އުރުގުއޭގެ ޒުވާން މިޑްފީލްޑަރ ލޫކަސް ޓޮރޭރާގެ ސޮއެ ހޯދުމަށް އިނގިރޭސި ޕްރިމިއަރ ލީގްގެ އާސެނަލްއިން މަސައްކަތްކުރަމުން އެބަދެއެވެ.
އުމުރުން 22 އަހަރުގެ ޓޮރޭރާ ކުޅެމުން އަންނަނީ އިޓަލީގެ ސެރީއޭގެ ސެމްޕްޑޯރިއާއަށެވެ. އޭނާގެ އަގު 26 މިލިއަން ޕައުންޑްގައި އުޅޭއިރު، މިއީ އާސެނަލްގެ ބަޖެޓަށް ފެތޭ ކުޅުންތެރިއެއްކަމަށް ރިޕޯޓްތައް ބުނެއެވެ. އާސެނަލްއިން އެޓީމުގެ މެދުތެރެ އަންނަ ސީޒަނަށް ވަރުގަދަކުރުމަށް މަސައްކަތްކުރާއިރު، ޓޮރޭރާގެ އެހީ މުހިއްމުވާނެއެވެ.
ޓޮރޭރާގެ ސޮއި ހޯދުމަށް އާސެނަލްއިން މަސައްކަތްކުރިނަމަވެސް، އަދި އޭނާ ރަސްމީ ޖަވާބެއް އެކްލަބަށް ދީފައެއް ނުވެއެވެ. އޭނާ މިވަގުތު ހުރީ ވޯލްޑްކަޕް ކުޅެން ރަޝިޔާގައެވެ. ޓޮރޭރާ އުރުގުއޭގެ ޤައުމީ ޓީމަށް ކުޅެން ފެށީ މިދިޔަ މާޗް މަހުގައެވެ.
ސެމްޕްޑޯރިއާއަށް ޓޮރޭރާ 74 މެޗް ކުޅެފައިވާއިރު، އޭނާ ވަނީ 4 ލަނޑު ޖަހާފައެވެ.
ހޫނު މޫސުމުގެ ޓްރާންސްފަރގައި އައު ގޯލް ކީޕަރެއް ހޯދުމަށްވެސް އާސެނަލްއިން މަސައްކަތްކުރަމުންދާއިރު، ބުންޑަސްލީގާގެ ބޮރޯޝިއާ ޑޯޓްމުންޑަށް ކުޅެމުން އަންނަ ގްރީސްގެ ސޮކްރާޓިސް ޕަޕަތަޕޮލޮސް ހޯދުމަށްވެސް އާސެނަލްއިން މަސައްކަތްކުރާކަމަށް އަޑުތައް ފެތުރިފައިއެވެ. މެދުތެރެއިން ފަހަތަށް ކުޅޭ ޕަޕަތަޕޮލޮސް ގެންނާނެކަން ނުވަތަ ނޫންކަން އާސެނަލްއިން ހާމަކުރާނީ އަންނަ ޖުލައި މަހުގައެވެ.
މީގެ އިތުރުން އާސެނަލްއިން ވަނީ ސްވިޓްޒަލެންޑްގެ ޑިފެންޑަރ ސްޓީވަން ލިކްސްޓެއިނަރވެސް އެޓީމަށް ނަގާފައެވެ. އިޓަލީގެ ޔުވެންޓަސްއަށް ކުޅެމުން އައި މިކުޅުންތެރިޔާ ގެނައީ ހިލޭ ޓްރާންސްފަރއެއްގައެވެ.
