ތުއްތު ކުއްޖެއްގެ ރުއިމުގެ އަޑަކީ، ކަންފަތުގައި ޖެހުމާއެކު އެ އަޑަކަށް ބީރު ކަންފަތެއް ނުދެވޭ އަޑެކެވެ. އެ މައުސޫމު ކުއްޖާފުޅު ރޮމުން އެދަނީ ކޮންމެވެސް މުހިންމު ކަމެއް ބޭނުންވެގެން ކަމާއި، ބޭނުން ވެގެން އުޅެނީ ކޮން ކަމެއްކަން އެ ތުއްތު ދަރިފުޅަށް ބުނެދޭން ނޭނގޭނެކަން އިންސާނީ ޟަމީރު ޤަބޫލު ކުރާތީއެވެ. ކިތަންމެ ކަނުލާ އަޑުއެހިއެއް ކަމަކު، ނުވަތަ ވަޤުތުން ވަޤުތަށް އެ ދަރިފުޅު ގާތަށް ދިޔަ ކަމުގައި ވީ ނަމަވެސް، ރުއިމުގެ ތެރެއިން އެ ކުއްޖާފުޅު އެ ބުނަނީ ކީކޭކަން ނޭނގޭ ހާލަތްތައް މެދުވެރިވެއެވެ. ދަރިފުޅުގެ އާދޭހަކީ ކޮބައިކަން ގިނަ ފަހަރަށް މައިމީހާއަށް އެނގުނު ނަމަވެސް، އެ ދަރިފުޅު ގާތުގައި ދެން އުޅޭ މީހުންނަށް ކޮށްދެވޭނެ މާ ބޮޑު ކަމެއް ނޯންނަ ހާލަތްތައްވެސް މެދުވެރިވެއެވެ. އެފަދަ ވަޤުތެއްގައި މައިމީހާވެސް ނުތަނަވަސްކަމުގެ ތެރެއަށް ވެއްޓޭ ގޮތްވެއެވެ.
މިފަދަ އެތައް ކަމަކަށް ލުޔެއް ހޯދާ ދިން އެކަކީ ފަލަސްޠީނަށް އުފަން، ލަޔާލީ ޚަޠީބުއެވެ. ތުއްތު ތުއްތު އެއްމާބަނޑު ދެބެންނާއި އަލަށް އުފަންވި އެއްބަނޑު އެއްބަފާ ކޮއްކޮއާއެކު އެއް ގެއެއްގައި ދިރިއުޅެމުން އަންނަ ލަޔާލީގެ ޢުމުރަކީ ހަމަ އެންމެ 15 އަހަރެވެ. ކޮއްކޮމެންގެ ރުއިމުގެ އަޑު އިވިއިވި، ލަޔާލީގެ ޅަ ސިކުނޑި ފަރުމާކޮށްދިނީ ޚާއްޞަ އެޕެކެވެ. ލަޔާލީ ބުނާ ގޮތުގައި، އޭނާ ފަރުމާ ކުރި އެޕަކީ، ތުއްތު ދަރިފުޅުގެ ރުއިމުގައި ވާ ވާހަކަތައް، ނުވަތަ ދަރިފުޅު ރޯ ސަބަބު މައިންނަށް އަންގައި ދޭނެ އެޕްލިކޭޝަންއެކެވެ.
އިޒްރޭލުން ވެރިވެގެންފައިވާ ހުޅަނގު އައްސޭރީގެ ޖެނީންގެ ރަށްބޭރުގައި ދިރިއުޅެމުން އަންނަ ލަޔާލީ ފަރުމާ ކުރި ސޮފްޓްވެއަރއަކީ މަސްނޫއީ ތޫނުފިލިކަން ނުވަތަ އަރޓިފިޝަލް އިންޓެލިޖެންސް (އޭއައި) ޓެކްނޮލޮޖީ ބޭނުންކޮށްގެން އުފެއްދި ސޮފްޓްވެއަރއެކެވެ. އެޕްލިކޭޝަން ފަރުމާ ކޮށްފައި ވަނީ ތުއްތު ކުދިންގެ ރުއިމުގެ އަޑުތައް އެނަލައިޒްކޮށްގެން، އެ ރޯ ސަބަބެއް ކަނޑައަޅައި ދިނުމަށެވެ. އެގޮތުން، ދަރިފުޅު ރޮމުން އެ ދަނީ ބަނޑުހައިވެގެން ތޯ، ނުވަތަ ނިދި އައިސްގެން ތޯ، ތަނަކަށް ތަދުވާތީ ތޯ ނުވަތަ ޑައެޕަރ ބަދަލު ކުރަން ބޭނުން ވެގެން ތޯ ކުރެވޭ ސުވާލުތަކަށް ފަސޭހަ ޖަވާބެއް ހޯދައިދެއެވެ.
