ކޮވިޑާއެކު މެނިފެސްޓޯގައި ހުރި ބައެއް ކަންކަން ރިވައިސްކުރަންޖެހުނު ކަމަށް ނިޔާޒު ވިދާޅުވި
ހުޅުމާލެ ދާއިރާގެ މެމްބަރ އަލީ ނިޔާޒު
އެމްޑީޕީއަކީ އަބަދުވެސް މެނިފެސްޓޯ އާއެކު މަސައްކަތްކުރާ ބައެއްކަމަށާއި ރައްޔިތުންގެ ޚިޔާލު ހޯދައިގެން ސިޔާސަތުތައް އެކުލަވާލާ ބައެއްކަމަށް ހުޅުމާލެ ދާއިރާގެ މެމްބަރ އަލީ ނިޔާޒު ވިދާޅުވެއްޖެއެވެ.
ރައީސް މިހާރު ނ އަތޮޅަށް ކުރައްވަމުން ގެންދަވާ ކެމްޕެއިން ދަތުރުފުޅުގައި ނ.މަނަދޫގައި ހޮނިހިރު ދުވަހުގެ ރޭ ބޭއްވި "އުފާވެރި އަމާން ރާއްޖެ" ޖަލްސާގައި ވާހަކަދައްކަވަމުން ނިޔާޒު ވިދާޅުވީ ރައްޔިތުންގެ ޚިޔާލު ހޯދައިގެން މެނިފެސްޓޯ އެކުލަވާލުމަށްފަހު ވެރިކަމަށް އައުމަށްފަހު މެނިފެސްޓޯގައި ހުރިކަންކަން ތަންފީޒުކުރުމަށްޓަކައި އޮނިގަނޑެއް އެކުލަވާލާކަމަށެވެ. އޮނިގަނޑުގެ ތެރެއަށް ފަސް އަހަރުގެ ތެރޭގައި އެކަންކުރާނެ ގޮތް އެކުލަވާލާކަމަށް ނިޔާޒު ވިދާޅުވިއެވެ.
ނަމަވެސް މިފަސް އަހަރު ދިމާވި ކަމެއް ވާދަވެރިން ހަނދާން ނައްތާލާފައިވާކަމަށް ނިޔާޒު ވިދާޅުވިއެވެ. ކޮވިޑްގެ އާލަމީ ވަބާގެ ވާހަކަ މެނިފެސްޓޯގައި ނޯންނާނެކަމަށާއި އެކަމުން އަރައިގަންނާނެ ގޮތްވެސް މެނިފެސްޓޯގައި ނޯންނާނެކަމަށް ނިޔާޒު ވިދާޅުވިއެވެ. އެކަމުން އަރައިގަނެވުނީ މިހާރުގެ ރައީސް އިބްރާހީމް މުހައްމަދު ޞާލިހުގެ ހިކުމަތްތެރިކަމާއި ވިސްނުންތެރިކަމުން ކަމަށް ނިޔާޒު ވިދާޅުވިއެވެ.
އޭގެ ނަތީޖާއެއްގެ ގޮތުން މެނިފެސްޓޯގައި ހުރި ބައެއް ކަންކަން ރިވައިސްކުރަންޖެހުނު ކަމަށް ނިޔާޒު ވިދާޅުވިއެވެ.
ނިޔާޒު ވިދާޅުވީ އެމްޑީޕީގެ އެންމެ ބޮޑު ސިޔާސަތަކީ ލާމަރުކަޒުކުރުންކަމަށެވެ. އެކަން ސަރުކާރުން ގާނޫނަށް ގެނައި އިސްލާހާއެކު ވަރަށް ބޮޑަށް މި ފަސް އަހަރު ހާސިލުކުރެވިފައިވާކަމަށް ނިޔާޒު ވިދާޅުވިއެވެ.
