ފުރަތަމަ މެޗުގައި ޗެމްޕިއަން ބާސެލޯނާ އެއްވަރު

އައު ސީޒަންގެ ސްޕެނިޝް ލީގުގައި ޗެމްޕިއަން ބާސެލޯނާ އިން ކުޅުނު ފުރަތަމަ މެޗު އެއްވަރުވެއްޖެ އެވެ.

ބާސެލޯނާގެ ފުރަތަމަ މެޗުގައި ރަށުން ބޭރުގައި އެ ޓީމު ނުކުތީ ގެޓާފޭއާ ދެކޮޅަށެވެ. އާދިއްތަ ދުވަހުގެ ރޭ ކުޅުނު މެޗު ނިމުނީ އެއްވެސް ޓީމަކަށް ލަނޑެއް ކާމިޔާބު ނުކުރެވުނެވެ. މެޗު ފަށައިގެން ކުރީކޮޅު ގެޓާފޭގެ ހުއާންމީ ލަޓާސާ އަށް ވަނީ ލަނޑު ޖަހާނެ ރަނގަޅު ފުރުސަތެއް ލިބިފަ އެވެ. ނަމަވެސް ބާސެލޯނާގެ އޭރިޔާ ތެރެއިން އޭނާ ފޮނުވާލަން މަސައްކަތް ކުރި ބޯޅަ ރަނގަޅަށް ފައިގައި ޖެހޭ ގޮތް ނުވީ އެވެ. އޭގެ ފަހުން ބާސެލޯނާ އަށް ލިބުނު ހިލޭ ޖެހުމެއްގައި ރަފީނިއާ ފޮނުވާލި ބޯޅަ ގެޓާފޭގެ ގޯލް ކީޕަރު ވަނީ ހުއްޓުވައިފަ އެވެ. މެޗުގައި ބާސެލޯނާ އަށް ދިމާވި އެންމެ ބޮޑު އެއް މައްސަލަ އަކީ ފުރަތަމަ ހާފުގެ 42 ވަނަ މިނެޓުގައި ރަފީނިއާ އަށް ސީދާ ރަތް ކާޑެއް ދެއްކުމުންނެވެ. އޭގެ ފަހުން ދެ ވަނަ ހާފުގައި ކޯޗު ޒަވީ ހެނާންޑޭޒް އަށް ވެސް ވަނީ ސީދާ ރަތް ކާޑެއް ދައްކައިފަ އެވެ.

މެޗުގައި ބާސެލޯނާ އަށް ލީޑު ނަގައިދޭން އެ ޓީމުގެ ޕޮލެންޑު ފޯވާޑް ރޮބާޓް ލެވަންޑޯސްކީ އަށް ވެސް ވަނީ ރަނގަޅު ފުރުސަތުތަކެއް ލިބިފަ އެވެ. މީގެ އިތުރުން ބަދަލު ކުޅުންތެރިޔެއްގެ ގޮތުގައި ކުޅެން ނުކުތް، އަންސޫ ފާޓީ އާއި ގަވީ އަށް ވެސް ވަނީ ލަނޑު ޖަހާނެ ފުރުސަތު ލިބި ބޭކާރުވެފަ އެވެ.

މި މެޗުގައި ބާސެލޯނާ އިން އަލަށް ގެނައި މެންޗެސްޓަރ ސިޓީގެ ކުރީގެ ކެޕްޓަން އިލްކާއީ ގުންޑޮގާން ވެސް ކުޅެން ނުކުމެފަ އެވެ. މެޗުގެ ފުރަތަމަ 11 ގައި ހިމެނިގެން އޭނާ ކުޅެން ނުކުތް ނަމަވެސް، ދެ ވަނަ ހާފުގައި ވަނީ ބަދަލު ކޮށްފަ އެވެ. އޭނާގެ ބަދަލުގައި ކުޅެން ނުކުތީ ގަވީ އެވެ.

ލީގުގައި ދެން ބާސެލޯނާ އަށް އޮންނާނީ އޯގަސްޓު 20 ވަނަ ދުވަހު އަމިއްލަ ދަނޑުގައި ކާޑިޒްއާ ދެކޮޅަށް ކުޅޭ މެޗެވެ.