ޑެންޓިސްޓްރީ ނުވަތަ ދަތުގެ ޑޮކްޓަރީ ފަރުވާގެ ރޮނގުން މަތީ ތަޢުލީމު ހާޞިލު ކުރުމުގައި ނާޔާ ދަޔޫބު ވަނީ އޭނާގެ ޒުވާން ޙަޔާތުން 5 އަހަރު ހޭދަ ކޮށްފައެވެ. ނަމަވެސް، ދަތުގެ ޑޮކްޓަރީ ފަރުވާގެ ރޮނގުން ދަސްވެނިވެވުނު އިރު، އެއީ އޭނާއަށް އެއްވެސް ވަރެއްގެ ކުރިމަގެއް އޮތް މިޞްރާބެއް ނޫންކަން ނާޔާއަށް ފަޙުމްވިއެވެ.
މިއީ ހަމަ އެކަނި ނާޔާގެ ވާހަކައެއް ނޫނެވެ. ސޫރިޔާގެ ޔުނިވަރސިޓީތަކުން ދަސްވެނިވެފައި ވާ އެތައް ޒުވާނެއްގެ ހާލަކީވެސް ހަމަ އެއީއެވެ. އެތައް އަހަރެއްގެ ބުރަ މަސައްކަތުން ހާޞިލު ކުރި ސަނަދުގެ ބޭނުމެއް ނެތެވެ. މަތީ ތަޢުލީމު ހާޞިލު ކުރި ދާއިރާ ދޫކޮށް، މިއަދު އެ ޒުވާނުން އަވަދި ނެތި އުޅެމުން ދަނީ އަމިއްލަ ވިޔަފާރިތައް ހިންގުމުގެ މަސައްކަތުގައެވެ.
ކޮލެޖުގަ ކިޔެވި ދުވަސްވަރުވެސް އަހަރެން ދަތް ހަދާ އުޅުނިން އުށް ބޭނުން ކޮށްގެން. އުށް ބޭނުން ކޮށްގެން އެކި ކަހަލަ އެއްޗެހި އުފެއްދުމަކީ އަހަރެން ވަރަށް ކުރާ ހިތްވާ ކަމެއް. އެގޮތަށް، އެކިކަހަލަ އުއްބަތި ހަދަންވެސް އަހަރެން ލޯބި ކުރަން. ދަސްވެނިވިއިރު، އިތުރު ފައިސާ ހޯދަން މަސައްކަތް ކުރާނެ ފުރުޞަތު ލިބުނު. މައިންބަފައިންނަށް އެހީއެއް ވެދޭން އިތުރު ފައިސާކޮޅެއް ހޯދޭނެ މަގު އޮތް. އެހެންވެ، އަމިއްލަ މަސައްކަތުން، އަމިއްލަ ވިޔަފާރިއެއް ހަދަން އަހަރެން މަސައްކަތް ފެށީ. ރަޙުމަތްތެރިއަކާ އެކީގަ. އެއީވެސް ޑެންޓިސްޓްރީ ގްރެޖުއޭޓެއް.ނާޔާ ދަޔޫބު؛ ސޫރިޔާގެ ޒުވާނެއް
އިޤްތިޞާދީ ކާރިޘީ ތޫފާނެއްގައި ބެދިފައި އޮތް ސޫރިޔާގެ ފަސްގަނޑުގައި، މިއަދު އެ ޒުވާނުންނަށް އެހެން ގޮތެއް ނެތުނީއެވެ.
