ރައްޔިތުންގެ މަޖިލީހުގެ މިއަހަރުގެ ތިންވަނަ ދައުރު ފަށަން މިއަދު ބޭއްވި ޖަލްސާ އެޖެންޑާކުރުމާއެކު އެންމެންވެސް ބަލަން ބޭނުންވީ މިފަހަރު ދާއިމީ ކޮމިޓީތަކުގައި ސިޔާސީ ޕާޓީތައް ތަމްސީލުކުރާ ގޮތް ކަނޑައެޅުމުގެ މައްސަލަ ކުރިއަށްގެންދާނެތޯ ނުވަތަ ނޫންތޯއެވެ. މަޖިލީހުގައި ތަމްސީލުކުރާ ސިޔާސީ ޕާޓީތައް ކޮމިޓީތަކުގައި ތަމްސީލުކުރާ ގޮތް ކަނޑައެޅުމުގެ މައްސަލަ ކުރިއަށް ނުގެންގޮސް, މަޖިލީހުގެ ދެވަނަ ދައުރުގެ ފަހުކޮޅު މަޖިލީހުގެ ރިޔާސަތުން މަޖިލީހުގެ ޖަލްސާތައް ކުރިއަށް ގެންދިޔައީ ހިތުހުރި ގޮތަކަށެެވެ. ރިޔާސަތުން އިސްވެ މަޖިލީހުގެ ކޮމިޓީތަކާމެދު ގޮތެއް ނުނިންމައި، ތަފާތު އުޒުރުތައް ދައްކައިގެން އޭރު އެ މައްސަލަ ދަންމާލީ އެކަމުގެ ސަބަބުން މަޖިލީހުގެ މަސައްކަތްތައް މެދުކެނޑޭނެކަން ކަނޑައެޅިކަން އެނގިހުރެއެވެ.
އޭރު އެމްޑީޕީގެ ރިޔާސީ ޕްރައިމަރީ ނަޝީދަށް ނާކާމިޔާބުވެވަޑައިގަތުމުން، "ފިކުރެއްގެ ދިރުން" މި ނަމުގައި އުޅުއްވި ބޭފުޅުން، އެމްޑީޕީ ދޫކުރައްވައި ވަޑައިގެން އާ ޕާޓީއެއް އުފައްދަވަން ވަނީ ފައްޓަވާފައެވެ. އެ ޕާޓީއަކީ ދަ ޑިމޮކްރެޓްސްއެވެ. ދަ ޑިމޮކްރެޓްސްގެ ނަމުގައި އާ ޕާޓީއެއް އުފެއްދުމުގެ މަސައްކަތް ކާމިޔާބުވީ މަޖިލީހުގެ މިއަހަރުގެ ދެވަނަ ދައުރު ނިމުމަކާތް ގާތްވެފައި ވަނިކޮށެވެ. މަޖިލީހުގެ ދައުރުގެ ފަހުކޮޅު ހުރިހާ ދުވަހެއް ކުރިއަށް ދިޔައީ މަޖިލިސް ކުރިއަށް ނުގެންގޮސްގެން މެމްބަރުން އާދޭސްކުރައްވަމުން ގެންދެވިއިރުވެސް ކުޑަމިނުން ޖަލްސާއެއް އެޖެންޑާވެސް ކުރަން ރިޔާސަތަކަށް ނުކެރުނެވެ. މަޖިލީހުގެ ދާއިމީ ކޮމިޓީތައް އެކުލަވާލުމުގެ މަސައްކަތް ކުރިއަށްނުދާތީ އެތައް މަސައްކަތެއް ހުއްޓިފައި ހުރި ވާހަކަ އަނގަބަހުންނާއި ސިޓީބިޓީން ތަކުރާރުކޮށް ރިޔާސަތަށް ހުށަހެޅުއްވިއެވެ. އެ ވާހަކަތަކަށް ސަމާލުކަން ދިނުމެއް ނެތެވެ. އެއީ މާ މުހިންމު ވާހަކަތަކެއް ކަމަށް ރިޔާސަތަކަށް ނުފެނުނެވެ.
