ދެވަނަ މެެޗުގައި ރޮނާލްޑޯ ހިމަނައިގެންވެސް އަލް ނަސްރު ސަލާމަތެއް ނުވި!

ސައުދީ ޕްރޯ ލީގުގައި އަލް ތާވޫނާ ދެކޮޅަށް ކުޅުނު މެޗުންވެސް އަލް ނަސްރު ބަލިވެއްޖެއެވެ.

މިއީ އައު ސީޒަންގެ ސައުދީ ޕްރޯ ލީގުގައި އަލް ނަސްރުން ކުޅުނު ދެވަނަ މެޗެވެ. ފުރަތަމަ މެޗުގައި އަލް އިއްތިފާގާ ވާދަކޮށް ބަލިވިއިރު، އެ މެޗުގައި ކެޕްޓަން ކްރިސްޓިއާނޯ ރޮނާލްޑޯއެއް ނުކުޅެއެވެ. ނަމަވެސް ދެ މެޗުގައި އަލް ނަސްރުގެ ފުރަތަމަ 11ގައި ރޮނާލްޑޯ ވަނީ ހިމަނާފައެވެ. ދެވަނަ މެޗުން އަލް ނަސްރު ބަލިވީ 2-0ންނެވެ.

މެޗުގައި އަލް ތާވޫނުން ފުރަތަމަ ލަނޑު ޖަހައި ކުރި ހޯދީ 20 ވަނަ މިނެޓުގައެވެ. އެއީ އަލް ތާވޫނަށް ލިބުނު ކޯނަރެއްގައި މަތެއަސް ހުރަސްކޮށްދިން ބޯޅައެއް ބޮލުން ގޯލަށް ވައްދާލައިގެން، ލިއާންދްރޭ ޓަވަންބާ ޖެހި ލަނޑެކެވެ. އެ ލަނޑުގެ ކުރިންވެސް އަލް ތާވޫނަށް ވަނީ ލަނޑު ޖަހާނެ ފުރުސަތު ލިބިފައެވެ. މެޗުގައި ތާވޫނުން އެއް ލަނޑުގެ ލީޑެއް ނަގާފައި ވަނިކޮށް އަލް ނަސްރަށް ވަނީ ނަތީޖާ ހަމަހަމަ ކުރުމަށްވެސް ފުރުސަތު ލިބިފައެވެ. އެގޮތުން ކެޕްޓަން ރޮނާލްޑޯއަށް ތިން ފުރުސަތެއް ލިބުނުއިރު، ސެނެގާލްގެ ސަޑިއޯ މާނޭއަށް ވެސް ވަނީ ފުރުސަތެއް ލިބި، ބޭކާރުވެފައެވެ. އޭގެ ފަހުން ބްރެޒިލްގެ ޓަލިސްކާވެސް ވަނީ ނަތީޖާ ހަމަހަމަ ކުރުމަށް މަސައްކަތް ކޮށްފައެވެ. މެޗުގެ ފަހު ވަގުތު މާނޭ ލަނޑެއް ޖެހިނަމަވެސް، ރެފްރީ ވަނީ އޮފްސައިޑު ކަމަށް ނިންމާފައެވެ. މެޗުގެ ފަހު ވަގުތު ތާވޫންގެ ދެވަނަ ލަނޑު ޖެހީ އަހުމަދު ބަހުސައިނެވެ. އޭނާ ފޮނުވާލި ބޯޅަ ގޯލަށް ވަނީ، ގޯލު ކުރިމަތީ ހުރި އަލް ނަސްރުގެ ޑިފެންޑަރެެއްގެ ގައިގައި ޖެހިފައެވެ.

ލީގުގައި މިހާތަނަށް ދެ މެޗު ކުޅެފައިވާއިރު، އަލް ނަސްރު އޮތީ ލީގު ތާވަލްގެ 15 ވަނާގައެވެ. އެ ޓީމަށް ދެން އޮންނާނީ އޯގަސްޓު މަހުގެ 22 ވަނަ ދުވަހު އޭއެފްސީ ޗެމްޕިއަންސް ލީގުގެ ޕްލޭ އޮފްގައި ޝަބާބް އަލް އަހްލީއާ ދެކޮޅަށް ކުޅޭ މެޗެވެ. އޭގެ ފަހުން ލީގުގައި ނިކުންނާނީ އަލް ފާތެހާ ދެކޮޅަށެވެ.