ސްޓޯންސްއަށް ކުޅެވޭނީ އިންޓަނޭޝަނަލް ބްރޭކަށްފަހު: ގާޑިއޯލާ

އަނިޔާގެ ސަބަބުން ކުޅުމާ ދުރުގައިހުރި މެންޗެސްޓަރ ސިޓީގެ ޑިފެންޑަރު، ޖޯން ސްޓޯންސްއަށް ކުޅެވޭނީ އިންޓަނޭޝަނަލް ބްރޭކަށްފަހު ކަމަށް ސިޓީގެ ކޯޗު ޕެޕް ގާޑިއޯލާ ބުނެފިއެވެ.

އުމުރުން 29 އަހަރުގެ ސްޓޯންސްއަށް އަނިޔާވެފައިވަނީ ޕްރީ-ސީޒަން ތެރޭގައެވެ. އަނިޔާގެ ސަބަބުން އޭނާއަށް ވަނީ ޕްރިމިއަރ ލީގުގެ ފުރަތަމަ ދެ މެޗުގެ އިތުރުން، ސުޕަ ކަޕް މެޗު ގެއްލިފައެވެ. އަންނަ އިންޓަނޭޝަނަލް ބްރޭކަށްފަހު އޭނާ ފިޓުވާނެ ކަމަށް ގާޑިއޯލާ ބުނެފައިވާއިރު، އިންޓަނޭޝަނަލް ބްރޭކް ކުރިޔަށްދާނީ ސެޕްޓެންބަރު މަހުގެ ހަތަރުވަނަ ދުވަހުން 12 ވަނަ ދުވަހުގެ ނިޔަލަށެވެ.

އަނިޔާގެ ސަބަބުން އޭނާއަށް އަންނަ މަހުގައި އިންގްލެންޑް ކުޅޭ ދެ މެޗުވެސް ގެއްލޭނެއެވެ. އެއީ ޔޫރޯ ކޮލިފައިންގައި ޔޫކްރެއިނާ ދެކޮޅަށް ކުޅޭ މެޗާއި ސްކޮޓްލޭންޑާއި ދެކޮޅަށް ކުޅޭ އެކުވެރިކަމުގެ މެޗެވެ. މީގެ އިތުރުން، ސިޓީގެ ކުރިޔަށް އޮތް ދެ މެޗުވެސް އޭނާއަށް ގެއްލޭނެއެވެ. އެއީ 27 ވަނަ ދުވަހު ޝިފީލްޑާ ދެކޮޅަށް ކުޅޭ މެޗާއި އަންނަ މަހުގެ ދެވަނަ ދުވަހު ފުލަމްއާ ދެކޮޅަށް ކުޅޭ މެޗެވެ.

ކުޅުމާ ދުރަށް ސްޓޯންސް ދާން ޖެހުނުނަމަވެސް، ގާޑިއޯލާއަށް ހާސްކަމެއް ނެތެވެ. ސްޓޯންސްގެ މަގާމަށް ކުޅެވޭ އިތުރު ކުޅުންތެރިންގެ ތެރޭގައި އަކަންޖީ، ރުބެން ޑިއާސް، ނަތަން އަކޭ، ރިކޯ ލެވިސް އަދި ގްވާޑިއޯލް ހިމެނެއެވެ.

މެންޗެސްޓަރ ސިޓީގެ އެންމެ މުހިންމު އެއް ކުޅުންތެރިޔާ، ކެވިން ޑި ބްރޭނާވެސް ވަނީ އަނިޔާގެ ސަބަބުން ކުޅުމާ ދުރަށް ދާން ޖެހިފައެވެ. އޭނާއަށްވެސް ކުޅެވޭވަރު ވާނީ ހަތަރު މަސް ފަހުންނެވެ.