އޭނާ ފަރުމާ ކުރި އެޕްލިކޭޝަންގެ ވަކިވަކި ތަފްސީލުތައް ހިއްސާ ކުރަން ލަޔާލީ ފަސްޖެހެއެވެ. ނަމަވެސް، އޭނާ ވަނީ އެ އެޕްލިކޭޝަން މަސައްކަތް ކުރާ ގޮތުގެ ޚުލާސާއެއް ހިއްސާ ކޮށްފައެވެ. ލަޔާލީ ފަރުމާ ކުރި އެޕްލިކޭޝަން ބޭނުން ކުރުމަށްޓަކައި، ދަރިފުޅު ރޯ ވަޤުތު، އެ ރޯ ރުއިމުގެ އަޑު، އެޕްލިކޭޝަނަށް ރެކޯޑް ކުރަން ޖެހެއެވެ. އެހާ ހިސާބުން އޭއައި ޓެކްނޮލޮޖީ ބޭނުންކޮށްގެން، އެ ރުއިމުގެ ފަހަތުގައި ވާ ސަބަބާއި، ހައްލުތައް ހޯދައި، ދައްކައިދެއެވެ.
އަހަރެންގެ އެޕް ބިނާ ކުރީ، މި ކަހަލަ އެޕްތަކުގެ މައްޗަކަށް ނޫން. މި އެޕް އުފައްދާ، ތަރައްޤީ ކުރީ، އަހަރެންވެސް އެކަމެއް ތަޙައްމަލު ކުރާ ކަމެއްގެ މައްޗަށް. ތެދެއް، އެހެން ކޮންމެ އީޖާދެއް ފަދައިން، މި އެޕްލިކޭޝަނާ ވާދަ ކުރާނެ އެޕްތަކެއްވެސް ހުންނާނެ. އެކަމަކު މަދަރހުޑް ގައިޑް ވަރަށް ތަފާތު ވާނެ ވާދަވެރިންނާ އަޅާ ބަލާއިރު. އެއީ ކިހިނެއް ދޯ؟ ތުއްތު ކުއްޖާ ރޯ އަޑު، އެޕްލިކޭޝަނުން އެނަލައިޒް ކުރާނެ. އަޅާ ކިޔާނެ އަޑުތަކެއް ނޫން މައިމީހާއަށް ދައްކާނީކީ. އެ ރޯ ރުއިން ހުއްޓުވާނެ ގޮތްތައް މަންމައަށް ކިޔައިދެމުން ދާނީ. މައިންނަށް އިރުޝާދުތައް ދެމުން ދާނީ. ހަމަ އެކަނި، އެ ރޮނީ ކީއްވެ ކަން ބުނެލަ ދެނީއެއް ނޫން. އެހެން އެޕްތަކުން މައިންނަށް އިއްވަ ދޭނީ ހަމައެކަނި އަޑުތަކެއް. ދެން މައިން ވީ ސަބަބު ދެނެގަންނަން ދަރިފުޅުގެ ރުއިމުގެ އަޑާ އަޅާ ކިޔަން. މަދަރހުޑް ގައިޑްގަ ނުވާނެ އެހެންނެއް.ލަޔާލީ ޚަޠީބު؛ މަދަރހުޑް ގައިޑް އެޕްގެ ޑިވަލޮޕަރު
'މަދަހުޑް ގައިޑް'ގެ ނަން ދީފައި ވާ އެޕްލިކޭޝަން އުފެއްދުމުގެ މަސައްކަތް ލަޔާލީ ފެށީ 2019 ވަނަ އަހަރުގެ ތެރޭގައެވެ. ޒުވާން ޑިވަލޮޕަރު ބުނާ ގޮތުގައި، އޭނާގެ އެޕްލިކޭޝަންއަކީ 93 ޕަސެންޓް ކަށަވަރު ޖަވާބު ދޭ އެޕްލިކޭޝަންއެކެވެ.
މިފަދަ އެޕްލިކޭޝަންއެއް ތަރައްޤީ ކުރުމަކީ ކޮންމެ ކޮންމެ މީހަކަށް ކުރެވޭނެ ކަމެއް ނޫނެވެ. ލަޔާލީއަށްވެސް މިހާ ހިސާބަށް އާދެވުނީ ގިނަ ގޮންޖެހުންތަކަކާ ކުރިމަތިލައި، ހުރަސްތަކެއް ގިރާ ކޮށްގެންނެވެ. އެޕްލިކޭޝަން އުފެއްދުމަށްޓަކައި ކޯޑް ކުރަން ދަސް ކުރީ އޮންލައިން ކުލާސްތަކުންނެވެ. އެޕް އުފެއްދީ އޯޕަން-ސޯސް ވެބްސައިޓެއް ބޭނުން ކޮށްގެންނެވެ.
ލަޔާލީ މިހާރު ކުރަމުން ދާ ޢުއްމީދަކީ އޭނާގެ 'މަދަރހުޑް ގައިޑް' އެޕްލިކޭޝަން އިތުރަށް ފައްކާކޮށް، ދުނިޔޭގެ އެކި ކަންކޮޅުތަކަށް އެ އެޕްލިކޭޝަން ފުޅާ ވެގެން ދިއުމެވެ. އެވަރުން އަދި ނިމުނީއެއް ނޫނެވެ، ލަޔާލީގެ މިޞްރާބު މިހާރު ހުރީ، އޯޓިޒަމް ދެނެގަންނާނެ އެޕްލިކޭޝަންއެއް އުފެއްދުމާ ދިމާއަށެވެ.