ފުރުޞަތު އޮތް ނަމަ އަހަރެންވެސް މިހާރު މަސައްކަތް ކުރާނީ އަމިއްލަ ކުލިނިކެއް ހުޅުވައިގެން ޑެންޓިސްޓެއްގެ ގޮތުގަ. ނޫނީ، އެހެން ޑެންޓިސްޓެއްގެ ކުލިނިކުގަ މަސައްކަތްކޮށްގެން އިތުރު ފައިސާ ކޮޅެއްވެސް ހޯދަމުން ދާނީ. އަމިއްލަ ވިޔަފާރިއެއް ފެށީސްހެނެއް ހީއެއް ނުވޭ. ތަޖުރިބާކޮށްލަން ކަމެއް ކޮށްލަފާނެ. އެކަމަކު އާމްދަނީ ހޯދަން ވަޒީފާއެއްގެ ގޮތުގަ މިކަން ކުރާނެ ހެން ހީއެއް ނުވޭ.ނާޔާ ދަޔޫބު؛ ސޫރިޔާގެ ޒުވާނެއް
ޢުމުރުން 26 އަހަރު ނާޔާގެ މިޞްރާބު ބަދަލު ކޮށްލީ މީރު ވަސްތައް ދުވާ އުއްބައްތިއާއި ސައިބޯނި އުފެއްދުމުގެ މަސައްކަތާ ދިމާއަށެވެ. އެ މަސައްކަތުން ފުދޭ ވަރެއްގެ އާމްދަނީއެއް ލިބެއެވެ. އެކި ބޭނުންތަކަށް ޚަރަދު ކުރަން ޕޮކެޓް މަނީގެ ގޮތުގައި ބައެއް ނެގުމަށް ފަހު، ޕޯސްޓްގްރެޖުއޭޓް ކޯހުގެ ކަންކަމަށް ޚަރުދު ކުރަންވެސް ކޮންމެވެސް ވަރެއްގެ ފައިސާކޮޅެއް ލިބެއެވެ.
މިގޮތަށް އުއްބައްތި ހަދަހަދާ ހުރެގެން، އަމިއްލަ ކުލިނިކެއް ހުޅުވާނެ ވަރަށް އަހަންނަށް ފައިސާ ލިބޭނެހެން ހީއެއް ނުވޭ. އެކަމަކު، ޑެންޓިސްޓްރީގެ ރޮނގުން އަދިވެސް އިތުރަށް ކިޔަވަން ފުރުޞަތު އެބަ ލިބޭ މިކަމުން. އަހަރެންގެ ކަންކަމަށް ބޭނުންވާ ޚަރަދުތައް އެބަ ފޫބައްދާލެވޭ މިކަމުން... މައިންބަފައިންނަށް ތަކުލީފަކަށް ނުވެ.ނާޔާ ދަޔޫބު؛ ސޫރިޔާގެ ޒުވާނެއް
ޢުމުރުން 30 އަހަރުގެ ލައިލާ ޚަލޫސީގެ ވާހަކަވެސް ހުރީ ހަމަ އެފަދަ ގޮތަކަށެވެ. އިޤްތިޞާދީ ޢިލްމުގެ ރޮނގުން ލައިލާ ދަސްވެނިވީ 2016 ވަނަ އަހަރުއެވެ. މިއަދު އޭނާއަކީ ޒަމާނުއްސުރެ އޭނާގެ ހިތުގައި ކުރެހުމަށް އޮތް ވަރުގަދަ ލޯތްބާއިއެކު އެ ރޮނގުން ކުޑަ ވިޔަފާރިއެއް ހިންގަމުންދާ ސާބިތު ޒުވާނެކެވެ.
މަށަކީ ވަރަށް ކުރަހާ ހިތްވާ މީހެއް. އެހެންވެ، އަހަރެން ލޯބިކުރާ ކަމަކުން ވިޔަފާރިއެއް ފަށައިގެން، ފައިސާކޮޅެއްވެސް ހޯދޭނެތާދޯ. ކުރިއަށް އޮތްތަނުގަ، މީ އަހަރެންގެ ދާއިމީ، މައިގަނޑު ވިޔަފާރިއަށްވެސް ވެދާނެ. އެހެން މީހެއްގެ ކުންފުންޏެއްގަ މަސައްކަތް ކުރާ މީހެއްގެ ގޮތުގަ ދުވަސްތައް ހޭދަކޮށްލާނެހެން ހީއެއް ނުވޭ. އަހަރެން ޤަބޫލު ކުރާ ގޮތުގަ، އަހަރެންގެ އަމިއްލަ މަސައްކަތެއް އޮންނަން ޖެހޭނެ. އެއީ އަހަރެންގެ އަތްމަތި ތަނަވަސްކޮށްލަން. އެކަމަކު އެއީ އަހަރެންގެ ވިޔަފާރި ކާމިޔާބު ކުރެވިއްޖެއްޔާ. އަދި މިއުޅެނީ މާ ބޮޑު ކުރިއެރުންތަކެއް ނުލިބިގެން. އެއީ، އަދި މިއުޅެވެނީ ވަރަށް ޅަފަތުގެ މަރުޙަލާއެއްގަ ވީމަ.ލައިލާ ޚަލޫސީ؛ ސޫރިޔާގެ ޒުވާނެއް
ބޭނުންކޮށްފައި ހުންނަ އަންނައުނުގައި ކުރެހުމަކީ ލައިލާގެ މިއަދުގެ މަސައްކަތެވެ. އަލުން ބޭނުން ކުރަން ބާޒަރަށް ނެރެނީ އޭނާގެ ފަންނުވެރި ފަރުމާތަކުން އިތުރު ފުރިހަމަ ކަމެއް ނުވަތަ ތަފާތު ކަމެއް އެ އަންނައުނުތަކަށް ގެނެސްދިނުމަށް ފަހުގައެވެ. އެވަރުން އަދި ނިމުނީއެއް ނޫނެވެ. ލައިލާ ދަނީ ކުޅޭ އެއްޗެހި އުފައްދާ ކުންފުންޏެއްގައިވެސް މަސައްކަތް ކުރަމުންނެވެ. އެހެން ކަމުން، އޭނާ ބޭނުންވާ މިންވަރަށް، އަމިއްލަ ވިޔަފާރިއަށް ވަޤުތުވެސް އޮންނަނީ ނުދެވިފައެވެ.
