ތިމާ ތާއީދުކުރާ މީހާއަކީ ވަގަކަށްވުމުން ދެން ތިބޭ އެންމެންނަކީ ވަގުންނަށް ވާކަށް ނުޖެހޭ: އަސްލަމް
ދޮގު ފެތުރުމަކީ ސިޔާސީ ޕާޓީއެއްގެ ސިޔާސީ ހަރަކާތް ހިންގުން ނޫންކަމަށް އަސްލަމް ވިދާޅުވި
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ރަނިންގމޭޓް މުހައްމަދު އަސްލަމު
އެމީހަކު ތާއީދުކުރާ މީހަކީ ވަގަކަށް ވުމުން ދެން ތިބޭ އެންމެން ވަގުންނަށްވާން ނުޖެހޭ ކަމަށް ވިދާޅުވެ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ރަނިންގމޭޓް މުހައްމަދު އަސްލަމުގެ ބަހުގެ ހޫނު ހަމަލާތަކެއް އިދިކޮޅު ފަރާތްތަކަށް އަމާޒުކުރައްވައިފިއެވެ.
ގއ ވިލިގިނލީގައި ކުރިޔަށްދިޔަ "އުފާވެރި އަމާން ރާއްޖެ" ޖަލްސާގައި ވާހަކަދައްކަވަމުން ހިތަދޫ އުތުރު ދާއިރާގެ މެމްބަރުކަންވެސް ކުރައްވާ އެމްޑީޕީ ޕާލަމަންޓްރީ ގްރޫޕްގެ ލީޑަރ އަސްލަމް ވިދާޅުވީ ވަގުން ހިފާނެގޮތް ނިޒާމުގައި ބަޔާންކޮށްފައިވާކަމަށެވެ. ވައްކަން މީހަކުކުރުމުން އެކަން ހުށަހަޅާނެ އިދާރާތައް އެބަހުރިކަމަށާއި މައްސަލަ ބެލޭނެ ގޮތާއި މައްސަލަ ބެލުމަށްފަހު ޝަރީޢަތަށް ފޮނުވޭނެ ގޮތްވެސް އެބައޮތް ކަމަށެވެ.
ޝަރީއަތުން އެއީ ވަގެއްކަމަށް ސާބިތުވުމުން ޖަލުގައި ބަންދުކުރާކަމަށާއި އެހިސާބުން އެއީ ވަގެކޭ ބުނެވިދާނެކަމަށެވެ.
އަސްލަމް ވިދާޅުވީ ވާދަވެރި ސިޔާސީ ހަރަކާތް ހިންގުމަށް ތާއީދުކުރައްވާކަމަށާއި ނަމަވެސް ސިޔާސީ ޕްލެޓް ފޯމުތަކުގައި ދޮގު ފެތުރުމާއި ފިތުނަ އުފެއްދުމާއި މީހުންގެ އަބުރު ކަތިލުމަށް ތާއީދުނުކުރައްވާކަމަށެވެ. ދޮގު ފެތުރުމަކީ ސިޔާސީ ޕާޓީއެއްގެ ސިޔާސީ ހަރަކާތް ހިންގުން ނޫންކަމަށާއި ކަނޑައެޅިގެން ހަގީގަތާއި ޚިލާފު ދޮގުވާހަކަ ފަތުރާ އަބުރު ކަތިލުމަކީ ސިޔާސީ ހަރަކާތެއް ނޫންކަމަށް އަސްލަމް ވިދާޅުވިއެވެ.
އަސްލަމް ވިދާޅުވީ ހުރިހާ ސިޔާސީ ޕާޓީއެއްގެވެސް މެނިފެސްޓޯ އެންމެންނަށް ބެލުމުގެ ފުރުސަތު އޮންނަންވާނެކަމަށާއި އެކަން ހުރިހާ ރައްޔިތުންވެސް ކުރަންވާނެކަމަށެވެ. ނަމަވެސް ވާދަވެރިންގެ މާބޮޑު މެނިފެސްޓޯއެއް އޮތްތަން ދެކެވަޑައިނުގަންނަވާކަމަށް އަސްލަމް ވިދާޅުވިއެވެ.
އަސްލަމް ވިދާޅުވީ މިސަރުކާރުން 135 ރަށުގައި އައު އިންޖީނުގެ އަޅާ 141 ރަށުގައި ނަރުދަމާ ގާއިމުކޮށްދީފިކަމަށެވެ. އާބާދީގެ ބޮޑުބަޔަކަށް އަސާސީ ހިދުމަތްތައް ފޯރުކޮށްދީފިކަމަށާއި މިސަރުކާރަކީ ޓެސްޓްކޮށްފައިވާ ސަރުކާރެއްކަމަށް އަސްލަމް ވިދާޅުވިއެވެ.
