ޖަލު އަދަބު ޖޫރިމަނާއަށް ބަދަލުކުރުމުންވެސް އެ ފައިސާ ނުދައްކާތީ، އަލުން ޖަލަށް
ޙުކުމާ އެއްގޮތަށް ފައިސާ ދައްކާފައިނުވާތީ ދައުލަތުން އެދިގެން އަދަބު މުރާޖައާކޮށްފައިވޭ
ކްރިމިނަލް ކޯޓް
ކްރިމިނަލް ކޯޓުން ބެލި މައްސަލައެއްގައި މީހެއްގެ މައްޗަށް ކަނޑައެޅުނު ޖަލު އަދަބު ޖޫރިމަނާއަށް ބަދަލުކުރުމުންވެސް އެ ފައިސާ ނުދައްކާތީ، އަލުން އޭނާ ޖަލަށް ލުމަށް ކްރިމިނަލް ކޯޓުން ޙުކުމްކޮށްފިއެވެ.
މި މައްސަލައަކީ ކްރިމިނަލް ކޯޓުގެ ޙުކުމާ އެއްގޮތަށް ފައިސާ ދައްކާފައިނުވާތީ ދައުލަތުން އެދިގެން އަދަބު މުރާޖައާކޮށްދިނުން އެދި ހުށައެޅުމުން ބެލި މައްސަލައެކެވެ.
މި މައްސަލައިގައި ކަން ހިނގާފައިވާ ގޮތަށް ބަލާއިރު، "އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާ" އުފުލި މީހެއްގެ މައްޗަށް އެ ކުށް ސާބިތުވުމުން، އޭނާ 6 މަހާއި 25 ދުވަހަށް ޖަލަށް ލުމަށް ޙުކުމްކޮށް، އެ ޖަލު އަދަބު ޖޫރިމަނާއަށް ވަނީ ބަދަލުކޮށްދީފައެވެ.
ވުމާއެކު، މި މައްސަލައިގައި އޭނާގެ މައްޗަށް ކުރި ޙުކުމަކީ 41،000 ރުފިޔާގެ ޖޫރިމަނާގެ އަދަބެކެވެ.
އަދި އެ ފައިސާ 24 ޖޫން 2022ން ފެށިގެން 10 މަސް ދުވަހުގެ ތެރޭގައި މީރާއަށް ދެއްކުމަށް ވަނީ ޙުކުމްކޮށްފައެވެ.
އެހެންނަމަވެސް، އެ މުއްދަތުގެ ތެރޭގައި އޭނާ އެ ފައިސާ ދައްކާފައިނުވާއިރު، އޭނާގެ ފަރާތުން ބުނެފައިވަނީ އެ ފައިސާ ނުދައްކާ ހުރީ އެ ފައިސާ ދެއްކުމަށް އެއްވެސް ފަރާތަކުން އަންގާފައިނުވާތީ ކަމަށެވެ.
އަދި މައްސަލަ ނިމުނު ގޮތް އެނގޭނެ އެއްވެސް ލިއުމެއްވެސް އޭނާއާ ޙަވާލުކޮށްފައިނުވާކަމަށާއި، އިތުރު ފުރުސަތެއް ދީފިނަަމަ އެ ފައިސާ ދައްކައި ޚަލާސް ކުރާނެކަމަށް އޭނާ ބުނެފައިވެއެވެ.
އެހެންނަމަވެސް، މި މައްސަލައިގެ ޝަރީއަތް ނިމުނު ގޮތް އެނގޭނެ ލިޔުންތަކާ އޭނާ ޙަވާލުވެފައިވާކަން ލިޔެކިއުންތަކުން އެނގޭކަމަށް ކްރިމިނަލް ކޯޓުން ބުނެފައިވެއެވެ.
ވުމާއެކު، ޙުކުމުގައިވާ ގޮތަށް ޖޫރިމަނާ ފައިސާ ދައްކާފައިނުވާތީ އެ ޙުކުމް އަނެއްކާވެސް ޖަލު އަދަބަކަށް ބަދަލު ކުރުމުން ކަނޑައެޅޭ 6 މަހާއި 25 ދުވަހުގެ ޖަލު އަދަބަކީ އޭނާ ތަންފީޒު ކުރަންޖެހޭ އަދަބެއްކަމަށް ކޯޓުން ވަނީ ނިންމާފައެވެ.
ކްރިމިނަލް ކޯޓުގައި މި މައްސަލަ ބެއްލެވީ ގާޒީ އިބްރާހިމް އިޙްސާންއެވެ.
