އުމުރުން 34 އަހަރުގައި ތިއޯ ވޮލްކޮޓް، ފުޓުބޯޅަ ކުޅުން ހުއްޓާލައިފި

އިންގްލެންޑާއި އާސެނަލްގެ ކުރީގެ ފޯވާޑް، ތިއޯ ވޮލްކޮޓް ފުޓުބޯޅަ ކުޅުން ހުއްޓާލިކަން ރަސްމީކޮށް އިއުލާނުކޮށްފިއެވެ.

ސައުތެމްޓަންގެ އެކެޑެމީ އިން ކުޅެން ފެށި ވޮލްކޮޓް ވަނީ އުމުރުން 16 އަހަރުގައި އާސެނަލް އަށް ބަދަލުވެފައެވެ. 2006 ވަނަ އަހަރު އެ ޓީމާ ގުޅުމަށްފަހު އޭނާ ވަނީ 397 މެޗު ކުޅެދީ 108 ޖަހައިދީފައެވެ. އޭނާ ވަނީ އާސެނަލް އާއެކު އެފްއޭ ކަޕު ދެފަހަރު، އަދި ކޮމިޔުނިޓީ ޝީލްޑް ދެފަހަރު ކާމިޔާބުކޮށްފައެވެ.

2018 ވަނަ އަހަރު ވޮލްކޮޓް ވަނީ އެވަޓަންއަށް ބަދަލުވެފައެވެ. އެ ޓީމަށް 47 މެޗު ކުޅެދިނުމަށްފަހު 2020-2021 ވަނަ ސީޒަނުގައި އޭނާ ވަނީ ލޯނު އެއްބަސްވުމެއްގެ ދަށުން އެނބުރި ސައުތެމްޓަންއަށް ބަދަލުވެފައެވެ. އެޔަށްފަހު އޭނާ ވަނީ އެ ޓީމާއެކު ދާއިމީ އެއްބަސްވުމެއްގައި ސޮއިކޮށްފައެވެ.

ވޮލްކޮޓް ބުނީ ރައްޓެހިންނާއެކު ޕާކުގައި ކުޅެން ފަށައިގެން، ފުޓުބޯޅަ ކުޅުން ހުއްޓާލީ ބޮޑެތި ސްޓޭޑިއަމް ތަކުގައި ގިނަ އަދަދެއްގެ ސަޕޯޓަރުން ކުރިމަތީގައި ކުޅެފައި ކަމަށެވެ. އަދި މޮޅެތި ގިނަ ކުޅުންތެރިންނާއެކު އަދި ދެކޮޅަށް ކުޅުމުގެ ފުރުސަތު ލިބުމަކީ ދުވަހަކުވެސް ހަނދާން ނެތޭނެ ކަމެއް ނޫންކަމަށް އޭނާ ބުންޏެވެ. މީގެއިތުރުން ވޮލްކޮޓް ވަނީ އޭނާގެ ހުރިހާ ކޯޗުންނަށް ޝުކުރު އަދާކޮށްފައެވެ. ޚާއްސަ ގޮތެއްގައި އޭނާ ވަނީ ހެރީ ރެޑްނެޕް އާއި އާސެން ވެންގާގެ ނަން ފާހަގަ ކޮށްފައެވެ.

ވޮލްކޮޓް އަކީ އިންގްލެންޑުގެ ސީނިއާ ގައުމީ ޓީމަށް ކުޅުނު އެންމެ ހަގު ކުޅުންތެރިޔާއެވެ. 2006 ވަނަ އަހަރު ހަންގޭރީ އާ ދެކޮޅަށް ކުޅުނު އިރު އޭނާގެ އުމުރަނީ 17 އަހަރެވެ.