ސައުދީގެ އަލް-ނަސްރަށް ލަޕޯޓް ވިއްކާލަން މެންޗެސްޓަރ ސިޓީން އެއްބަސްވެއްޖެ

ސައުދީ ޕްރޮފެޝަނަލް ލީގުގެ އަލް-ނަސްރަށް އައިމެރިކް ލަޕޯޓް ވިއްކާލަން މެންޗެސްޓަރ ސިޓީން އެއްބަސްވެއްޖެއެވެ.

އުމުރުން 29 އަހަރުގެ ލަޕޯޓް ވަނީ 2021-2022 ވަނަ ސީޒަނުގައި ސިޓީގައި 43 މެޗު ފަށާފައެވެ. ނަމަވެސް މިދިޔަ ސީޒަނުގެ ގިނަ މެޗުތަކުގައި ގާޑިއޯލާ ބޭނުންކޮށްފައިވަނީ މެނުއެލް އަކަންޖީ އާއި ނަތަން އަކޭ އެވެ. މި ހޫނުމޫސުމިގައި 77 މިލިއަން ޕައުންޑަށް ސިޓީއަށް ކްރޮއޭޝިއާގެ ޑިފެންޑަރު ޖޮސްކޯ ގްވާޑިއޯލް ގެނައުމާއެކު ލަޕޯޓްއަށް ފުރުސަތު އިތުރަށް ކުޑަވާނެއެވެ. ޖޯން ސްޓޯންސް އާއި ރުބެން ޑިއާސްގެ ފަހަތުން ލަޕޯޓް ވެގެންދާނީ ހަވަނަ ޗޮއިސް ސެންޓަ ބެކަށެވެ.

އެތުލެޓިކް ބިލްބާއޯ އިން ލަޕޯޓް ސިޓީއަށް ބަދަލުވީ 2018 ވަނަ އަހަރު، ކުލަބް ރެކޯޑް އަދަދެއް ކަމަށްވާ 57 މިލިއަން ޕައުންޑަށެވެ. 2021 ވަނަ އަހަރު އޭނާ ވަނީ ގައުމީ ޓީމު ފްރާންސް އިން ސްޕެއިންއަށް ބަދަލުކޮށްފައެވެ. އޭނާ ވަނީ 2018-2019 ވަނަ ސީޒަނުގައި 51 މެޗު އަދި 2021-2022 ވަނަ ސީޒަނުގައި 44 މެޗު ސިޓީއަށް ކުޅެދީފައެވެ. އޭނާގެ އެހީތެރިކަމާއެކު ސިޓީއިން ވަނީ ވޭތުވެދިޔަ ހަ ސީޒަނުގެ ތެރޭގައި ފަސް ފަހަރު ޕްރިމިއަރ ލީގު ކާމިޔާބުކޮށްފައެވެ.

ލަޕޯޓް ވަނީ ސިޓީއަށް ޖުމްލަ 180 މެޗު ކުޅެދީ 12 ލަނޑު ޖަހައިދީފައެވެ. މީގެއިތުރުން ސްޕެއިންއަށް 22 މެޗު ކުޅެދީ، މިދިޔަ ޖޫން މަހު ނޭޝަންސް ލީގު ކާމިޔާބުކުރުމަށް އެހީތެރިވެދީފައިވެއެވެ.

މިދިޔަ ޑިސެމްބަރު މަހު އަލް-ނަސްރަށް ރޮނާލްޑޯ ބަދަލުވިފަހުން، މާސެލޯ ބްރޮޒޮވިޗް އާއި އެލެކްސް ޓެލެސްގެ އިތުރުން ސަޑިއޯ މާނޭ ވަނީ އެ ޓީމަށް ސޮއިކޮށްފައެވެ.