ފްރާންސްގެ ޕެރިސް ސެއިންޓް ޖަރމައިން (ޕީއެސްޖީ) އަށް ކުޅޭ ބްރެޒިލްގެ ވިންގަރ ލޫކަސް މޫރާ އަށް އެކްލަބުން ހުށަހެޅި 25 މިލިއަން ޕައުންޑުގެ އަގަށް ޓޮޓެންހަމް ހޮޓްސްޕަރ އިން އެއްބަސްވެއްޖެ އެވެ.

ލޫކަސް މޫރާގެ ޓްރާންސްފަރގެ ކަންކަމުގައި ދެ ކްލަބުގެ ދެމެދުގައި އެއްބަސްވުމަކަށް އާދެވިފައިވާއިރު، މިހާރު އޮތީ ކުޅުންތެރިޔާ އާ ކްލަބާއި ދެމެދު އެއްބަސްވާންޖެހޭ ކަންކަން ނިންމުމާއި މެޑިކަލް ޓެސްޓްތައް ކުރިއަށް ގެންދިއުމެވެ.

ޓްރާންސްފަރގެ ކަންކަމުގައި ޓޮޓެންހަމްގެ ކޯޗު މަރިއީސިއޯ ޕޮޗެޓީނޯ އަދި އެކްލަބުގެ ޗެއަރމަން ޑެނިއެލް ލެވީ އާ މޫރާ ބައްދަލުކޮށްފައިވާއިރު، ޓޮޓެންހަމް އަށް ބަދަލުވުމަށް މޫރާ ވަރަށް ބޭނުންވާ ކަމަށް ބައެއް މީޑިއާ ރިޕޯޓްތައް ބުނެއެވެ.

ލޫކަސް މުރާ ގެންދިއުމަށް އިނގިރޭސި ޕްރިމިއަރ ލީގުގެ ދެ ކްލަބު ކަމަށްވާ އާސެނަލް އަދި މެންޗެސްޓަރ ޔުނައިޓެޑުން ޝައުގުވެރިވާ ކަމުގެ އަޑުތަކެއްވެސް މީގެ ކުރިން ފެތުރުނެވެ.

ބްރެޒިލްގެ ސައު ޕައުލޯ އިން 33.5 މިލިއަން ޕައުންޑުގެ އަގަކަށް 2013 ވަނަ އަހަރު ޕީއެސްޖީ އާ ގުޅުނު ލޫކަސް މިސީޒަނުގެ ބޮޑު ބައި ހޭދަކުރީ ޕީއެސްޖީގެ ބެންޗުގައެވެ. މިސީޒަނުގައި ޕީއެސްޖީ އަށް މޫރާ ކުޅުނު 6 މެޗުގައިވެސް، އޭނާ ކުޅެން ނިކުމެފައިވަނީ ބަދަލު ކުޅުންތެރިޔެއްގެ ގޮތުގައެވެ.

މޫރާ އަށް ކުޅެން ލިބޭ ފުރުޞަތު މަދުވެފައިވާއިރު، އައު ކްލަބެއް ހޯދުމަށް ޕީއެސްޖީ އިން އޭނާ ގާތު ބުނެފައިވާ ކަމަށް ރިޕޯޓްތައް ބުނެއެވެ.

ބްރެޒިލްގެ ގައުމީ ޓީމަށް 35 މެޗު ކުޅެފައިވާ ލޫކަސް މޫރާ ވަނީ 2012 ވަނަ އަހަރުގެ ލަންޑަން އޮލިމްޕިކްސްގައި ބްރެޒިލްގެ ގައުމީ ޓީމާއެކު ރިހި މެޑަލް ހޯދާ، 2013 ވަނަ އަހަރުގެ ފީފާ ކޮންފެޑެރޭޝަންސް ކަޕް ކާމިޔާބު ކޮށްފައެވެ.

ޕީއެސްޖީ އަށް ބަދަލުވި ފަހުން އޭނާ ވަނީ އެކްލަބަށް 229 މެޗު ކުޅެދީފައެވެ. މިމުއްދަތުގައި މޫރާ އެކްލަބަށް 46 ލަނޑު ޖަހައިދީ، 50 ލަނޑު ޖެހުމަށް ފުރުޞަތު ތަނަވަސް ކޮށްދީފައިވެއެވެ.

ޕީއެސްޖީ އާއެކު އޭނާ ވަނީ ފްރާންސްގެ 13 މުބާރާތެއް ކާމިޔާބު ކޮށްފައެވެ. އޭގެ ތެރޭގައި ފްރާންސްގެ ލީގު ޗެމްޕިއަންކަން 4 ފަހަރު ހޯދުން ފާހަގަ ކޮށްލެވެއެވެ.