ޓޮޓެންހަމުގެ ކެޕްޓަންކަން ސޮންއަށް
13 އޯގަސްޓު 2023 | އާދީއްތަ 09:46ވައިސް ކެޕްޓަނުންނަކީ ކްރިސްޓިއަން ރޮމޭރޯ އާއި ޖޭމްސް މެޑިސަން
ސޮންއާ އެކު ޓޮޓެންހަމުގެ ދެ ވައިސް ކެޕްޓަނުން
ޓޮޓެންހަމުގެ ކެޕްޓަންކަން ދެކުނު ކޮރެޔާގެ ސޮން ހުންގް މިން އަށް ދީފި އެވެ.
ޓީމުގެ ވައިސް ކެޕްޓަނުންގެ ގޮތުގައި ހަމަޖައްސާފައިވަނީ އާޖެންޓީނާގެ ޑިފެންޑަރު ކްރިސްޓިއަން ރޮމޭރޯ އާއި ޓީމާ އަލަށް ކުޅުނު އިނގިރޭސި މިޑްފީލްޑަރު ޖޭމްސް މެޑިސަން އެވެ.
މިއީ ޓީމުގެ ކެޕްޓަން ހެރީކޭން ކުލަބު ދޫކޮށްދިއުމުން ގެނެސްފައިވާ ބަދަލެކެވެ. ޓޮޓެންހަމުގައި ފްރާންސްގެ ކެޕްޓަން ހޫގޯ ލޮރިސް ވެސް އަދި އެބަހުޓެވެ. އެކަމަކު އޭނާގެ ކުރިމަގުގައި ކުލަބުގައި ނުހުންނާނެކަން ވަނީ ގާތްގަނޑަކަށް ޔަގީންވެފަ އެވެ.
ސޮން ބުނީ ކެޕްޓަންކަން ލިބުމަކީ ވަރަށް ބޮޑު ފަހުރެއް ކަމަށެވެ.
ޓޮޓެންހަމަށް 145 ގޯލު ޖަހާދީފައިވާ ފޯވަޑް ބުނީ ކުރިއަށް އޮތް ސީޒަނަކީ ބަދަލުތަކަކާއެކު ފަށާ ސީޒަނެއް ކަމަށެވެ. އަދި ޓީމާއެކު ކުރިއަށްދާން އޭނާ ހުރީ ކެތްމަދުވެފައި ކަމަށެވެ.
ޓޮޓެންހަމުގެ ކޯޗު އެންޖޭ ޕޮސްޓެކޮގްލޫ ބުނީ ސޮން އަށް ކެޕްޓަންކަން ދިނުމާމެދު އިތުރަށް ވިސްނަންނުޖެހުނު ކަމަށެވެ. ސަބަބަކީ އޭނާގެ ކިބާގައި ކެޕްޓަނެއްގެ ސިފަތައް ހުރީތީވެ ކަމަށެވެ.
