ބޮޑެތި މަޝްރޫއުތަކުގެ ސަބަބުން ރާއްޖޭގެ ދަރަނީ ވަނީ އިތުރުވެފައި:އައިއެމްއެފް

އުމްރާނީ ތަރައްގީގެ ބޮޑެތި މަޝްރޫއުތަކުގެ ސަބަބުން ރާއްޖޭގެ ދަރަނީގެ މިންވަރު އިތުރުވެފައިވާ ކަމަށް އިންޓަރނޭޝަނަލް މޮނިޓަރީ ފަންޑް (އައިއެމްއެފް) އިން ބުނެފި އެވެ.

އައިއެމްއެފުން ހޯމަ ދުވަހު ނެރެފައިވާ ރިޕޯޓުގައި ބުނެފައިވަނީ، 2017 ވަނަ އަހަރަށް ވުރެ 2018 ވަނަ އަހަރު ރާއްޖޭގެ ގައުމީ އުފެއްދުންތެރިކަން ކުރިއަރާ މިންވަރު 4.5 ޕަސެންޓަށް ވުރެ މަތިވާނެ ކަމަށް އަންދާޒާކުރެވޭ ކަމަށެވެ.

Advertisement

މޯލްޑިވްސް މޮނިޓަރީ އޮތޯރިޓީ (އެމްއެމްއޭ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އައިއެމްއެފްގެ އޭޝިއާ އެންޑް ޕެސިފިކް ޑިޕާޓްމެންޓުގެ ޑެޕިއުޓީ ޑިވިޝަން ޗީފް ފިލިޕް ކަރަމް ވިދާޅުވީ، ގެދޮރު އިމާރާތްކުރުމާއި ސިއްހީ ދައިރާއާއި އެއާޕޯޓް ތަރައްގީ ކުރުން ފަދަ ބޮޑެތި އިންވެސްޓްމެންޓްގެ ސަބަބުން، އިގްތިސާދު އިތުރަށް ފުޅާވެ، ކުރިއަރައިގެން ދިއުމަށް މަގުފަހިވާނެ ކަމަށެވެ. އެހެން ނަމަވެސް އިގްތިދާސީ ގޮތުން ކުރިއަށްދިއުމުގައި ތަފާތު ގޮންޖެހުންތައް ހުރިކަން އޭނާ ފާހަގަކުރެއްވި އެވެ.

އެގޮތުން ތަރައްގީވެފައިވާ ގައުމުތަކުގެ އިގްތިސާދު ކުރިއަރާ މިންވަރު މަޑުޖެހުމާއި، މޫސުމަށް އަންނަ ބަދަލުތަކުގެ ސަބަބުން ކުރިމަތިވާ ނޭދެވޭ އަސަރުތަކަކީ ރާއްޖެއިން ސަމާލުވާންޖެހޭ ކަމެއް ކަމަށް އޭނާ ވިދާޅުވި އެވެ. ރާއްޖޭގެ ދަރަނި އިތުރުވުމުގެ ސަބަބުން، މެދުވެރިވާނެ ގެއްލުން ކުޑަކުރުމަށްޓަކައި ހިންގާ އިންވެސްޓްމެންޓްތައް ހަރުދަނާކަމާ އެކު ކުރިއަށްގެންދިއުން މުހިއްމު ކަމަށް ފިލިޕް ކަރަމް ވިދާޅުވި އެވެ.

ސަރުކާރުގެ ހަރަދުތައް އިތުރުވުުމުގެ ސަބަބުންނާއި ބެލެންސް އޮފް ޕޭމެންޓްސްގެ ޑެފިސިޓް އިތުރަށް ފުޅާވުމުގެ ސަބަބުން، އެކްސްޗޭންޖް ރޭޓަށް ނޭދެވޭ އަސަރުކުރާނަމަ، މަނިޓަރީ ސިޔާސަތު ހިފަހައްޓަންޖެހޭ ކަމަށް އޭނާ ވިދާޅުވި އެވެ.

މީގެ އިތުރުން ފިލިޕް ކަރަމް ވަނީ މޫސުމަށް އަންނަ ބަދަލުތަކުގެ ސަބަބުން ދިމާވާ ނޭދެވޭ އަސަރުތަކުން ކުރާ ގެއްލުން ކުޑަ ކުރުމަށްޓަކާއި ދުރާލާ ތައްޔާރުވެ، ގުދުރަތީ ކާރިސާތަކުން އަރައިގަތުމަށް މާލީ ފުރުސަތުތައް ލިބެން އޮތުމުން ރާއްޖެއަށް ގިނަގުނަ ފައިދާތަކެއް ކުރާނެ ކަމަށެވެ.

ފިލިޕް ކަރަމް ވަނީ، މިދިޔަ އަހަރު ނެރުނު ރިޕޯޓުގައި ސަބްސިޑީތައް ކަނޑާލުމަށް ރެކޮމެންޑް ކުރުމުން އެކަން ސަރުކާރުން ކޮށްފައިވާތީ، އެއީ ރަގަޅު ބަދަލެއްގެ ގޮތުގައި ސިފަކުރައްވާފަ އެވެ.

"ސަރުކާރުގެ ހަރަދާއި އާމްދަނީގެ ސިޔާސަތަށް ބަލާއިރު، ހަރަދު ކުޑަކުރުމުގެ ގޮތުން ސަބްސިޑީގެ ސިޔާސަތަށް ގެނެވިފައިވާ ބަދަލާ،ވަޒީފާއާ މުސާރަދިނުމުގެ ސިޔާސަތުތަކަށް އައިއެމްއެފްއިން ދީފައިވާ ލަފަޔާ އެއްގޮތަށް ތަންފީޒުކޮށްފައިވަކަން ފާހަގަކުރެވޭ. ސައުލަތުގެ މާލިއްޔަތި މެނޭޖްކުރުން ހަރުދަނާ ކުރެވިފައިވާކަންވެސް ފާހަގަކުރެވޭ. އުމްރާނީ ތަރައްގީގެ މަޝްރޫއުތަކަށް ކުރަންޖެހިފައިވ އިތުރު ހޭދަތައް ފޫބެއްދުމަށްޓަކައި އާމްދަނީ އިތުރުކުރުމަށް ފިޔަވަޅުތަކެއް އަޅަންޖެހޭ." ފިލިޕް ކަރަމް ވިދާޅުވި އެވެ.