އަހަރެން 10 ގުނަ ކުރިއަރައިފި: ބެލިންހަމް
އޭނާ ވަނީ މިހާތަނަށް ދެ މެޗު ކުޅެ ދެ ގޯލު ޖަހައިދީފައި
ބެލިންހަމް ލަނޑު ޖެހުމަށްފަހު އުފާފާޅުކުރަނީ
ރެއާލް މެޑްރިޑަށް ބަދަލުވުމާއެކު އޭނާ 10 ގުނަ ކުރިއަރައިފިކަމަށް މިޑްފީލްޑަރު ޖޫޑް ބެލިންގްހަމް ބުނެފި އެވެ.
އިނގިރޭސި ޒުވާން މިޑްފީލްޑަރު މިހެން ބުނީ ޖަރުމަނުގެ ބޮރޫޝިޔާ ޑޯޓްމުންޑްއިން 103 މިލިއަން ޔޫރޯ އަށް ރެއާލް މެޑްރިޑަށް މި ސީޒަނުގައި ބަދަލުވުމަށްފަހު އޭނާ މޮޅު ކުޅުމެއް ދައްކަމުންދިއުމުގެ ސިއްރަކީ ކޮބާތޯ ނޫސްވެރިން ސުވާލުކުރުމުންނެވެ.
އޭނާ ވަނީ މިހާތަނަށް ދެ މެޗު ކުޅެ ދެ ގޯލު ޖަހައިދީފަ އެވެ.
އިނގިރޭސި ކުލަބުތަކުން ވެސް އޭނާ ގަތުމަށް ޝައުގުވެރިކަން ފާޅުކުރަމުންދަނިކޮށް ރެއާލް އަށް ބަދަލުވި ބެލިންހަމަކީ އެކުލަބުގެ ސަޕޯޓަރެއްވެސްމެ އެވެ. އޭނާ ކުޑައިރު ރެއާލް މެޑްރިޑް ފަހަތުން އަރައި ކާމިޔާބުކުރި ގިނަ މެޗުތަކެއްގެ ބެލި ކަމަށާއި އެ މެޗުތަކުގެ ހަނދާން ހުރުމުން ރެއާލް ބަލިވާން ބޭނުންނުވާ ކަމަށް ބުނެފައިވެއެވެ.
ރެއާލްގެ ކޯޗު ކާލޯ އެންޗެލޯޓީ ބުނީ ސްޕޭންގެ މާހައުލަށާއި ރެއާލް މެޑްރިޑަށް ބެލިންހަމް ވަރަށް އަވަހަށް ހޭނިއްޖެ ކަމަށާއި އޭގެ ސަބަބަކީ ޖަރުމަނުގައި ކުޅެފައި ރެއާލް އަށް އައުން ކަމަށެވެ. އަދި އޭނާގެ ސަބަބުން ޓީމަށް ކުރިއެރުން ލިބޭތީވެ އުފާކުރާ ކަމަށް ކޯޗު ބުނެފައި ވެއެވެ.
