2018ގައި ސިޔާސީ ހަރަކާތްތައް ހިންގުމަށް އެއްވެސް ޖާގައެއް ނެތް ނަމަވެސް މިއަދު އެ ހާލަތު ވަނީ ބަދަލުވެފައި: ނިޔާޒު
18 އޯގަސްޓު 2023 | ހުކުރު 09:502018 ގައި ޖަގަހަ ހަދައި، ހުޅުވަންޖެހުނީ ފިލައި ތިބެގެން
ރައްޔިތުންގެ މަޖިލީހުގެ ހުޅުމާލެދާއިރާގެ މަޖިލީހުގެ މެންބަރު ޢަލީ ނިޔާޒު
2018 ވަނަ އަހަރު ސިޔާސީ ހަރަކާތްތައް ހިންގުމަށް އެއްވެސް ޖާގައެއް ނެތް ކަމަށާއި، ނަމަވެސް މިއަދު އެހާލަތު އެއްކޮށް ބަދަލުވެފައިވާ ކަމަށް ރައްޔިތުންގެ މަޖިލީހުގެ ހުޅުމާލެ ދާއިރާގެ މަޖިލީހުގެ މެންބަރު ޢަލީ ނިޔާޒު ވިދާޅުވެއްޖެއެވެ.
އެމްޑީއޭގެ ހުޅުމާލެ ޕޮލިޓިކަލް ސެންޓަރު ހުޅުވުމަށް ބުރާސްފަތި ދުވަހުގެ ރޭ ބޭއްވި ރަސްމިއްޔާތުގައި ނިޔާޒު ވިދާޅުވީ 2018 ވަނަ އަހަރުގެ ރިޔާސީ އިންތިޚާބަށް މަސައްކަތް ކުރީ ވަރަށް ގިނަ ދަތިތަކާއެކު ކަމަށެވެ. އަދި ކެންޕޭނަށް ޖަގަހަ ވެސް ހަދައި، ހުޅުވަންޖެހުނީ ފިލައި ތިބެގެން ކަމަށް ނިޔާޒު ވިދާޅުވިއެވެ.
ނިޔާޒު ވިދާޅުވީ އެ ދުވަސްވަރު ސިޔާސީ ހަރަކާތްތައް ހިންގުމަށް އެއްވެސް ޖާގައެއް ނެތް ކަމަށެވެ. ނަމަވެސް މިއަދު އެ ފުރުސަތު ހުރިހާ ޕާޓީތަކަށް ލިބިފައިވާ ކަމަށް ނިޔާޒު ވިދާޅުވިއެވެ. އަދި ވިދާޅުވީ މިއަދު ޖަގަހަތައް ބަންދުކުރުމާއި ތަނުގެ ވެރިފަރާތުން ޖޫރިމަނާކުރުން ފަދަ އަނިޔާވެރި އަމަލުތައް ނުހިންގާ ކަމަށެވެ.
މީގެ އިތުރުން ނިޔާޒު ވިދާޅުވީ ސިޔާސީ ގޮތުން ލިބިފައިވާ މިނިވަންކަމަކީ ކާމިޔާބު މަސައްކަތްތަކެއް ކުރުމާއި ކުރިއަށް އޮތް ރިޔާސީ އިންތިޚާބު ކާމިޔާބު ކުރުމަށް ލިބޭނެ އެންމެ ބޮޑު އެއް ސަބަބު ކަމަށެވެ.
ނިޔާޒު ވިދާޅުވީ މިއަހަރުގެ ރިޔާސީ އިންތިޚާބަށް އެމްޑީޕީއަށް ލިބިފައި މިއޮތީ ވަރަށް ތަފާތު ފުރުސަތެއް ކަމަށާއި ތިން ވަނަ ފަހަރަށް ވެރިކަމަށް އައުމަށް ރަނުގެ ފުރުސަތެއް ކަމަށެވެ. އެމްޑީޕީއަކީ ކެމްޕޭން ކުރުމަށް ފަރިތަ ޕާޓީއެއް ކަމަށާއި، 17 އަހަރުގެ ދިގު ތަޖުރިބާއާއެކު ކާމިޔާބު ކެމްޕޭންތަކެއް ރާއްޖޭގެ އެކި ހިސާބުތަކުގައި ކުރިއަށް ގެންދެވޭކަން ނިޔާޒު ފާހަގަކުރެއްވިއެވެ. އަދި 2018 ވަނަ އަހަރު ވެރިކަމަށް ވަޑައިގަންނަވަން ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވެވަޑައިގެންފައިވާ ވައުދުތަކުގެ ތެރެއިން ގިނަ ވައުދުތައް ފުއްދައިދެއްވާފައިވާއިރު، އަލުން ރައްޔިތުންނާއި ހިސާބަށް ވަޑައިގެން ވައުދުވެވަޑައިގަންނަވަން ކެރިވަޑައިގަންނަވާނެކަމަށާއި، ރައްޔިތުންގެ އިތުބާރު ލިބިވަޑައިގެންފައިވާ ކަމަށް ނިޔާޒު ވިދާޅުވިއެވެ.
