ބޯނޯ އާއެކު އަލް ހިލާލަށް އެއްބަސްވުމަކަށް އާދެވިއްޖެ

ސެވިއްޔާ އަށް ކުޅެމުން އަންނަ މޮރޯކޯގެ ގޯލް ކީޕަރު ޔަސިން ބޯނޯ އާއެކު ސައުދީ ޕްރޯ ލީގުގެ އަލް ހިލާލަށް އެއްބަސްވުމަކަށް އާދެވިއްޖެ އެވެ.

މީޑިއާތަކުން ބުނެފައިވާ ގޮތުގައި ބޯނޯ އާއެކު އަލް ހިލާލުން ކުރިއަށް ގެންދިޔަ ގިނަ މަޝްވަރާތަކަށްފަހު، ކުޅުންތެރިޔާގެ ފަރާތުން އެކަމަށް އެއްބަސްވެފައިވެއެވެ. އަލް ހިލާލުން ބޯނޯ އަށް ހުށަހަޅަނީ ތިން އަހަރު ދުވަހުގެ އެއްބަސްވުމެކެވެ. އެއީ 2026 ވަނަ އަހަރުގެ ޖޫން މަހުގެ ނިޔަލަށް އެ ކުލަބަށް ކުޅުމަށެވެ. އަލް ހިލާލުން ބޯނޯ އަށް ހުށަހަޅަނީ 19 މިލިއަން ޔޫރޯގެ މުސާރައެކެވެ. ނަމަވެސް އެހެނިހެން އިނާޔަތްތަކާއެކު އެ އަދަދު 21 މިލިއަން ޔޫރޯ އަށް އަރާނެ ކަމަށް ރިޕޯޓުތައް ބުނެ އެވެ.

ސެވިއްޔާ އާއެކު ބޯނޯ ސޮއިކޮށްފައިވާ ހަތަރު އަހަރުގެ އެއްބަސްވުމުގެ މުއްދަތު ހަމަވާނީ 2024 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް އޭގެ ކުރިން ވެސް ކުލަބު ދޫކޮށްލުމަށް ކުޅުންތެރިޔާ ބޭނުންވާނަމަ، ސެވިއްޔާ އިން އޮތީ ރަނގަޅު އަގެއްގައި ބޯނޯ ދޫކޮށްލަން ތައްޔާރަށް ކަމަށް ރިޕޯޓުތައް ބުނެ އެވެ. ބޯނޯ ހޯދުމަށް އަލް ހިލާލްގެ އިތުރުން ޖަރުމަނުގެ ބަޔާން މިއުނިކުން ވެސް ވަނީ މަސައްކަތް ކޮށްފަ އެވެ. ނަމަވެސް ފަހު ވަގުތު އެ ޑީލުން ބަޔާން ބޭރުވީ، ބޯނޯ ހޯދުމަށް އަލް ހިލާލުން ކުރާ ބިޑާ އެ ކުލަބަށް ވާދަނުކުރެވޭތީ އެވެ.

އުމުރުން 32 އަހަރުގެ ކީޕަރު ވިދާލީ މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕް މުބާރާތުންނެވެ. މޮރޮކޯ އިން މުބާރާތުގެ ސެމީ ފައިނަލާ ހަމައަށް ދިޔައިރު، ބޯނޯ ވަނީ އެ ޓީމުގެ ގޯލުގައި މޮޅު ކުޅުމެއް ދައްކައިފަ އެވެ. މުބާރާތުގެ ގަދަ 16 ވަނަ ބުރުގައި ބޯނޯ ވަނީ ސްޕެއިންގެ ދެ ޕެނަލްޓީ ހުއްޓުވައި، ސްޕެއިން މުބާރާތުން ކަޓުވާލައިފަ އެވެ. އޭގެ ފަހުން ކުއާޓާ ފައިނަލްގައި ޕޯޗުގަލާ ދެކޮޅަށް ވެސް ބޯނޯ ވަނީ މޮޅަށް ކުޅެފަ އެވެ. ބޯނޯ ވަނީ މިހާތަނަށް 142 މެޗުގައި ސެވިއްޔާގެ ގޯލު އިތުބާރާއެކު ބަލަހައްޓައިފަ އެވެ. ޤައުމީ ޓީމުގެ ގޯލު އޭނާ ވަނީ 54 މެޗުގައި ބަލަހައްޓައިފަ އެވެ.