ކޮސްޓާ އެންމެ ފަހުން ބްރެޒިލުގެ އެތުލެޓިކޯއަށް

މިދިޔަ އަހަރުގެ ޑިސެމްބަރު މަހު ސްޕެއިނުގެ އެތުލެޓިކޯ މެޑްރިޑުގެ އެއްބަސްވުން އުވާލި ސްޕެއިނުގެ ފޯވާޑް ޑިއޭގޯ ކޮސްޓާ އެންމެ ފަހުން ބްރެޒިލުގެ އެތުލެޓިކޯ މިނޭރޯއަށް ސޮއިކޮށްފިއެވެ.

އެތުލެޓިކޯއާއެކު ކޮސްޓާ ހަދާފައި އޮތް އެއްބަސްވުން މި އަހަރުގެ ހޫނު މޫސުމުގައި ހަމަވަން އޮތް ނަމަވެސް، ކޮސްޓާ ވަނީ އަމިއްލައަށް އެއްބަސްވުން އުވާލުމަށް އެ ކުލަބުގައި އެދިފައެވެ. އެއާއެކު މިދިޔަ އަހަރުގެ ޑިސެމްބަރު މަހުގެ ފަހުކޮޅު އެތުލެޓިކޯއިން ވަނީ ކޮސްޓާގެ އެދުމުގެ މަތިން އޭނާގެ އެއްބަސްވުން އުވާލާފައެވެ. ރިޕޯޓުތައް ބުނާ ގޮތުން އުމުރުން 32 އަހަރުގެ ކޮސްޓާ އާއި އެތުލެޓިކޯގެ ކޯޗިން ސްޓާފަކާ މައްސަލަޖެހި، އޭނާ އެ ޓީމު ދޫކޮށްލަން ނިންމީ އެ ޓީމާއެކު ހަދާފައިވާ އެއްބަސްވުމުގައި ބާކީ އޮތް ހަ މަސް ދުވަހަށް އެއްވެސް ބަދަލެއް ހޯދުމެއް ނެތިއެވެ.

އެތުލެޓިކޯ އެއްބަސްވުން އުވާލި ނަމަވެސް، މިދިޔަ ފިނި މޫސުމުގެ ޓްރާންސްފާގައި ކޮސްޓާ އެއްވެސް ޓީމަކާ ގުޅިފައެއް ނުވެއެވެ. ހަތް މަސް ވަންދެން އެއްވެސް ކުލަބަކާ ނުގުޅެ ހުރުމަށްފަހު ހިލޭ ޓްރާންސްފާއެއްގެ ދަށުން ކޮސްޓާ ވަނީ ބްރެޒިލުގެ އެތުލެޓިކޯއަށް ސޮއިކޮށްފައެވެ. އަދި އޭނާ ވަނީ އެ ކުލަބާއެކު އަންނަ އަހަރުގެ ޑިސެމްބަރު މަހުގެ ނިޔަލަށް އެއްބަސްވުން ހަދާފައެވެ.

ބްރެޒިލުގެ އެތުލެޓިކޯއަށް ކޮސްޓާ ސޮއިކުރިއިރު، އޭނާ ފުޓްބޯޅަ ކެރިއަރު ފަށާފައިވަނީވެސް އެ ގައުމުންނެވެ. ބްރެޒިލަށް އުފަން ކޮސްޓާ ވަނީ އެ ގައުމުގެ ގައުމީ ފުޓްބޯޅަ ޓީމަށް ދެ މެޗު ކުޅެދީފައެވެ. އެކަމަކު އެ ދެ މެޗަކީ ފީފާގެ މެޗުތަކެއް ކަމަށް ނުވާތީ، ކޮސްޓާ ވަނީ ފަހުން ސްޕެއިންގެ ރަށްވެހިކަން ހޯދައި، އެ ގައުމުގެ ގައުމީ ޓީމަށް ކުޅެފައެވެ.

ބްރެޒިލުގެ ކުލަބަކަށް ކޮސްޓާ ބަދަލުވިއިރު، އޭނާ އެންމެ ބޮޑަށް ވިދާލީ އިނގިރޭސި ކުލަބު ޗެލްސީންނެވެ. އެގޮތުން ކޮސްޓާ ވަނީ ޗެލްސީއާއެކު އިނގިރޭސި ޕްރިމިއާ ލީގު ދެ ފަހަރު އަދި އިނގިރޭސި ލީގު ކަޕް އެއް ފަހަރު ކާމިޔާބުކޮށްފައެވެ. މީގެ އިތުރުން އޭނާ ވަނީ އެތުލެޓިކޯއާއެކު ސްޕެނިޝް ލީގު، ސްޕެނިޝް ކަޕް އަދި ޔުއެފާ ޔޫރޮޕާ ލީގުވެސް ކާމިޔާބުކޮށްފައެވެ.