން އިތުރުކުރަން، ރައީސުލްޖުމްހޫރިއްޔާ އަދި ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް، އިބްރާހީމް މުހައްމަދު ސާލިޙުގެ "ބާރުވެރި އިގްތިސާދު"ގެ ސިޔާސަތުގައި ކަނޑައަޅައިފިއެވެ.
''ދަތުރުފަތުރާއި އުމްރާނީ ސިނާއަތަށް މާނަވީ އިންވެސްޓްކުރުމުގެ'' ދަށުން ގިނަ މަސައްކަތްތަކެއް ކުރުމަށް ނިންމާފައިވެއެވެ. އޭގެ ތެރޭގައި މުޅި ރާއްޖެ އެކީ ގުޅާލުމަށް ފަށާފައިވާ އާރްޓީއެލް ފެރީ ނެޓްވޯރކްގެ ނިޒާމު ފުރިހަމަކޮށް މި ޚިދުމަތް ރާއްޖޭގެ މީހުން ދިރިއުޅޭ ކޮންމެ ރަށަކަށް ފޯރުކޮށްދޭނެ ކަމަށާއި އާރްޓީއެލްގެ ތެރެއަށް ކާގޯއާއި މޯލްޑިވްސް ޕޯސްޓް މެދުވެރިކޮށް ދެވިގެންދާނެ ކުދި ދާގީނާގެ ލޮޖިސްޓިކްސް ޚިދުމަތް އިތުރުކުރުމަށް ނިންމާފައިވެއެވެ.
އާރްޓީއެލްގެ ޚިދުމަތް ފުޅާކުރުމުގެ ގޮތުން އާރޓީއެލް ގިމަތަތައް ރާއްޖޭގެ މީހުން ދިރިއުޅޭ ކޮންމެ ރަށެއްގައި ގާއިމުކުރާނެ ކަމަށާއި، ރިޒޯޓުތަކާއި ސިނާއީ ރަށްތައް އާރްޓީއެލްގެ ނެޓްވޯރކަށް އިންޓަރގްރޭޓް ކުރާނެ ކަމަށް ސިޔާސަތުގައި ބުނެފައިވެއެވެ.
މީގެ އިތުރުން ގައުމީ އެއަރލައިނަށް އިންވެސްޓްކޮށް، ގައުމީ އެއަރލައިންގެ އިންޓަރނޭޝަނަލް ޚިދުމަތްތައް ފަތުރުވެރިކަމުގެ ސޯސް މާކެޓްތަކަށް ސީދާގޮތުން ދިނުން ފުޅާކޮށް، ރާއްޖެއަށް ފަތުރުވެރިން އުފުލުމުގައި ގައުމީ އެއަރލައިންގެ ހިއްސާ ބޮޑުތަނުން އިތުރުކުރާނެ ކަމަށެވެ. މިކަމަށްޓަކައި ސަރުކާރު ހިއްސާވާ ދެކުންފުންޏެއްގެ ޖޮއިންޓް ވެންޗަރ އެއްގެގޮތުގައި އިންޓަރނޭޝަނަލް އެއަރލައިނެއް ހިންގުމަށް އެއްބަސްވުމެއްގައި ސޮއިކުރުމުގެ މަސައްކަތް ކުރިއަށްދާކަން ފާހަގަކޮށްފައިވެއެވެ. އަދި މީގެ ދަށުން ގައުމީ އެއަރލައިން ސަރަހައްދީގޮތުން ފާހަގަ ކޮށްލެވޭ ކެރިއަރއެއްގެ ގޮތުގައި ތަރައްގީކުރާނެ ކަމަށް ސިޔާސަތުގައި ބުނެފައިވެއެވެ.
މިސިޔާސަތުގައި އަލަށް ގާއިމުކޮށްފައިވާ މޯލްޑިވްސް ސްޓޭޓް ޝިޕިންގއަކީ މި ސަރަހައްދުގެ އެންމެ ވަރުގަދަ އެއް ޝިޕިންގ ލައިނަށް ހަދައި އައު ވިޔަފާރީގެ ރޫޓްތަކަށް އިންވެސްޓްކުރަން ވަނީ ނިންމާފައެވެ.
ޓްރާންޝިޕްމަންޓް ޕޯޓަކަށް ޖާގަލިބޭ އިހަވަންދިއްޕޮޅު ޕޯޓް ސިޓީގެ އަމަލީ މަސައްކަތް ފަށައިގަނެ، ޕޯޓް އެންޑް މެރިޓައިމް ހަރަކާތްތައް، އިންޑަސްޓްރިއަލް، ކޮމާޝަލް، ރިއަލް އެސްޓޭޓް، ހޮސްޕިޓަލިޓީ އަދި އެހެނިހެން ޓާޝަރީ އިންވެސްޓްމަންޓްތައް ހިމެނޭ ގޮތަށް ޒަމާނީ ސަރަހައްދެއް ތަރައްގީކޮށް، ރާއްޖޭގެ އުތުރުގެ އިގުތިސާދު ކުރިއަރުވާނެ ކަމަށެވެ. މި މަޝްރޫއު ކުރިއަށް ގެންދިއުމަށް ސަރުކާރާއި ސަރުކާރު ހިއްސާވާ ކުންފުނިތަކަކާއި ގުޅިގެން ޖޮއިންޓް ވެންޗަރ ކުންފުންޏެއްގެ ގޮތުގައި 'މޯލްޑިވްސް ޕޯޓް ސިޓީ އިންވެސްޓްމަންޓްސް' އުފައްދާ މަސައްކަތް ކުރިއަށްދާކަން ސިޔާސަތުގައި ވަނީ ފާހަގަކޮށްފައެވެ.
ދިވެހިރާއްޖޭގެ ސްޓްރެޓީޖިކް ލޮކޭޝަންގެ ބޭނުން އެންމެ ފުރިހަމަގޮތުގައި ހިފައި، އީސްޓް އޭޝިއާ، މެދު އިރުމަތި، އެފްރިކާ އަދި އޮސްޓްރަލްއޭޝިއާ ގުޅާލެވޭ ޓްރާންސްޕޯޓް އަދި ލޮޖިސްޓިކްސް ހަބަކަށް ހަދާނެ ކަމަށް ވެސް ސިޔާސަތުގައި ބުނެފައިވެއެވެ.