އަހަރެން ކުރިން އުޅުނު ވަޒީފައިން ލިބުނު ވަރުގެ އާމްދަނީއެއް ލިބޭ އެބަ މިކަމުން. އަތްތެރި މަސައްކަތަކީ ވަރަށް ވަޤުތު ބޭނުންވާ ކަމެއް. އެހެންވެ، މި ވިޔަފާރިއަށް ވަރަށް މަސައްކަތް ކުރަން ޖެހޭ އިތުރު އާމްދަނީއެއް ބޭނުން ކަމަށް ވަންޏާ. އަތްތެރި މަސައްކަތް ކުރުމުގަ އޮތް މައްސަލައަކީ މީ. އޯޑަރުތައް ލިބޭނެ އަބަދުވެސް. އެކަމަކު، ކްލަޔަންޓުން ހޯދަން، ބަލަންވީ ތަންތަން އެނގެންވެސް ޖެހޭނެ. އަހަންނަށް ކުރިމަތިވާ އެންމެ ބޮޑު މައްސަލައަކީ ވަޤުތުގެ މައްސަލަ. ވަޤުތު ވަންޏާ އިތުރު އެއްޗެހި ފަރުމާކޮށް، އިތުރު ކުލަތައް ބޭނުންކޮށް، އިތުރު ފައިސާ ހޯދޭނެ.ލައިލާ ޚަލޫސީ؛ ސޫރިޔާގެ ޒުވާނެއް
ސޫރިޔާގެ ރައީސް ކަމުގެ މަޤާމުގައި އަދިވެސް ހުންނެވި ބައްޝާރު އަލް-އަސަދުގެ ވެރިކަމާ ދެކޮޅަށް 2011 ވަނަ އަހަރު އެ ޤައުމުގައި ފެށި ސުލްޙަވެރި މުޒާހަރާތައް ވަރުގަދަ ހަނގުރާމައަކަށް ބަދަލުވެގެން ދިޔަ ދިއުމާއެކު، މުޅި ޤައުމު މިހާރު އޮތީ ސުންނާފަތިވެ، ހަފުސްވެފައެވެ. ހުޅަނގުގެ ޤައުމުތަކުން ސޫރިޔާއާ ދެކޮޅަށް ތަންފީޒު ކުރަމުންދާ ދަތި ކުރުމުގެ ހަރުކަށި ފިޔަވަޅުތަކާއި، އަވަށްޓެރި ލުބްނާނަށް ބިންދާލަފައި އޮތް މާލީ ކާރިޘާގެ ރާޅާއެކު، ސޫރިޔާއަށްވެސް ވަނީ ފައިސާގެ ދަތިކަން، އޭގެ އެންމެ އިންތިހާއަށް ކުރިމަތިވެފައެވެ. ތެޔޮ އުފެއްދުމަށް ޚާއްޞަ ސޫރިޔާގެ އިރުއުތުރުގެ ސަރަޙައްދުގެ ކޮންޓްރޯލް، އަސަދުގެ މައި ސަރުކާރަށް ގެއްލިފައި އޮތް އޮތުމަކީ، ސޫރިޔާއަށް މިއަދު ކުރިމަތިލާން ޖެހިފައި ވާ އިޤްތިޞާދީ ހީނަރުކަމުގެ އެންމެ ބޮޑު އެއް ސަބަބެވެ.
