ރައީސް ސާލިހު ވައުދުފުޅެއް ވެވަޑައިގެންފިނަމަ ފުއްދަވާނެކަން މިއަދު ރައްޔިތުން ގަބޫލުކުރޭ: ސިޔާމް
ތަޖުރިބާ އަލީގައި މަސައްކަތް ކުރަންޖެހޭ
އެމްޑީއޭގެ ލީޑަރ އަހުމަދު ސިޔާމް މުހައްމަދު ވާހަކަދައްކަވަނީ
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވައުދުފުޅެއް ވެވަޑައިގެންފިނަމަ ފުއްދަވާނެކަން މިއަދު ރައްޔިތުން ގަބޫލުކުރާ ކަމަށް އެމްޑީއޭގެ ލީޑަރ އަހުމަދު ސިޔާމް މުހައްމަދު ވިދާޅުވެއްޖެއެވެ.
ނ. މާޅެންދޫގައި ބޭއްވި ބަނދަރު ބައްދަލުވުމުގައި ސިޔާމް ވިދާޅުވީ މީގެ ކުރިން ރާއްޖޭގެ ވެރިންގެ ފަރާތްޕުޅުން ފެންނަ މަންޒަރާއި މިހާރުގެ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ފަރާތްޕުޅުން ފެނިވަަޑައިގަންނަވަނީ މުޅިން ތަފާތު މަންޒަރެއް ކަަމަަށެވެ. މިއަދު ރައްޔިތުންނަށް ރައީސް ޓެސްޓު ކުރެވިފައިވާ ކަމަށާއި، އަދިވެސް ޓެސްޓު ކުރަންވީ ކަމަށް ސިޔާމް ވިދާޅުވިއެވެ.
ސިޔާމް ވިދާޅުވީ މާޅެންދޫ ރައްޔިތުންނާއި، މުޅި ނޫނު އަތޮޅުގެ ރައްޔިތުން ވެސް މިއަދު ކަންބޮޑުވާން ނުޖެހޭ ކަމަށެވެ. އަދި ވިދާޅުވީ ތަޖުރިބާ އަލީގައި މަސައްކަތް ކުރަންޖެހޭ ކަމަށާއި، ބުއްދިވެރިން އަމަލުކުރާނީ އެއުސޫލުން ކަމަށެވެ. ސިޔާމް ވިދާޅުވީ ރާއްޖޭގެ ރައްޔިތުންނަކީ އަބަދުވެސް ވިސްނުން އިސްކޮށްގެން މަސައްކަތް ކުރާ ބައެއް ކަމަށާއި، އެގޮތަށް އަބަދުވެސް މަސައްކަތް ކުރަންޖެހޭ ކަމަށެވެ.
ސިޔާމް ވިދާޅުވީ ރައީސް ސާލިހު ފިޔަވައި، އެހެން ބޭފުޅަކު ރައްޔިތުންގެ ކައިރިއަށް އައިސް ވައުދުވި ނަމަވެސް އެކަން ރައްޔިތުން ގަބޫލުކޮށްގެން ނުވާނެ ކަމަށެވެ. އަދި އެބޭފުޅުންގެ ލަޔާގަތާއި ގާބިލިއްޔަތުކަމެއް ނެތް ކަމަށް އޭނާ ވިދާޅުވިއެވެ.
