ސްޕެއިންގެ ރެއާލް މެޑްރިޑުގެ އެއް ނަންބަރު ގޯލް ކީޕަރު، ބެލްޖިއަމްގެ ތިބައޫ ކޯޓުއާ އަށް އަނިޔާވެ ކުޅުމާ ދުރަށް ދާން ޖެހިއްޖެ އެވެ.
އެކަން ހާމަކޮށްފައި ވަނީ ރެއާލުން ނެރުނު ބަޔާނެއްގަ އެވެ. ރެއާލުން ބުނީ މެޑިކަލް ޓީމުން ކުރިއަށް ގެންދިޔަ ކޯޓުއާގެ މެޑިކަލް ޓެސްޓުތަކުން ފެންނަ ގޮތުގައި އޭނާގެ ވާއަތު ކަކުލުގެ ލިގަމެންޓް ފަޅައިގެން ގޮސްފައިވާ ކަމަށެވެ. އެހެންކަމުން ކުރިއަށް އޮތް ދުވަސްތަކުގެ ތެރޭގައި އޭނާ ސާޖަރީއެއް ހަދާނެ ކަމަށް ވެސް ކުލަބުން ވަނީ ހާމަކޮށްފަ އެވެ. ސްޕެއިންގެ މީޑިއާ ތަކުގައި ބުނެފައިވާ ގޮތުން ކޯޓުއާ އަށް އަނިޔާވީ، އައު ސީޒަނަށް ތައްޔާރުވުމުގެ ގޮތުން ރެއާލުން ކުރިއަށް ގެންދިޔަ ފަރިތަކުރުމެއްގެ ތެރެއިންނެވެ. އައު ސީޒަން ފެށެން މަދު ދުވަސްކޮޅަކަށްވެފައިވާއިރު، ކޯޓުއާ އަށް އަނިޔާވެ ކުޅުމާ ދުރަށް ދާން ޖެހުމަކީ ރެއާލަށް ލިބޭނެ ވަރަށް ބޮޑު ގެއްލުމަކަށް ވާނެ އެވެ. އެހެންކަމުން ރެއާލުން މިހާރު އަންނަނީ އައު ގޯލް ކީޕަރެއް ހޯދުމުގެ މަސައްކަތް ކުރަމުން ކަމަށް މީޑިއާ ތަކުން ބުނެ އެވެ.
ޗެލްސީ ދޫކޮށް ކޯޓުއާ ރެއާލަށް ބަދަލުވީ 2018 ވަނަ އަހަރު އެވެ. ރެއާލުން އޭނާ ހޯދީ އެ އަހަރު ރަޝިޔާގައި އޮތް ފީފާ ވޯލްޑް ކަޕް މުބާރާތުގައި ކޯޓުއާ ދެއްކި މޮޅު ކުޅުމުގެ ސަބަބުންނެވެ. އެ އަހަރުގެ މުބާރާތުގެ އެންމެ މޮޅު ގޯލް ކީޕަރަކަށް ހޮވުނީ ވެސް ކޯޓުއާ އެވެ. ރެއާލަށް ބަދަލުވި ފަހުން އޭނާ ވަނީ 230 މެޗުގައި ރެއާލްގެ ގޯލު ބަލަހައްޓައިފަ އެވެ. ރެއާލާއެކު ކޯޓުއާ ވަނީ އަށް ތައްޓެއް ކާމިޔާބުކޮށްފަ އެވެ. ރެއާލަށް ބަދަލުވި ފަހުން ވެސް ކޯޓުއާ އަންނަނީ އެ ކުލަބުގައި މޮޅު ކުޅުމެއް ދައްކަމުންނެވެ.
