ވެސްޓް ހޭމްގެ މިޑްފީލްޑަރު، ލޫކަސް ޕަކޭޓާ ބެޓިން އުސޫލާ ޚިލާފުވެފައި ވާކަމުގެ މައްސަލައެއް، ފުޓުބޯޅަ އެސޯސިއޭޝަނުން ބަލަމުން އަންނަކަމަށް ރިޕޯޓުތަކުން ބުނެފިއެވެ.

އުމުރުން 25 އަހަރުގެ މިޑްފީލްޑަރު ވަނީ މެންޗެސްޓަރ ސިޓީއަށް ބަދަލުވުމަށް އުޅެފައެވެ. ކުރިޔަށް އޮތް ވޯލްޑް ކަޕް ކޮލިފައިން މެޗުތަކަށް ބްރެޒިލުން އެކުލަވާލާފައިވާ ސްކޮޑުން ހުކުރު ދުވަހު އޭނާ ވަނީ ބާކީކޮށްފައެވެ. ޕަކޭޓާ ބުނީ، އޭނާ އަމިއްލައަށް އެއްވެސް ބެޓެއް ނުކުރާއިރު، އެފަދަ ޚަބަރެއް އަޑުއިވުމުން ލިބުނީ ކުއްލި ސިހުމެއް ކަމަށެވެ.

ފީފާގެ ބައިވެރިވުމާއެކު ބަލަމުންދާ މި މައްސަލައަކީ، ބެލެވޭ ގޮތުގައި، ބްރެޒިލްގައި އޭނާއަށް ދައްކާފައިވާ ރީނދޫ ކާޑަށް ކޮށްފައިވާ ބެޓުތަކެއްގެ މައްސަލައެވެ.

ބޮލީވިއާއާއި ޕެރޫއާ ދެކޮޅަށް އަންނަ މަހު ކުޅުމަށް ހަމަޖެހިފައިވާ މެޗުގައި ޕަކޭޓާ ނުހިމަނަން ނިންމާފައިވަނީ ހުކުރު ދުވަހުއެވެ. ބްރެޒިލްގެ ވަގުތީ ކޯޗު ފެނާންޑޯ ޑިނިޒް ބުނީ މީގެ ކުރިން ޓީމު ލިސްޓުގައި ޕަކޭޓާ ހިމެނޭ ކަމަށާއި، އަދި ޕަކޭޓާއަކީ އޭނާއަށް ވަރަށް ކަމުދާ ކުޅުންތެރިއެއް ކަމަށެވެ. އަދި ޓީމުގައި ނުހިމެނުމުން، އޭނާއަށް ދިމާވެފައިވާ މައްސަލަތަކަށް ހައްލު ހޯދުމަށް ވަގުތު ލިބޭނެކަމަށް ޑިނިޒް ބުންޏެވެ.

ލިޔޯނުން 36.5 މިލިއަން ޕައުންޑަށް ވެސްޓް ހޭމްއަށް އޭނާ ބަދަލުވީ މިދިޔަ އަހަރުއެވެ. ވެސްޓް ހޭމް ކޮންފަރެންސް ލީގު ކާމިޔާބު ކުރިއިރު އޭނާ ވަނީ މުހިންމު ދައުރެއް އަދާކޮށްފައެވެ. މީގެއިތުރުން އޭނާ ވަނީ ލީގުގައި 28 މެޗު ކުޅެ، ހަތަރު ލަނޑު ޖަހައި، ތިން ލަނޑު ޖެހުމަށް އެހީތެރިވެދީފައެވެ.

ބެޓިން އުސޫލާ ޚިލާފުވުމާ ގުޅިގެން މެއި މަހު ބްރެންޓްފޯޑްގެ ފޯވާޑް އިވާން ޓޯނޭވެސް ވަނީ 8 މަސްދުވަހަށް ސަސްޕެންޑް ކޮށްފައެވެ. އޭނާ ވަނީ 232 ފަހަރު އެފްއޭގެ ބެޓިން ގަވައިދާ ޚިލާފުވެފައެވެ.