އެހެންނަމަވެސް ދައުރުން ބޭރުން ޖަލްސާއެއް ބާއްވައި، ދާއިމީ ކޮމިޓީތައް އެކުލަވާލުމުގެ ރިޕޯޓަށް ހުށަހަޅާފައިވާ 10 އިސްލާހު ވަކިވަކިން ހުށަހެޅިއެވެ. މަޖިލީހުގެ ދާއިމީ ކޮމިޓީތައް އެކުލަވާލައި ގޮތް ނިމިގެން ދިޔައީވެސް ވެރިކަންކުރާ މައިޕާޓީ އެމްޑީޕީން ހުށަހެޅިގޮތަށް ފާސްވެގެންނެވެ. ބޭނުމަކަށްވީ މަޖިލީހުގެ ޖަލްސާތައް ކުރިއަށްގެންދާކަން ދެއްކުމެވެ. އެކަމަކު ހަގީގަތަކީ އެއީބާވައެވެ؟
މަޖިލީހުގެ ދައުރު ކުރިއަށްދިޔަ ހުރިހާ ދުވަހަކު އެކަން ނުކޮށް، އެ ޖަލްސާގައި އެކަން ކުރުން އެއީ ހަމަ އިއްތިފާގެއްބާވައެވެ؟ އޭރު ޑިމޮކްރެޓްސް ރަޖިސްޓްރީކޮށް، ރަސްމީ މަސައްކަތްތައް އޮތީ ނިމިފައެވެ. އަދި ސިޔާސީ ޕާޓީތަކުގެ ދަފްތަރުގައި ހިމެނުމުގެ މަރުހަލާގައި ޕާޓީ އޮތުމާއެކު، މަޖިލީސް ޗުއްޓީ ނިމޭއިރު މަޖިލީހުގެ ދަފްތަރުގައި އެ ޕާޓީ ހިމެނޭނެކަން އެއީ ސުވާލެއް އޮތް ކަމެއް ނޫނެވެ. އަނެއްކާވެސް ކޮމިޓީތައް އެކުލަވާނުލުމަށް އާ ބަހަނާއެއް ހޯދީއެވެ. އޭރު މި ކުރެއްވި ކަމަކީ ޗުއްޓީއަށްފަހު އަލުން މަޖިލިސް ހުޅުވުނުއިރު ކޮމިޓީތަކުގެ މަސައްކަތް ސުމަކާ ހިސާބުން ފަށަން މަޖުބޫރުކުރުވުމެވެ.
ކަން ހިނގަނީވެސް ހަމައެހެންނެވެ. ހޯމަ ދުވަހު ރިޔާސަތުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ, އެމަނިކުފާނުގެ ދަ ޑިމޮކްރެޓްސް ޕާޓީއާ ގުޅިވަޑައިގެންނެވި މެމްބަރުން އެކަން މަޖިލީހަށް ރަސްމީކޮށް އަންގަވާފައި ނުވާކަމަށެވެ. މަޖިލީހުގެ ދާއިމީ ކޮމިޓީތަކުގެ އެކުލެވުމަށް ބަދަލު ގެންނަން ޖެހުނީ އެ މެމްބަރުން އެމްޑީޕީން ވަކިވެވަޑައިގެންނެވުމުންނެވެ. އެއީ ނަޝީދު ހިމެނިވަޑައިގަންނަވާ ގޮތުން ޖުމްލަ 14 މެމްބަރެކެވެ. ނަމަވެސް މި ބޭބޭފުޅުން ވަކިވެވަޑައިގަތްކަން މަޖިލީހަށް އަންގަވަނީ ފަހަރަކު މެމްބަރެއް، ދެ މެމްބަރެއް ހިމެނޭހެން ވަކިވަކިންނެވެ.
ބައިބަޔަށް ވަކިވަކިން މެމްބަރުން ވަކިވެވަޑައިގެން މި ޖައްސަވާ ސްޓަންޓަކީ ހައްތަހާވެސް ކޮމިޓީތައް އެކުލަވާނުލައްވައި ލަސްކުރެއްވުމަށް ގެންގުޅުއްވާ އުކުޅުތަކެވެ. މިހުރިހާ ކަމެއް މި މޭރުމުން ހިނގަންފެށީ މަޖިލީހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ މަޖިލީހަށް ހުށަހެޅި ހިސާބުންނެވެ. މިއީ ހަމަ އިއްތިފާގެއް ކަމަށް ގަބޫލުކުރާނެ، ސިޔާސީ މަސްރަހުގެ ކަންކަން ދަންނަ މީހަކު ހުންނާނެހެން ހިއެއް ނުވެއެވެ. މިހާރު މިދާ ގޮތުން ލިޔެކިޔުމުގެ ބޭނުމަށް އެޖެންޑާގައި މައްސަލައެއް ހިމެނިނަމަވެސް ކޮމިޓީތައް އެކުލަވާލުމުގެ ހަގީގީ ޝައުގެއް ރިޔާސަތުގެ ނެތްކަން ހާމަވެއެވެ. އެހެންވީމައި، ތަފާތު ބަހަނާތައް ދައްކައިގެން ހަގީގަތުގައި މިކުރައްވާ ކަމަކީ މަގާމާއި ޖާހަތު ދިފާއުކުރެއްވުންތޯއެވެ؟
